Pelengon kukwopngon 1 - Aria New Testament

¹ Pelengon ka oglou dong kukwop eknikane Yesus Krais due polou malak. Ida Tapolngon palongo pelengon tonari ke Yesus ma iye palongo ila osep wokboi nating ke wansua ka ma polou. Deka Yesus pagei ila ensel gesa me kar pelengon tonari ke ngong Jon ka ngong ila wokboi nating.

² E ngawai ke Yesus ila osep leklou. E ngavati wan tonari deka ngawai malak ke Ida Tapolngon ila pelengon e ke Yesus Krais ila pelengon. Ngawai langane. Pelengon ane lokono.

³ Deka gute ka ritim pelengon ane ke osep leklou ma aitno itau itau. E osep ka tididi pelengon tonari ka tiklingen ine ma aitno lisak itau itau blang. Kesua isuk boto wan ka pula keniye ka Ida Tapolngon waiki polou ma polou.

Jon sogo pas uti la ke sios lumorwo

⁴ E ngong Jon ngasogo pele-ngon ane uti ke umu ka pula keniye ka umodong ke sios lumorwo ka tidong ke provins Esia. Ida Tapolngon ka oglou iye dong kodong e eknikane iye dong e mase ma iye dong blang makai umu e due aitno lumu dong epen. E ano lumorwo ka dong ke Ida Tapolngon ila kova bitna timakai umu e tidue aitno lumu dong epen blang.

⁵ E makaingan blang me ke Yesus Krais ka iye palongo udo malak ke ila pelengon ka lokono lokono. Iye mgo ke osep ka pula keniye ka timole inarak denga e tipoga titito blang. E iye gute ka mgo ke osep ka tivri mgo ke omur omur ke taklak ane. Iye lana iye ke ite e ina marau klok udo elio epmes ina la.

⁶ E iye rere ite ila osep ite e due ite itopolou langka osep loulou ina e itodong langka osep loulou ina ke Ida Tapolngon ka Pmada. Aling aling itakakai angaine tito la egim. E ila arit omba lokono e iye plau wan ka pula keniye. Lokono.

⁷ E umoklingen. Yesus dong airavu ke gaup e iye me e osep ka pula keniye ma tivati iye. E osep ka timter iye isak blang ma tivati iye. Deka osep ka pula keniye ka tidong ke taklak ma tikngis omba ine. Elio ane ma polou suong. Lokono.

⁸ Ida Tapolngon ka Pmada ka ila arit ombatno lokono wai langane. “Ngadong mgongon lo-kono e ngadong batne lokono. E oglou kodong ngadong e eknikane ngadong e mase ma ngadong blang.”

Jon vati Krais

⁹ Ngong Jon e ngong ngagosok umu itodong ke Yesus ila osua. Agegeng ka polou ke umu polou ke ngong blang kesua ngadong langka umu e itodong dagar ke elio ka opru ite. Nganapapra Ida Tapolngon ila pelengon e ngawai pelengon lokono ka la ke Yesus. Deka osep tisapir ngong e tidue ngong ngadong ke aidunu ka angaine Patmos.

¹⁰ Tisapir ngong ngadong ke aidunu Patmos deka ke oklou gesa ka Ida Tapolngon ila osep tiduni pulu ine Ano Itau polou dagar ke ngong e ke dogur ngong ngaklingen gute kreine wai dagar langka kuliep wai.

¹¹ Gute tonari wai langane. “Wan ka pula keniye ka amvati omsogoe ke pas e ampagei la ke sios lumorwo. Ampagei la ke sios ka dong ke armok Efesus e ke armok Smerna e ke armok Pergamum e ke armok Taiataira e ke armok Sardis e ke armok Filadelfia e ke armok Laodisia.”

¹² Ngaklingen kreine deka ngabauluk ma ngavati gute ka wai ke ngong. Ngabauluk deka ngavati wan lumorwo vri ka lam dong ine ka tidue ke gol.

¹³ E ngavati gute dong airavu ke wan lumorwo tonari. Iye langka itosep e iye tnei molo ka alang ka kading damaine la iding ke kamla. E iye pou let gol lelei nopok ke omun ine.

¹⁴ E apna elilo okou lokono langka sipsip tarna elilo koke gaup ka okou lokono. E bitna bublo omba langka eiou.

¹⁵ E kamla bublo langka bras ka tikamlue ke eiou omba deka wan sasi dong ine kovok. E ngaklingen kreine langka aki nosur omba.

¹⁶ E iye kis gigimo lumorwo ke limla odung. E elil ka ene orwo ka ene lokono dong ke ene e polou. E baraine bublo omba lokono langka oklou bublo ke oklou airavu.

¹⁷ Ngavati iye deka ngagene ngaduru ngamunu olwo boto ke kamla. Ngamunu langka gute ka mete kodong. Deka iye due limla odung duru kai ngong e wai langane. “Aitno lugom nesik sakam. Ngong gute ka oglou kodong ngadong e mase ma ngadong blang.

¹⁸ E ngong gute ka mosongon itau batne. Ke oglou ngamete e eknikane ngadong vala ngadong. E lou arit dong e ngaplau osep ka timete kodong e ngaplau omur ka osep ansak tidong ine.

¹⁹ E omsogo wan bitna bitna ka amvati. Wan ka tidong ke eknikane e wan ka mase ma tipolou.

²⁰ E amvati gigimo lumorwo ka tidong ke lungu odung e wan lumorwo ka lam tidong ine ka tidue ke gol. Wan tonari isak langka pelengon ka kukwop e lana ine langane. Wan lumorwo ka lam tidong ine isak sios ka tidong ke armok lumorwo e gigimo lumorwo isak ensel lumorwo ka tiplau sios lumorwo tonari.”