Matyu 4 - Aria New Testament

Satan tok Yesus

¹ E Ano Itau mgo ke Yesus ke omur ka dong adai vala ma Satan tok iye.

² Yesus dong oklou epmes isapanal e ngen ngangon kovok e sapanga due.

³ E gute tonari ka waiki tok iye me wai ke iye langane. “Langka wom Ida Tapolngon Otno Arang amwai ke opmu ane ma tipolou bret.”

⁴ E Yesus koli wai langane. “Gute sogo Ida Tapolngon ila pelengon palma langane. ‘Osep tidong e tidue urok mosongon ke bret vala kovok. Aurou. Ida Tapol-ngon ila pelengon ma kar urok mosongon ke isak.’”

⁵ Deka Satan paur iye la ke Jerusalem e due dong ke Ida Tapolngon ila ninu tona ka egim lokono.

⁶ E wai langane. “Langka wom Ida Tapolngon Otno Arang omkopiuk omduru kesua gute sogo Ida Tapolngon ila pelengon palma langane. ‘Iye wai ke ila ensel ma tiplau wom.’ E pelengon palma silang langane. ‘Ma tikalke wom ke limsak ma kevep napar ke opmu kovok.’”

⁷ E Yesus koli wai langane. “E gute silang sogo pelengon palma langane. ‘Ma omtok Ngap Puda ka Ngap Tapolngon kovok.’”

⁸ Deka Satan paur Yesus ke gigri ka tito lokono e nis iye ke omur ka pula keniye ke taklak e nis iye ke wan ka itau lokono ka tidong ke omur tonari.

⁹ E Satan wai langane. “Ma ngakar wan ka pula keniye ka amvati ke wom langka omgrum kevep e omlotuim ngong.”

¹⁰ Deka Yesus koli wai langane. “Satan amla. Kesua gute sogo Ida Tapolngon ila pelengon palma langane. ‘Omlotuim Ngap Puda ka Ngap Tapolngon e due ila bokongon vala.’”

¹¹ Deka Satan songon iye e ensel me tilua iye ke ngangon e langane.

Yesus nogrum ila bokongon ke omur Galili

¹² Mase iye klingen omon osep tidue Jon sep ke kalabus deka iye songon omur are e la ke omur Galili.

¹³ Iye songon Nasaret e polou ke armok Kaperneam. Kaperneam dong olwo boto ke misuon ke omur Sebulun e omur Naptali.

¹⁴ Iye due elio ane ma pelengon ke gute napaprangan ina Aisaia wai ine polou lokono. Aisaia wai langane.

¹⁵ “Omur Sebulun e omur Naptali tidong olwo boto ke misuon e tidong ke aki Jordan burla. Omur Galili ka osep ka isak osep Yuda ina kovok tidong ine.

¹⁶ Osep ka tidong ke aivoro tivati bublongon omba e osep ka tidong langka ansak timete bublongon omba polou ke isak.”

Yesus rere osep apanal ma tididi iye

¹⁷ Alo ari Yesus nogrum e napapra langane. “Umabauluk aitno lumu ke lumu elio epmes ina kesua omur ka Ida Tapolngon plaue isuk boto polou.”

¹⁸ Oklou kene iye lila ke elim Galili ina dingen batne. E iye vati osep orwo Saimon ka angaine silang Pita e ina tovro Andru. Tiuri omdu lodu ina ke misuon kesua urok bokongon tikngo lodu.

¹⁹ Yesus vati isak e wai ke isak langane. “Umedidi ngong e langka oku ane umoboko ma umodue lodu ma ngaparere umu ke elio ka mase ma umodue osep tididi ngong.”

²⁰ E lokono tisongon urok omdu e tididi Yesus.

²¹ Yesus lila la e iye vati osep leklou. Gute Sebedi kap titno Jems e Jon. Tidong ke bot kap pmarak Sebedi e timosi urok omdu lodu ina. E Yesus gi ke isak.

²² Iye gi ke isak deka lokono tisongon pmarak ke bot e tididi iye.

Yesus wai pelengon e lua osep ka tipaia

²³ E Yesus lila lelei ke omur Galili e parere osep Yuda ina ke urok duningen ina ninu. Iye napapra omon itau ka la ke omur ka Ida Tapolngon plaue. E iye due osep ka tipaia ke paiangan bitna bitna e osep ka pampamu lisak soulu tipolou itau blang.

²⁴ E omon ke wan ka Yesus due la ke provins Siria ka pula keniye. E osep tikalke osep ka wan sasi due isak ke iye. Langka osep ka paiangan bitna bitna due isak e osep ka tarna lisak doro doro e osep ka angelo soulu due isak e osep ka tipaia e tigene e tinakarkar adai e osep ka kamsak e limsak timete. E Yesus due osep tonari tipolou itau blang.

²⁵ E osep pula pula ka tidong ke omur Galili e omur Dekapolis e omur Judia e Jerusalem e ke aki Jordan burla tididi Yesus.