Pas ka Pol sogoe uti la ke osep Rom ina 16 - Aria New Testament

Pol wai oklou itau ke osep Kristen leklou

¹ Ngawai ke umu ke apmang ka lutodo Fibi. Ngawaiki aitno lumu itau ke iye kesua ila bokongon lua Ida Tapolngon ila osep ka tidong ke armok Senkria.

² Ma alo ka iye polou ke umu ngawaiki umolua iye eriar langka Ida Tapolngon waiki ila osep tilua pulu. Elio ane itau lokono kesua iye Ida Puda ila apmang gesa. Oglou iye lua osep pula lokono deka iye lua ngong blang.

³ Umawai “oklou itau” ke gute Akwila orwo esna Prisila. Isak orwo tiboko kap ngong ke Krais Yesus ila bokongon.

⁴ Aitno lisak omba lokono ma tiwaiki tilua ngong. E tiulou tarna lisak ke osep ka tiwaiki timke isak kovok. Aurou. Tilua ngong vala. E ngong kap Ida Tapolngon ila osep ka isak osep Yuda ina kovok imawai aitno limi itau ke isak.

⁵ E umawai “oklou itau” ke osep ka tiduni pulu ke urok ninu. Umawai “oklou itau” ke gute Epainetus. Ngong lana ngong ke iye lokono. Aitno dagar ke Krais mgo ke osep ka tidong ke omur Esia.

⁶ Umawai “oklou itau” ke apmang Maria. Iye due bokongon omba lokono ka lua umu.

⁷ Umawai “oklou itau” ke gute Andronikus orwo gute Junias. Isak lou osua e oglou tidong ke kalabus kap ngong. Isak orwo osep aposel blang e osep pula tile ke isak. E aitno lisak la dagar ke Krais mgo ke ngong.

⁸ Umawai “oklou itau” ke gute Ampliatus. Ngong lana ngong ke iye ke Ida Puda.

⁹ Umawai “oklou itau” ke gute Urbanus. Iye lou aten lokono ke Krais ila bokongon. E umawai “oklou itau” ke gute Stakis blang. E ngong lana ngong ke iye blang.

¹⁰ Umawai “oklou itau” ke gute Apeles. Iye didi Krais itau lokono. E umawai “oklou itau” ke gute Aristobulus gosok ila osua blang.

¹¹ Umawai “oklou itau” ke gute Herodion. Iye dong ke lou osua. E umawai “oklou itau” ke osep ka tidong ke gute Narsisus ila osua. Aitno lisak dagar ke Ida Puda blang.

¹² Umawai “oklou itau” ke apmang Trifina orwo apmang Trifosa. Isak orwo tiboko engil ma tidue Ida Puda ila bokongon. E umawai “oklou itau” ke apmang Persis. Iye lou aten lokono e ngong lana ngong ke iye. Iye boko engil lokono ke Ida Puda ila bokongon.

¹³ Umawai “oklou itau” ke gute Rufus. Iye gute ka due Ida Puda ila bokongon itau. E umawai aitno lungong itau lokono ke tna blang. Iye dong langka iye nina blang.

¹⁴ Umawai “oklou itau” ke gute Asinkritus e gute Flegon e gute Hermes e gute Patrobas. E ke gute Hermas e ke osep Kristen leklou ka tidong kap isak.

¹⁵ Umawai “oklou itau” ke gute Filologus orwo apmang Julia. E ke gute Nereus orwo lutno e ke Olimpas. E ke osep ka Ida Tapolngon ila osep ke tidong kap isak.

¹⁶ E umu ka Ida Tapolngon ila osep umedidi elio ka umesekan pulu e umawai “oklou itau” pulu. E osep ka pula keniye ka tidong ke Krais ila osua tiwai “oklou itau” ke umu.

Umeile umu itau lama osep tipagolgol aitno lumu

¹⁷ Sipmi. Ngawaiki ngawai dagar ke umu langane. Umeile umu itau lama supmu leklou tipagolgol aitno lumu ila dagar ke pelengon yakngan. Kesua tiwaiki urok pelengon yakngan pono aitno lumu ke pelengon ka lokono ka aitno lumu la dagar ine kodong. E umu ma umodong mawa ke osep ka tidue elio langane. Lama urok pelengon ka soulu due aitno lumu ma aitno lumu kene pulu kovok.

¹⁸ Osep tonari tididi Ida Puda Krais ila elio kovok. Aurou. Isak langka wokboi nating ka tididi pampamu lisak vala. E ke urok pelengon ka dikngen e urok pelengon ka timter osep aitno lisak ine tiyakyak osep vala. Kesua tiwaiki ma osep aitno lisak la dagar ke urok pelengon. Deka ma osep ka tile isak itau lokono kovok ma aitno lisak dagar ke urok pelengon.

¹⁹ Umedidi Ida Tapolngon ila pelengon e osep ka pula keniye tiklingen ke lumu elio kodong. E aitno lungong itau lokono ke umu. E ngawaiki ma umeile itau lokono ke elio itau e ma umepli elio soulu.

²⁰ Deka Ida Tapolngon ka due aitno lite tidong epen ma paiavu Satan ma ila arit yagos. Ma iye karanga due elio soulu ke umu kovok. Ma umomole iye vala. E ngawai ke Ida Tapolngon ma Ida Puda Yesus Krais ila makaingan dong ke umu.

²¹ Lou aten Timoti ka boko kap ngong wai “oklou itau” ke umu. E gute Lusius e gute Jeson e gute Sosipater ka lou osua isak tiwai “oklou itau” ke umu.

²² Ngong Tertius e ngasogo Pol ila pas ane. Iye wai ke ngong deka ngasogo ila pelengon. Ke Ida Puda angaine ngawai “oklou itau” ke umu blang.

^23-24 Gute Gaius wai “oklou itau” ke umu. Iye plau ngong itau lokono ke ila ninu. E Ida Tapolngon ila osep ka tiduni pulu ke ila ninu tiwai “oklou itau” ke umu blang. Gute Erastus ka plau mani ke gavman ka dong ke armok ane wai “okou itau” ke umu. E udo aten Kwartus blang wai “oklou itau” ke umu.

Itakakai Ida Tapolngon angaine tito la egim

²⁵ Ma itakakai Ida Tapolngon angaine tito la egim. Kesua iye tona karanga due aitno lite ila dagar kis dagar ke Ida Tapolngon ila omon itau ka la ke Yesus Krais ka nganapapra ine. Oglou ari osep tile omur ke Ida Tapolngon ila omon itau kovok. E eknikane iteile ine kesua Ida Tapolngon lua ite ine.

²⁶ Eknikane Ida Tapolngon ka ila poloungon kovok ila omon itau dong kap ite e iteile ine. Iteile ine kesua osep napaprangan ina tisogo ine deka urok sogongon tonari dong ke ite. Ida Tapolngon due aitno lisak deka tisogo ine ma osep ka pula keniye ka tidong ke omur ka pula keniye talsak klingen ine e aitno lisak karanga la dagar ine.

²⁷ E itakakai Ida Tapolngon ka ile omur ke wan ka pula keniye angaine tito la egim lokono. Itodue langane dong vala dong. Kesua batne ke Yesus Krais dong. Lokono.