Pas ka Pol sogoe uti la ke osep Rom ina 14 - Aria New Testament

Umomulu supmu kovok

¹ Langka gute dong ka aitno dagar ke Krais kodong e dau aitno ila dagar polou dagar lokono kovok umodue sep ke lumu duningen. E ma umotuk opmu pulu kap iye kovok ke pelengon gesa ka aitno lumu kene pulu ine kovok.

² Gute gesa aitno dagar lokono langka ma iye ngen wan bitna bitna. E gute silang aitno ila dagar dau polou dagar kovok deka iye ngen wan langka karunga vala.

³ E gute ka ngen wan ka pula keniye ma aitno soulu kovok ke gute ka ngen ongwa okurne kovok. E gute ka ngen ongwa okurne kovok ma iye wade gute ka ngen wan ka pula keniye kovok. Kesua Ida Tapolngon aitno itau ke iye blang e lua iye.

⁴ Wom sei ma amkaranga amwade gute silang ila osep bokongon ina? Langka tiboko itau koke tiboko sasi gute ka plau isak vala ma wai ine. E Ida Puda vala ma karanga due isak tipolou dagar e ma tidong dagar.

⁵ Silang blang langane. Gute kene aitno mter langka oklou kene omba e mole oklou silang. E gute silang aitno mter langka oklou ka pula keniye isak eriar vala. E osep ka pula keniye ma tile aitno lisak itau. E aitno lisak orwo kovok.

⁶ Gute ka aitno mter oklou kene mole oklou silang due elio langane kesua iye waiki kakai Ida Puda angaine ine. E gute ka ngen wan ka pula keniye aitno la ke Ida Puda deka iye ngene. Kesua iye wai tenkyu ke Ida Tapolngon deka ngene. E gute ka ngen wan ka pula keniye kovok aitno la ke Ida Puda blang deka iye dangdang iye ke ngangon leklou. E iye wai tenkyu ke Ida Tapolngon blang.

^7-8 Ite kente kente itodong ane batne ke ite kente kente kovok. Aurou. Ida Puda vala due ite itodong. Deka itemete batne ke ite kente kente kovok. Aurou. Ma itemete batne ke Ida Puda vala. Langka itodong e langka itemete batne ke ite kente kente kovok. Aurou. Batne dong ke Ida Puda vala.

⁹ E oglou Krais blang mete deka poga tito ke ina denga. E eknikane iye dong langka osep ka pula keniye ka timete kodong Inarak Puda e osep ka tidong dau Inarak Puda blang.

¹⁰ Ina lange amwade lem aten gesa ila elio isuk isuk e amwai soulu ine? E ina lange emtem mluk lem aten gesa? Kesua ite ka pula keniye ma itevri ke Ida Tapolngon bitna ma iye wade udo elio isuk isuk.

¹¹ Kesua Ida Tapolngon ila pelengon wai langane. “Ida Puda wai langane. ‘Ngong kengong ngadong. E mase osep ka pula keniye ma time ke ngong e ma tigrum kamsak ke omtongu. E ma tiwai lang-ane. “Wom Ipem Tapolngon lokono.”’”

¹² Deka mase ite kente kente ma itawai ke Ida Tapolngon ke batne ke udo elio bitna bitna ka itodue.

Iteile ite itau lama udo aten gesa due elio epmes ina batne ke udo elio isuk isuk

¹³ E langane. Ma itawade osep leklou urok elio isuk isuk kovok e aitno lite soulu ke isak kovok. E ma itedidi elio itau vala. Lama itodue elio soulu gesa ka pagolgol udo aten gesa aitno deka iye due elio epmes ina batne ke udo elio ka itodue.

¹⁴ Nganeklep ke Ngau Puda Yesus deka ngaile omur langane. Wan gesa dong ka soulu ke Ida Tapolngon bitna kovok. Langka gute gesa aitno mter langka wan gesa dong soulu wan tonari dong soulu ke iye vala.

¹⁵ E langka emngen wan gesa ka lem aten gesa aitno mter langka wan ari soulu ke Ida Tapolngon bitna deka omdue elio soulu ke iye. E langka omdue langane wom lana wom ke lem aten kovok. Kesua Krais lana iye ke lem aten tonari e mete kodong ma kli ila elio epmes ina. Deka wom lana wom ke lem aten vala e omdue elio soulu ke iye sakam.

¹⁶ E langane. Langka umeile elio gesa ka aitno lumu itau ine ma due lumu aten gesa aitno soulu ma umodue kovok.

¹⁷ Ke omur ka Ida Tapolngon plaue wan ka itangene e wan ka iteinime isak wan omba kovok. Aurou. E elio ka itau e osuk e elio ka aitno lite epen pulu e elio ka aitno lite neser ke Ano Itau isak wan ka omba lokono.

¹⁸ E gute ka didi Krais ila elio tonari ma Ida Tapolngon aitno itau ke ila elio e ma osep pula aitno lisak itau ke iye blang.

¹⁹ Ma itedidi elio bitna bitna ka due aitno lite epen pulu e elio isuk isuk ka ma due aitno lite ila dagar polou dagar lokono.

²⁰ Aitno lugom vri ke ngap ngangon vala kovok. E omdue agegeng ke Ida Tapolngon ila bokongon kovok. Iteile wan ka pula keniye itau e itakaranga itangene. E langka emngen wan gesa ka due lem aten gesa due elio epmes ina omdue elio soulu.

²¹ Langka emngen ongwa okurne koke eminim aki galou wain koke omdue wan silang e lem elio tonari due lem aten gesa due elio epmes ina are itau kovok. E wan ka itau ma omdue elio langane kovok.

²² Wan ka aitno lumu ila dagar mter ine are dong ke umu kenmu kenmu e ke Ida Tapolngon vala. Langka gute gesa aitno mter langka wan gesa itau e iye kene mulu iye tona ine kovok deka are aitno itau ine.

²³ Langka gute ngen ongwa okurne alo ka aitno orwo ke elio ka iye due ane langka iye mulu iye ine. Kesua iye didi aitno ila dagar ine kovok. Langka itodue elio gesa ka didi aitno lite ila dagar kovok are langka itodue elio epmes ina.