Pas ka Pol sogoe uti la ke osep Rom ina 3 - Aria New Testament

Elio soulu karanga due elio itau polou kovok

¹ Aitno lumu lange? Osep Yuda ina timole osep ka isak osep Yuda ina kovok koke aurou? Aitno lumu lange? Osep Yuda ina tidue elio ulangngan ina adai koke elio tonari karanga lua isak?

² Umoklingen. Osep Yuda ina urok elio leklou mole osep ka pula keniye urok elio leklou. Elio kene ina langane. Oglou ari Ida Tapolngon kar ila pelengon ke osep Yuda ina ma tiplaue itau.

³ Iye kar ila pelengon itau ke isak e osep Yuda ina leklou aitno lisak dagar ine kovok. Aurou. Tingelek ine vala. Aitno lumu lange? Osep ka tingelek Ida Tapolngon ila pelengon ma urok elio soulu due ila pelengon dong adai koke aurou?

⁴ ­Umoklingen. Osep ka pula keniye urok pelengon yakngan vala e Ida Tapolngon ila pelengon keniye lokono vala. Oglou osep napaprangan ina tisogo Ida Tapolngon ila pelengon palma ka wai langane. “Osep ka pula keniye tile omur lem pelengon keniye lokono. Langka osep tisin elio vri ke wom urok pelengon mole lem pelengon kovok. Aurou. Ma tibure vala.”

⁵ Osep leklou tididi aitno lisak e tiyakyak langane. “Elio soulu ka itodue nis osep pula ke Ida Tapolngon ila elio keniye itau lokono. E langka Ida Tapolngon waiki kot ite ine ma iye due elio soulu kesua udo elio soulu lua iye.” Pelengon ka ngawai ine ane langka itosep udo pelengon vala. Osep ka tiwai langane tiwai lokono kovok e tididi aitno lisak vala.

⁶ Osep tonari ka tiwai Ida Tapolngon due elio soulu tiyakyak vala. Langka Ida Tapolngon ila pelengon keniye soulu iye due sua ma iye karanga wade osep keniye urok pelengon ine?

⁷ Umoklingen. Osep leklou tiwai urok elio yakngan ina nis osep Ida Tapolngon ila pelengon lokono. E tiwai pulu langane. “Ina lange Ida Tapolngon ila wadengen due ite langka ite osep epmes ina? Kesua udo elio yakngan ka itodue kakai iye tona angaine.”

⁸ Osep tonari ka tiwai soulu langane tisin elio vri ke ngong blang. Tiwai langane. “Osep umoklingen. Gute Pol wai umodue elio soulu kesua ma elio soulu tonari due elio itau polou.” Isak ka tiwai langane tipes angain ngong ine. Ma urok elio ngen isak kesua Ida Tapolngon ma mulu isak ine.

Osep ka pula keniye urok elio vri ke isak

⁹ ­E aitno lumu lange? Aitno lumu mter imi osep Yuda ina imomole osep ka isak osep Yuda ina kovok? Aurou. Imomole isak kovok. Kesua osep ka pula keniye ka imi osep Yuda ina e osep ka isak osep Yuda ina kovok udo elio epmes ina dau munu pes ite.

¹⁰ Oglou gute napaprangan ina gesa sogo Ida Tapolngon ila pelengon langane. “Gute kene gesa dong ka ila elio itau kovok.

¹¹ E gute kene gesa dong ka iye ile omur ke elio itau kovok. E gute kene gesa dong ka iye krim ke Ida Tapolngon kovok.

¹² Kesua osep ka pula keniye tipul dogur ke Ida Tapolngon deka tipolou soulu lokono. E gute kene vala dong ka iye kene due elio itau kovok.

¹³ Osep ka pula keniye urok pele-ngon soulu lokono. Urok pelengon eriar langka denga gesa ka dong adai e osep tikadinge kovok e amna soulu lokono. Urok pelengon lokono kovok e yakngan vala. Tiwai soulu lokono ke osep leklou e tipaiavu isak langka mota ka soulu olune dong ke orsak.

¹⁴ Orsak teitei e tiwai soulu lokono ke osep leklou.

¹⁵ Tisuong tidue evlei e tidue burwa ke osep leklou blang. Emritim pelengon langane ke Testamen Oglou Ina ke Aisaia 59.7-8 e Sindaun 13.6. Emritim pelengon langane ke Testamen Oglou Ina ke Aisaia 59.7-8 e Sindaun 13.6.

¹⁶ Tipolou ke omur pula e tipaiavu osep deka osep tingangir ine.

¹⁷ Aitno lisak itau ke osep leklou blang kovok. Aurou. Aitno lisak soulu ke isak vala.

¹⁸ E tidue anit ke Ida Tapolngon kovok. Aurou. Tidue markan ke iye vala.”

¹⁹ E iteile omur Moses ila sogongon plau osep Yuda ina ka pula keniye. Moses ila sogongon tonari dong e dangdang osep pula ka tididie ka tiwaiki tibisi ke urok elio epmes ina. Deka osep ka pula keniye urok elio soulu vri ke isak ke Ida Tapolngon bitna.

²⁰ Umoklingen. Moses ila sogongon karanga due ite itopolou itau e osuk ke Ida Tapolngon bitna kovok. Aurou. Iye nis ite ke udo elio epmes ina vala.

Osep ka aitno lisak dagar ke Yesus tipolou itau e osuk ke Ida Tapolngon bitna

²¹ E eknikane Ida Tapolngon nis itosep malak ke elio ka iye due ite itopolou itau e osuk ke bitna. Moses ila sogongon karanga due osep ma tipolou itau e osuk ke Ida Tapolngon bitna kovok. E elio ka osep tipolou itau e osuk ke Ida Tapolngon bitna didi pelengon silang blang ka oglou Moses e osep napaprangan ina tisogo ine.

²² Eknikane elio kene vala dong ka Ida Tapolngon didie e due osep tipolou itau e osuk ke bitna. Iye due osep ka pula keniye ka aitno lisak la dagar ke Yesus Krais tipolou itau e osuk ke bitna. Iye due ila elio kene langane ke osep ka pula keniye.

²³ Kesua osep ka pula keniye tidue elio epmes ina kodong e tidong mawa ke iye e ke ila bublongon.

²⁴ Lama osep ka pula keniye tidong itau kovok Ida Tapolngon dau didi aitno e makai itosep ke Yesus Krais ka kli udo elio epmes ina. Iye kli udo elio epmes ina ma itopolou itau e osuk ke bitna. Ida Tapolngon soro ila makaingan ke itosep langka presen.

²⁵ Ida Tapolngon rere Yesus ma iye polou Ida Kasipngen ma ina metengen e ina marau kasip amunte. E Ida Tapolngon due osep ka pula keniye ka aitno lisak la dagar ke iye urok elio epmes ina noklok la. Ida Tapolngon rere Yesus Ida Kasipngen kesua iye waiki osep ka pula keniye tile omur ke ila elio itau lokono. Oglou alo ka Ida Tapolngon vati osep ka pula keniye urok elio epmes ina lokono iye koli urok elio kovok. Aurou. Iye dong tauni ine vala.

²⁶ Mase iye pagei Yesus ka Ida Kasipngen polou ke ite. Kesua iye waiki iteile omur ke ila elio itau lokono. E eknikane iye due osep ka pula keniye ka aitno lisak dagar ke Yesus tipolou itau e osuk ke bitna. Kesua iye tona itau lokono.

²⁷ Deka ite ka udo mosongon itau ite sei ma itakakai angainte ine? Aitno lumu lange? Ma itedidi Moses ila sogongon e itopolou itau e osuk ke Ida Tapolngon bitna? Aurou lokono. Eknikane itopolou itau e osuk ke Ida Tapolngon bitna kesua aitno lite la dagar ke Yesus kodong.

²⁸ Eknikane iteile omur osep ka tididi Moses ila sogongon vala ma tipolou itau e osuk ke Ida Tapolngon bitna kovok. E osep ka aitno lisak dagar ke Yesus vala ma Ida Tapolngon due isak tipolou itau e osuk ke bitna.

²⁹ Aitno lumu lange? Ida Tapolngon iye osep Yuda ina vala Inarak Tapolngon? E osep ka isak osep Yuda ina kovok iye Inarak Tapolngon kovok? Aurou. Ida Tapolngon iye osep ka pula keniye Inarak Tapolngon.

³⁰ Ida Tapolngon iye kene vala dong. E osep ka pula keniye ka aitno lisak dagar ke iye ma iye due isak tipolou itau e osuk ke bitna langka tididi elio ulangngan ina koke tididi elio ulangngan ina kovok.

³¹ Aitno lumu lange? Ida Tapolngon due ite itopolou itau e osuk ke bitna deka Moses ila sogongon yagos koke aurou? Aurou. Ma yagos kovok. Kesua alo ka aitno lite dagar ke Yesus deka itakaranga itedidi Moses ila sogongon tonari itau.