Pas ka Pol sogoe uti la ke osep Rom ina 10 - Aria New Testament

Osep Israel ina tididi Moses ila sogongon itau kovok

¹ Sipmi. Ke aitno lungong ngawaiki Ida Tapolngon lua lou osua ka osep Israel ina ke urok elio epmes ina. Deka ngapmi Ida Tapolngon ine ma iye lua isak.

² Ngaile omur osep Israel ina tiwaiki tidue wan ka Ida Tapolngon waiki tidue e dau tile omur itau ke wan ka Ida Tapolngon waiki tidue kovok.

³ E tididi aitno lisak ka tiwaiki due isak tipolou itau e osuk ke Ida Tapolngon bitna. E isak tile omur ke elio ka Ida Tapolngon due isak tipolou itau e osuk ke bitna kovok. E tididi elio tonari itau lokono kovok.

⁴ Krais polou ke ite kodong deka ari iye due Moses ila sogongon ka oglou plau ite ila arit polou yagos. Deka plau ite kovok. E Ida Tapolngon due osep ka aitno lisak dagar ke Krais tipolou itau e osuk ke bitna.

⁵ Oglou Moses sogo langane. “Osep ka tiwaiki tipolou itau e osuk ke Ida Tapolngon bitna kesua batne tididi lou sogongon ma tididi sogongon tonari vala.”

⁶ E Ida Tapolngon ila pelengon wai itopolou itau e osuk ke bitna kesua aitno lite ila dagar la dagar ke iye. Deka lange? Ma itawai ke aitno lite langane kovok. “Sei ma tito ke omur heven e due Krais duru polou ke ite?”

⁷ Koke itawai langane blang kovok. “Sei ma duru ke taklak aitno e due Krais poga tito ke ina denga?” Aurou. Ma itawai ke aitno lite langane kovok.

⁸ Kesua osep ka tisogo Ida Tapolngon ila pelengon tisogo langane. “Ida Tapolngon ila pelengon ka due aitno lite ila dagar la dagar ke iye dong mawa ke ite kovok. Aurou. Itawai ine e iye dong ke aitno lite blang.” E pelengon ka imanapapra ine pelengon tonari.

⁹ ­Deka imanapapra langane. Umu kenmu kenmu umapalongo aitno lumu ke osep. Umapalongo urok aitno lumu dagar ke Upu Puda Yesus e aitno lumu dagar ke elio ka Ida Tapolngon due Yesus poga tito ke ina denga kodong. E ma Ida Tapolngon lua umu kenmu kenmu ke lumu elio epmes ina.

¹⁰ Kesua langka aitno lite la dagar ke Ida Luangan Yesus Ida Tapolngon ma due ite itopolou itau e osuk ke bitna. Deka itapalongo osep ke Ida Luangan Yesus e Ida Tapolngon lua ite ke udo elio epmes ina.

¹¹ Ida Tapolngon ila pelengon wai osep keniye ka aitno lisak dagar ke Inarak Luangan Yesus ma isak mnak isak ine kovok.

¹² Pelengon ane la ke osep Yuda ina e ke osep ka isak osep Yuda ina kovok blang. Kesua osep keniye tonari Inarak Puda kene ka kere osep keniye itau ka tiwai itau ke iye.

¹³ Ida Tapolngon ila pelengon wai langane. “Osep keniye ka tipmi iye ke urok elio epmes ina kesua batne ke Ida Puda dong ma iye lua isak ine.”

¹⁴ E osep ka aitno lisak dagar ke Ida Tapolngon ila pelengon kovok ma tipmi Ida Puda ine kovok. E silang blang langane. Osep ka tile Ida Tapolngon ila pelengon kovok ma aitno lisak karanga la dagar ine kovok. Langka osep tinapapra Ida Tapolngon ila pelengon ke isak kovok ma tidue lange ma tile ine?

¹⁵ E langka Ida Tapolngon pagei osep napaprangan ina ke osep tonari kovok ma tidue sua e tinapapra ila pelengon ke osep tonari? Osep ka tisogo Ida Tapolngon ila pelengon tisogo langane. “Osep ka tipaur Ida Tapol-ngon ila omon itau ke osep leklou urok elio itau lokono.”

Osep Israel ina tipli Ida Tapolngon ila omon itau

¹⁶ Osep Israel ina leklou aitno lisak dagar ke Ida Tapolngon ila omon itau kovok. Elio ane eriar langka oglou Aisaia sogo ine langane. “Ngau Puda osep seisei tidong ka aitno lisak dagar ke pelengon ka imanapapra ine?”

¹⁷ Osep ka aitno lisak la dagar ke Ida Tapolngon ila pelengon ka la ke Krais tiklingen ine mgo. Tiklingen ine e aitno lisak la dagar ine.

¹⁸ E ngapmi umu langane. Osep ka aitno lisak dagar ke Ida Tapolngon ila pelengon kovok tile ine koke aurou? Osep tonari tile ine kodong eriar langka Ida Tapolngon ila pelengon wai ine. Ila pelengon wai langane. “Osep napaprangan ina urok pelengon la ke omur ka pula keniye. Omur gesa dong kovok ka urok pelengon polou ine kovok.”

¹⁹ Deka ngapmi umu langane. Osep Israel ina tile Ida Tapolngon ila pelengon tonari kovok? Aurou. Isak tile ine. Elio ane eriar langka oglou Moses sogo Ida Tapolngon ila pelengon ka wai langane. “Ma ngadue osep Israel ina aitno lisak rim ke osep leklou blang. Ma ngadue osep Israel ina aitno lisak engil batne osep leklou blang ka oglou aitno lisak kaka.”

²⁰ Aisaia palongo osep Israel ina ke Ida Tapolngon ila pelengon ka wai langane. “Osep leklou ka tikrim ke ngong kovok isak tipado ngong kodong. E osep leklou ka tipmi isak pulu ke ngong kovok ngapolou ke isak kodong.”

²¹ E iye wai blang langane. “Ida Tapolngon wai ke osep Israel ina langane. ‘Oglou kodong ngawaiki aitno lite epen pulu e dau umopul dogur ke ngong e talapmu klingen lou pelengon kovok.’”