Matyu 5 - Aria New Testament

Yesus wai pelengon ke gigri

¹ Yesus vati osep pula pula tididi iye deka iye tito ke gigri e duru dong ine. Iye duru dong deka ila disaipel tipolou ke iye.

² E iye nogrum parere isak langane.

³ “Osep ka urok wan ka aitno lisak ila dagar ina isuk boto vala aitno lisak itau itau kesua wan ka omur heven ka Ida Tapolngon plaue ma polou urok wan.

⁴ “Osep ka tikngis aitno lisak itau itau kesua Ida Tapolngon ma due aitno lisak tidong itau blang.

⁵ “Osep ka urok elio molil molil aitno lisak itau itau kesua Ida Tapolngon ma kar wan ka taklak ane ina ke isak.

⁶ “Osep ka isak arit isak ma tidue elio ka osuk vala ke Ida Tapol-ngon bitna aitno lisak itau itau kesua ma tigot ke Ida Tapolngon ila wan.

⁷ “Osep ka aitno lisak due osep leklou aitno lisak itau itau kesua ma Ida Tapolngon aitno due isak blang.

⁸ “Osep ka aitno lisak la ke Ida Tapolngon vala aitno lisak itau itau kesua ma tivati Ida Tapolngon.

⁹ “Osep ka tidue osep leklou aitno lisak tipolou epen pulu aitno lisak itau itau kesua ma osep tisir isak Ida Tapolngon titno.

¹⁰ “Osep ka osep leklou tidue agegeng ke isak kesua tididi elio itau vala ke Ida Tapolngon bitna aitno lisak itau itau kesua omur heven ka Ida Tapolngon plaue urok omur.

¹¹ “Alo ka osep tiwai soulu ke umu e tiwai pelengon soulu ka yakngan ke umu e tidue agegeng ke umu kesua umu lou osep aitno lumu itau itau.

¹² Aitno lumu neser e aitno lumu itau ine kesua ma umodue wan ka itau ke omur heven. Kesua oglou osep tidue elio soulu langane blang ke osep napaprangan ina ka tidong mgo ke umu.”

Ite langka sol e lam

¹³ “Umu langka sol ke osep ka tidong ke taklak. E langka sol galo kovok lange ma itodue sol tonari polou galo blang? Aurou. Iye itau ke wan gesa kovok e ma itouri ke taklak e osep tilila e tipese ke kamsak.

¹⁴ E umu langka bublongon ke osep taklak ina. Osep tikaranga tikukwop armok ka dong ke gigri kovok.

¹⁵ E silang osep tibik lam e tikadinge ke gimare kovok. Aurou. Tidue sep ke wan ka lam dong ine e bublo ma osep ka tidong ke ninu tikaranga tivati malak.

¹⁶ Umobublo langka lam ma osep tikaranga tivati lumu elio itau e tikakai Pmomu ka dong ke omur heven angaine.”

Ida Tapolngon ila pelengon

¹⁷ “Aitno lumu mter langka ngame ma ngadue Moses ila sogongon e osep napaprangna ina urok sogongon polou yagos kovok. Aurou. Ngame ma ngadue isak tipolou yagos kovok. Ngame ma ngadue isak tipolou lokono.

¹⁸ Ngawai lokono ke umu langane. Lama taklak e sirva isak yagos leta kene koke leta emkil kene ke Moses ila sogongon ma polou yagos kovok la lama sogongon tonari polou lokono.

¹⁹ Langka gute aitno mter sogongon palma ke Moses ila sogongon iye wan gesa kovok e parere osep leklou ma aitno lisak mter langane blang ma gute tonari angaine daudeng lokono ke omur heven ka Ida Tapolngon plaue. E gute ka didi Moses ila sogongon e parere osep leklou tididie blang ma angaine omba ke omur ka Ida Tapolngon plaue.

²⁰ Ngawai lokono ke umu langane. Langka lumu elio itau ke Ida Tapolngon bitna e mole osep Farisi ina e osep ka tile itau ke Moses ila sogongon urok elio kovok ma umesep ke omur heven ka Ida Tapolngon plaue kovok.”

Yesus wai ke elio ka osep timosi urok pelengon

²¹ “Umoklingen kodong osep tiwai ke osep ka tidong oglou ari langane. ‘Umodue burwa kovok. E gute ka due burwa iye vri ke kot bitna.’

²² E eknikane ngawai ke umu langane. Langka gute aitno engil ke ila aten ma iye vri ke kot bitna. E langka gute wai pelengon soulu ke ila aten iye ma vri ke kaunsil bitna. E langka gute wai ke ila aten iye manga manga ma iye la ke omur hel ka eiou dong ine.

^23-24 E langka umawaiki umodue elio opmu ina e aitno lumu mter lumu aten aitno soulu ke umu umosongon wan ka umodue elio opmu ina ine e umala ke gute tonari e umodue aitno lumu epen pulu. Deka umeiding e umodue elio opmu ina.

²⁵ Langka gute waiki kotim umu suong umoboko ma iye polou lumu aten lama alo ka umopolou ke kot bitna iye sin pelengon ke umu e jas vai umu ke polis e isak tiuri umu ke kalabus.

²⁶ Ngawai lokono ke umu langane. Ma umodong ke kalabus la lama umekli lumu elio soulu keniye yagos.”

Yesus wai ke elio okwa

²⁷ “Umoklingen oglou osep tiwai langane. ‘Umodue okwa kovok.’

²⁸ E eknikane ngawai ke umu langane. Langka gute palem apmang e aitno mter iye waiki due elio kap iye deka iye due okwa kap apmang ke aitno kodong.

²⁹ E langka omtomu odung due umu umodue elio epmes ina deka umepie e umourie ke umu. Kesua are itau langka ongwa lumu kene dong kovok lama ongwa lumu keniye la ke omur hel.

³⁰ E langka lupmu odung due umu umodue elio epmes ina deka umobloue e umourie ke umu. Kesua langka ongwa lumu kene dong kovok are itau lama ongwa lumu keniye la ke omur hel.

Yesus wai ke elio ka osep tidar gingen

³¹ “E silang oglou tiwai lang-ane. ‘Langka gute waiki sapir esna ma iye sogo pepa ka dar gingen e kare ke iye.’

³² E oku ane ngawai ke umu langane. Langka gute esna due okwa kovok e dau gute dar urok gingen iye due esna polou apmang ka due okwa. E langka gute silang gi apmang tonari iye due okwa blang.”

Yesus wai ma osep tiwai urok pelengon lokono batne ke wan silang kovok

³³ “E silang umoklingen oglou osep tiwai langane. ‘Umawai promis deka umadare kovok. Aurou. Umawai promis ke Ida Puda deka umedidie vala.’

³⁴ E eknikane ngawai ke umu langane. Umawai promis kovok. Umawai promis batne ke omur heven kovok kesua omur heven Ida Tapolngon ila omur.

³⁵ E umawai promis batne ke taklak kovok kesua taklak wan ka Ida Tapolngon due kamla timunu ine. E umawai promis batne ke Jerusalem kovok kesua Jerusalem gute omba ka vri mgo ke ite ila armok.

³⁶ E umawai promis batne ke otuk lumu kovok kesua umakaranga umodue otuk lumu elilo kene polou ovor koke okou kovok.

³⁷ E alo ka umawai io umawai ‘Ee’ koke ‘Aurou’ vala. E langka umawai pelengon silang io pelengon tonari batne ke Satan.”

Itokoli elio soulu ka osep tidue ke ite kovok

³⁸ “Umoklingen oglou osep tiwai langane. ‘Langka gute pi gute silang bitna umepi gute tonari bitna blang. E langka gute pi gute silang ene erine umepi gute tonari ene erine blang.’

³⁹ E eknikane ngawai ke umu langane. Langka gute waiki due elio soulu ke umu deka umadangdang iye ine kovok. E langka gute mluk umu ke banga lumu odung umabauluk ma iye karanga mluk umu ke banga lumu gala blang.

⁴⁰ E langka gute waiki kotim umu e due lumu siot io umosongon iye ma iye due lumu kolsinglis blang.

⁴¹ E langka gute waiki pagei umu ma umakalke wan ke kilomita kene io umakalke ke kilomita orwo.

⁴² Langka gute pmi umu ma umakar iye wan bitna bitna io umakare ke iye e silang umawai ‘aurou’ ke gute ka waiki dinau ke wan ke umu kovok.”

Ite lana ite ke osep ka aitno lisak soulu ke ite

⁴³ “Umoklingen oglou osep tiwai langane. ‘Umu lana umu ke gute ka dong olwo boto ke umu e aitno lumu soulu ke upu oul.’

⁴⁴ E eknikane ngawai ke umu langane. Umu lana umu ke upu oul e umawai itau ke Ida Tapolngon ke osep ka tidue agegeng ke umu.

⁴⁵ Umodue langane ma umodong Pmomu ka dong ke omur heven titno umu. Kesua iye due oklou tito ke osep ka itau e osep ka soulu e iye due aragu duru ke osep ka tidong itau ke bitna e ke osep ka tidong itau ke bitna kovok.

⁴⁶ Langka umu lana umu ke osep ka isak lana isak ke umu vala ina lange ma umodue wan ka itau ke Ida Tapolngon? Osep ka tidue takis ke osep tidue langane blang.

⁴⁷ E langka umawai ‘oklou itau’ ke lumu saten vala umodue elio langka osep leklou tidue vala. Osep ka isak osep Yuda ina kovok tidue langane blang.

⁴⁸ E umodue elio ka itau vala kesua Pmomu ka dong ke omur heven due elio ka itau vala.”