Pas ka Jut sogoe 1 - Aria New Testament

¹ Ngong Jut e ngong Yesus Krais ila wokboi nating e ngong Jems ina aiver. Ngasogo pas ane uti ke umu ka Ida Tapolngon rere umu ila osep umu. Ngaile Ida Tapolngon ka Pmada lana iye ke umu e Yesus Krais plau umu itau.

² Ngawaiki Ida Tapolngon aitno due umu e due aitno lumu epen e due elio ka umu lana umu ke osep pula dong kap umu.

Osep parerengen yakngan ina tisep ke sios

³ Sipmi ka ngong lana ngong ke umu. Ke mgongon aitno lungong mter langka ngasogo pas ke umu ka wai ke elio ka Ida Tapolngon lua ite ke udo elio epmes ina. E eknikane aitno lungong mter ma ngasogo pelengon silang ke umu ka langane. Ida Tapolngon kar ila pelengon ke ite ka ila osep deka aitno lite la dagar ine deka ngawaiki umoboko engil ma aitno lumu ila dagar dong dagar. E ngawaiki umopul dogur ke osep ka tiwai pelengon leklou ke umu. Kesua Ida Tapolngon kar ila pelengon ke ite aling kene e ila pelengon segesege kovok.

⁴ E oku ane osep yakngan ina leklou tisep ke sios. Ke oglou kodong Ida Tapolngon wai ke isak ma tikluk ke omur hel. Osep tonari tipul dogur ke Ida Tapolngon e tiwaiki tipalele ila makaingan deka tiwai langane. “Langka itodue elio epmes ina bitna bitna are wan gesa kovok kesua Ida Tapolngon ma makai ite.” Tiwai langane e tipul dogur ke Ida Puda Yesus Krais ka iye Ida Plaungan.

⁵ Umeile pelengon ane kodong e dau ngawaiki ngasruk aitno lumu ma umeile omur ine lokono. Oglou Ida Puda lua osep Yuda ina ma tisongon omur Isip kla. E osep tonari leklou aitno lisak dagar ke Ida Tapolngon kovok deka iye mluk isak e timete.

⁶ E ngawai ke ensel blang ka oglou tipul dogur ke bokongon ka Ida Tapolngon kare ke isak e tisongon omur ka iye rere ke isak. Deka Ida Tapolngon pou isak ke sen ka dong vala dong. Iye pou isak deka tidong ke omur ka aivoro e tidong tipara ke oklou ka Ida Tapolngon ma wade urok elio ine.

⁷ E silang blang ngawai ke osep ke armok Sodom e armok Gomora kap osep ke armok armok ka lelei armok orwo tonari. Tidue okwa e tidue elio soulu bitna bitna leklou blang ka soulu lokono. Osep tonari tinis ite ke osep ka Ida Tapolngon wade isak ke eiou ka dong vala dong.

⁸ Osep yakngan ina ka tisep ke sios timunu kudung ansak deka elio ka ansak ina sruk aitno lisak. Isak langka osep tonari. Deka tidue elio soulu lokono ke pampamu lisak e tipul dogur ke Ida Tapolngon ma iye plau isak kovok e tiwai soulu ke ensel ka tidong ke omur heven.

⁹ E ensel ka urok arit omba tiwai soulu langane kovok. Alo ka Ida Tapolngon ila ensel ka mgongon ina kene ka angaine Maikel para pulu kap Satan ke Moses pampamu ine iye wai soulu ke Satan kovok. Aurou. Iye wai langane. “Ngau Puda ma wai dagar ke wom.”

¹⁰ E osep tonari tiwai soulu ke wan bitna bitna ka tile omur ine kovok. E isak langka ongwa ka tile omur kovok e tididi pampamu lisak vala. E urok elio tonari ma due agegeng ke isak.

¹¹ Aisudo. Isak ma tidong soulu va. E tikana elio ka oglou gute Kein due. E aitno lisak la ke mani langka oglou gute Balam aitno la ke mani deka tidue elio bitna bitna ma tidue mani ine. E tipul dogur ke Ida Tapolngon langka oglou gute Kora pul dogur ke Ida Tapolngon. Deka ke elio tonari Ida Tapolngon due agegeng ke isak e timete ine.

¹² Ngaile aling leklou umu ka Ida Tapolngon ila osep umoduni pulu ma umangen ngangon kesua umu lana umu pulu. E osep yakngan ina tonari tisep tidong kap umu blang. E isak tidong langka wan ka amum ka soulu lokono ke lumu duningen. Aitno lisak mter ke urok elio soulu kovok e aitno lisak mter ke isak tona vala. Isak langka gaup ke erei aitno ka aragu dong ine kovok e engen ipu isak kla suong. E silang isak langka akai ka tiusu otna kovok e osep tiblou isak tiduru ke taklak e tipi gigitno ke taklak. Osep soulu bitna tonari isak langka timete aling orwo kodong.

¹³ E isak langka misuon ina boitini ka omba. Tidue elio soulu e isak mnak isak ke urok elio kovok. E isak langka misuon ina boitini omba ka nokul nokul e buswok polou. E silang blang isak langka gigimo ka kla ulik ulik ke sirva. Deka Ida Tapolngon rere isak ma tidong ke omur ka aivoro lokono dong vala dong.

¹⁴ Oglou gute Enok ka Adam ila napakngan lumorwo ina dong e iye napapra ke osep ke wan tonari langane. “Umoklingen. Ngavati Ida Puda me kap ila ensel ka pula pula lokono.

¹⁵ Iye me ma iye wade osep soulu bitna ka pula keniye ke urok elio soulu ka tidue. Iye ma wade isak ke urok elio soulu ka tipul dogur ke Ida Tapolngon e ke urok pelengon soulu ka tiluk Ida Tapolngon ine.”

¹⁶ Tingurngur e aitno lisak soulu ke wan bitna bitna ka polou ke isak. E tididi aitno lisak e tidue elio soulu. Tikakai isak tona angainsak e tiwai dikngen ke osep ma tidue wan bitna bitna ke isak.

Ite arit ite ma aitno lite polou dagar lokono

¹⁷ Sipmi. Ngawaiki omtomu sisir pelengon ka Ida Puda Yesus Krais ila aposel tiwai mase ma polou.

¹⁸ Tiwai ke umu langane. “Mase alo ka isuk boto wan keniye yagos osep ma tipolou e tidue apok ke umu. Ma tipul dogur ke Ida Tapolngon e tididi aitno lisak ke elio soulu vala.”

¹⁹ E tiwaiki tidue umu ka Ida Tapolngon ila osep ma umadardar. Tididi osep taklak ina aitno lisak vala e Ano Itau dong ke aitno lisak kovok.

²⁰ Sipmi. Aitno lumu la dagar ke Ida Tapolngon kodong e ngawaiki aitno lumu ila dagar res polou dagar lokono. E Ano Itau dong ke aitno lumu e ngawaiki umawai itau ke Ida Tapolngon ke Ano Itau ila arit.

²¹ Ida Tapolngon lana iye ke umu e ngawaiki aling aling aitno lumu mter ine. E umapara ke alo ka Ida Puda Yesus Krais aitno due umu e kar lumu mosongon ka dong vala dong ke umu.

²² Osep leklou aitno lisak ila dagar dau dagar kovok e aitno lisak orwo ine. Ngawaiki aitno lumu due isak e umolua isak.

²³ E osep leklou tidong langka isuk boto eiou ngen isak. Deka umolua isak suong langka umepi isak ke eiou. E aitno lumu due osep leklou e dau umoulou tarna lumu ke urok elio soulu. Aitno lumu engil ke urok elio soulu ka langka klos ka amum e amna sasi lokono.

Itakakai Ida Tapolngon angaine tito la egim

²⁴ Ida Tapolngon karanga plau umu itau e lua umu ma umegene ke elio epmes ina kovok. E iye karanga due umu umala ke ila omur ka itau itau lokono e elio gesa vri ke umu kovok. Deka aitno lumu neser omba.

²⁵ Ida Tapolngon ka Ida Luangan kene vala dong e lua ite ke udo elio epmes ina batne ke Ida Puda Yesus Krais. Ma itakakai angaine tito la egim. Iye Ida Plaungan ina e ila arit ombatno deka wan ka pula keniye dong moli ke iye. Oglou oglou ari iye dong e eknikane iye dong blang deka mase ma iye dong vala dong blang. Lokono.