Pas ka Pol sogoe uti la ke osep Rom ina 4 - Aria New Testament

Pelengon ane la ke Abraham

¹ Oglou ari udo eia Abraham dong. Alo ka iye dong iye polou itau e osuk ke Ida Tapolngon bitna. Aitno lumu lange? Abraham due sua deka iye polou itau e osuk ke Ida Tapolngon bitna?

² Oglou Abraham due elio gesa kovok deka iye polou itau e osuk ke Ida Tapolngon bitna. Ida Tapolngon due polou itau e osuk ke bitna vala. E Abraham karanga kakai iye tona angaine tito ine ke Ida Tapolngon bitna kovok.

³ Ida Tapolngon ila pelengon wai ke ite ke elio ka due Abraham polou itau e osuk ke bitna. Ila pelengon wai langane. “Abraham aitno dagar ke Ida Tapolngon vala. E ari Ida Tapolngon due polou itau e osuk ke bitna kesua batne Abraham aitno dagar ke iye.”

⁴ E silang langane. Langka itosep itoboko ke gute gesa ila bokongon ma iye kli ite ine. Iye kli ite ine kesua udo bokongon ina klingen munu pes iye. E klingen tonari ka iye kli ite ine mani adai kovok. Aurou. Klingen tonari udo wan kesua itoboko ke gute tonari ila bokongon.

⁵ E langka aitno lite dagar ke Ida Tapolngon vala ma iye due ite itopolou itau e osuk ke bitna. Iye lua ite langane lama oglou udo elio soulu lokono.

⁶ Oglou gute Devit ka vri mgo ke osep Israel ina wai ke osep ka Ida Tapolngon due isak tipolou itau e osuk ke bitna. Osep ka Ida Tapolngon due isak tipolou itau e osuk ke bitna tididi urok ekreng gesa ine kovok. Aurou. Aitno lisak la dagar ke Ida Tapolngon vala deka iye due isak tipolou itau e osuk ke bitna.

⁷ Devit wai langane. “Gute ka Ida Tapolngon due polou itau e osuk ke bitna ma aitno neser pula ine. E langka Ida Tapolngon lua gute kene e due ila elio epmes ina noklok la ma gute tonari aitno itau lokono ine.

⁸ Gute ka ile omur ma Ida Tapolngon aitno mter ke ila elio epmes ina bitna bitna aling silang blang kovok ma aitno itau itau ine.”

⁹ Aitno lumu lange? Pelengon ka Devit wai ine la ke osep ka tididi elio ulangngan ina vala koke la ke osep leklou blang? Aitno lumu lange? Ma Ida Tapolngon lua osep ka tididi elio ulangngan ina vala koke ma iye lua osep leklou ka tididi elio ulangngan ina kovok? Devit ila pelengon la ke osep ka pula keniye ka aitno lisak dagar ke Ida Tapolngon lama tididi elio ulangngan ina kovok. Iye wai langane. “Abraham aitno dagar ke Ida Tapolngon deka Ida Tapolngon due polou itau e osuk ke bitna.”

¹⁰ Aitno lumu lange? Alo ari Abraham due elio ulangngan ina kodong deka Ida Tapolngon due polou itau e osuk ke bitna? Aurou. Ida Tapolngon due Abraham polou itau e osuk ke bitna mgo e mase Abraham due elio ulangngan ina.

¹¹ Oglou Abraham aitno dagar lokono ke Ida Tapolngon kodong deka lokono Ida Tapolngon due polou itau e osuk ke bitna. Iye polou itau e osuk ke bitna e mase Ida Tapolngon kar iye elio ulangngan ina. E elio ulangngan ina nisngen gesa ka nis osep Ida Tapolngon aitno itau ke Abraham. Aitno itau ke iye kesua oglou Abraham aitno la dagar ke iye. E eknikane osep ka pula keniye ka aitno lisak dagar ke Ida Tapolngon e tipolou itau e osuk ke bitna pmarak Abraham. Iye pmarak lama oglou tididi elio ulangngan ina kovok.

¹² E silang blang langane. Itosep Yuda ina ka itedidi elio ulangngan ina pmada Abraham blang. Aitno lumu lange? Ina lange itosep Yuda ina pmada Abraham? Pmada Abraham kesua itedidi elio ulangngan ina vala? Aurou. Iye pmada kesua aitno lite la dagar ke Ida Tapolngon eriar langka oglou Abraham aitno dagar ine. Oglou alo ka iye dau didi elio ulangngan ina kovok aitno dagar ke Ida Tapolngon ila pelengon vala.

Ida Tapolngon ila promis la ke osep ka pula keniye ka aitno lisak dagar ke iye

¹³ Oglou ari Ida Tapolngon wai promis ke Abraham ma omur ka pula keniye polou ina omur. Iye wai ila promis la ke Abraham gosok ila napakngan blang. Aitno lumu lange? Ida Tapolngon wai ila promis ke Abraham kesua Abraham didi Moses ila sogongon koke aurou? Aurou. Ida Tapolngon wai ila promis ke Abraham kesua Abraham aitno dagar ke iye vala. E ari Ida Tapolngon due polou itau e osuk ke bitna.

¹⁴ Langka Ida Tapolngon ila promis tonari la ke osep ka tididi Moses ila sogongon vala ma ila promis ari la adai vala. E ma aitno lite ila dagar la adai vala.

¹⁵ Moses ila sogongon nis ite ke udo elio soulu vala. E osep ka tidar sogongon tonari e tidue elio soulu vala Ida Tapolngon aitno ila engil ma due isak. E langka pelengon dagar gesa ka plau ite dong kovok ma itakaranga itadar pelengon dagar tonari kovok.

¹⁶ Lama tididi pelengon dagar kovok Ida Tapolngon dau due elio itau ke isak kesua aitno lisak dagar ke iye. Ma iye vati isak eriar langka isak Abraham ila napakngan leklou. Kesua aitno lisak dagar ke iye eriar langka oglou Abraham aitno dagar ke iye. E osep ka pula keniye ka aitno lisak dagar ke Ida Tapolngon pmarak Abraham. Kesua aitno lisak dagar ke Ida Tapolngon vala.

¹⁷ Oglou Moses sogo Ida Tapolngon ila pelengon palma ka la ke Abraham. Iye sogo oglou Ida Tapolngon wai dagar ke Abraham langane. “Ma ngadue wom ompolou osep pula pula pmarak.” Ida Tapolngon ila promis pelengon lokono vala. Alo ari Abraham klingen ine e lokono aitno la dagar ke iye. Aitno dagar ke Ida Tapolngon ka karanga due osep ka timete kodong ma tipoga titito ke inarak denga. Aitno dagar ke Ida Tapolngon ka karanga wai deka wan ka oglou dong kovok ma polou.

¹⁸ Oglou alo ka Ida Tapolngon wai dagar ke Abraham ma esna divir otno arang ari Abraham aitno orwo ine kovok. Aurou. Aitno dagar ine lama tipolou lapun kodong e lama tikaranga tidivir titorok gesa kovok. Lama tipolou lapun kodong Abraham aitno dau dagar lokono ke Ida Tapolngon ila promis ma ila napakngan tipolou pula pula.

¹⁹ Abraham dong la lama ina tobor isuk boto buno kene e ari iye dau divir otno gesa kovok. Lama ari iye dau divir otno arang kovok aitno dau dagar ke Ida Tapolngon ila pelengon dagar. Aitno dau dagar ke Ida Tapolngon ila pelengon dagar lama ari esna Sara dau opon.

²⁰ Lama isak orwo dau tidong langare Abraham aitno dau dagar lokono ke Ida Tapolngon ila promis. Iye ile Ida Tapolngon ila promis iye pelengon lokono. Deka aitno dong dagar lokono ine. E iye kakai Ida Tapolngon angaine tito ine.

²¹ Abraham aitno dagar lokono mase Ida Tapolngon ila promis tonari ma polou lokono.

²² Alo ari Ida Tapolngon ile omur Abraham aitno dagar lokono ke iye. Deka iye due Abraham polou itau e osuk ke bitna kesua batne Abraham aitno dagar ke iye.

²³ Oglou Moses sogo ke Abraham ila elio. Iye sogo Ida Tapolngon due Abraham polou itau e osuk ke bitna kesua Abraham aitno dagar ke iye. Pelengon ka iye sogo ine la ke Abraham vala kovok.

²⁴ Aurou. Pelengon tonari me ke ite ka aitno lite dagar ke Ida Tapolngon blang. Iye due ite itopolou itau e osuk ke bitna kesua aitno lite la dagar ke Ida Tapolngon kodong ka oglou due Ida Puda Yesus poga tito ke ina denga.

²⁵ Oglou Yesus mete batne ma iye kli udo elio epmes ina. E Ida Tapolngon due poga tito ke ina denga. Deka iye due ite ka aitno lite dagar ine itopolou itau e osuk ke bitna.