Pas ka Pol sogoe uti la ke osep Rom ina 12 - Aria New Testament

Ma itakar pampamu lite ke Ida Tapolngon

¹ Sipmi. Ida Tapolngon aitno due ite kodong deka ngawai dagar ke umu langane. Ma umakar pampamu lumu ke Ida Tapolngon langka wan ka ila wan. Alo ka umu dau umodong ma umodong langka Ida Tapolngon ila osep ka itau lokono ma umodue elio itau ka Ida Tapolngon aitno itau ine. Umodue langane deka elio ka langane langka aitno lumu la dagar ke Ida Tapolngon vala.

² E umakana elio bitna bitna ka osep taklak ina tidue sakam. Umosongon Ida Tapolngon ma iye due aitno lumu tilumus tipolou oku. Alo ka aitno lumu tilumus tipolou oku ma umeile lokono ke Ida Tapolngon aitno. E ma umeile ke elio ka itau ka Ida Tapolngon aitno itau ine e ka wan gesa mole kovok.

³ Ida Tapolngon makai ngong deka ngakar umu kenmu kenmu pelengon dagar ane. Aitno lumu mter langka angainmu omba e lumu elio mole osep leklou urok elio sakam. Aurou. Ma umawade lumu elio isuk isuk itau. Umedidi aitno lumu ila dagar ka Ida Tapolngon lua umu ine e umawade umu kenmu kenmu lumu elio ine.

⁴ Iteile pampamu lite kene e dau ongwa ine pula. Langka pampamu lite kene ongwa ine kene kene dong e urok elio eriar kovok.

⁵ E ite pula itodong langka Krais pampamu ine ka kene vala. E iteneklep pulu langka ite kente kente Krais pampamu ine ongwaine kene kene.

⁶ Ke Ida Tapolngon ila makaingan iye kar udo kerengen bitna bitna ke ite kente kente. Ma itoboko ine karanga ke aitno lite ila dagar. E langka Ida Tapolngon kar gute gesa ila bokongon ka iye napapra ila pelengon ma iye napapra ine karanga ke aitno ila dagar ka Ida Tapolngon kare ke iye.

⁷ Langka gute gesa ila bokongon langka iye lua osep ka Ida Tapolngon ila osep ma iye boko dagar ine. Langka gute gesa ila bokongon langka iye parere osep ma iye boko dagar ine.

⁸ Langka gute gesa ila bokongon langka iye kar osep leklou pelengon ka due aitno lisak tipolou dagar lokono e tile omur lokono Ida Tapolngon waiki ma iye boko dagar ine. E gute ka lua osep leklou ka urok wan isuk boto vala ma iye due langane aling aling. E gute ka mgo ke osep Kristen leklou ma iye boko dagar ine. E gute ka aitno due osep leklou e lua isak Ida Tapolngon waiki ma aitno neser ine.

Ite lana ite ke osep Kristen

⁹ Umu lana umu ke osep leklou e umayak ine sakam. Ma aitno lumu itau lokono ke isak. E ma umekis dagar ke elio ka itau vala e umopul dogur ke elio soulu bitna bitna.

¹⁰ Ma umu lana umu lokono ke osep ka Ida Tapolngon ila osep kesua lumu osua kene vala. E umakakai supmu angainsak e umodue anit pulu.

¹¹ Ma umoboko dagar aling aling e umodue ropo sakam. Aitno lumu orwo ke Ida Puda ila bokongon sakam. Aitno lumu kene ine e umoboko dagar ine vala.

¹² Umapara ke Ida Puda ma iye lua umu ke wan bitna bitna e ma aitno lumu itau lokono ine. E langka elio soulu polou ke umu ma umevri dagar ine. E aling aling ma umawai itau ke Ida Tapolngon.

¹³ Langka Ida Tapolngon ila osep leklou urok wan isuk boto vala deka umolua isak. E langka osep kaulei time tipolou ke umu deka umekere isak itau.

¹⁴ Langka osep tidue elio soulu ke umu ma umepmi Ida Tapolngon ma iye lua isak e due mada ke isak. Umepmi Ida Tapolngon ma iye lua isak e umepmi iye ma iye due agegeng ke isak sakam.

¹⁵ Ma umeketir kap osep ka tiketir ke wan gesa. E ma umekngis kap osep ka tikngis ke wan gesa.

¹⁶ Ma aitno lumu kene pulu. E ma aitno lumu vri ke umu vala kovok. Umepli osep ka angainsak omba kovok sakam. E aitno lumu itau ke isak vala. Ma umakakai umu tona angainmu kovok lama aitno lumu mter umu osep ka umeile omur ine.

¹⁷ Langka osep tidue elio soulu ke umu umokoli urok elio soulu batne kovok. Aling aling aitno lumu mter ma umodue elio ka osep pula aitno lisak mter isak elio itau.

¹⁸ Aitno lumu epen pulu. Langka aitno lumu langane ma umodong itau pulu.

¹⁹ Sipmi. Umu tona umokoli batne ke elio soulu ka osep tidue ke umu sakam. E umosongon Ida Tapolngon ma iye koli batne. Umeile Ida Puda ila pelengon ka wai langane. “Ngong vala ma ngakoli urok elio soulu batne ma tinamani ine.”

²⁰ Ida Tapolngon wai blang lang-ane. “Langka sapanga due ngap oul deka amkar iye nga-ngon. E langka aki vel iye deka ma amkar iye aki. Langka omdue langane lem elio itau ma mnak iye ke ila elio soulu.”

²¹ E amdangdang elio soulu ke wom lama elio soulu mole wom. E omdue elio ka itau vala ma elio ka itau mole elio ka soulu.