Matyu 3 - Aria New Testament

Jon paunim osep ke aki

¹ Alo ari gute Jon ka paunim osep me ke omur ka dong adai vala ka dong ke omur Judia e napapra ke osep langane.

² “Umabauluk aitno lumu ke lumu elio epmes ina kesua omur ka Ida Tapolngon plaue isuk boto ma polou.”

³ Gute tonari iye gute ka gute napaprangnan ina Aisaia wai ine. Iye wai langane. “Gute kreine daiku ke omur ka dong adai vala langane. ‘Umomosi Ida Puda ila ekreng. Umodue osuk vala.’”

⁴ E Jon tnei molo ka tidue ke kamel tarna elilo e iye due let ka tidue ke bulmakau tarna lelei iye. E iye ngen kakan e wame olune.

⁵ Alo ari osep pula ke Jerusalem e omur Judia e omur ka lelei aki Jordan isak kla ke iye.

⁶ E tiwai malak ke urok elio epmes ina deka iye paunim isak ke aki Jordan.

⁷ E alo ka iye vati osep Farisi ina e osep Sadyusi ina pula time iye wai ke isak langane. “Umu langka mota ka olune soulu dong ke orsak. Sei palongo lumu ma umoulou ke Ida Tapolngon aitno ila engil ka ma me?

⁸ Umodue elio itau ka nis osep umabauluk aitno lumu ke lumu elio epmes ina.

⁹ E umawai ke umu tona langane kovok. ‘Gute Abraham iye pmemi.’ Umawai langane kovok kesua ngawai ke umu langane. Ida Tapolngon karanga due opmu ane e due Abraham titno ine.

¹⁰ Selembo dong olwo boto ke akai gigitno. E akai ka usu otna ka itau kovok ma osep tibloue e tiurie ke eiou.”

¹¹ “E ngapaunim umu ke aki ka nisngen ke elio ka umabauluk aitno lumu ke lumu elio epmes ina. E mase gute ka ila arit mole lou arit ma me e lou elio itau ma ngakaranga ngakalke ila su kovok. Ma iye paunim umu ke Ano Itau e ke eiou.

¹² E iye kis wan ka iye wade wit erine ine e iye ma gir omur ka timluk wit erine ine. Iye ma tagom wit otna ke ina yage ila ninu e iye ma uri wit tokonkon ke eiou ka ila yagosngon kovok.”

Jon paunim Yesus ke aki Jordan

¹³ E Yesus songon omur Galili e polou ke Jon ke aki Jordan. Iye polou ke iye ma Jon paunim iye.

¹⁴ E Jon waiki dangdang Yesus e wai langane. “Ngawaiki wom ampaunim ngong e eknikane wom omo ke ngong e amwaiki ngapaunim wom?”

¹⁵ E Yesus koli wai langane. “Omsongone ke oku ane kesua ke elio ane itodue wan ka didi Ida Tapolngon ila elio ka itau e osuk.” Deka Jon didi ila pelengon e paunim Yesus.

¹⁶ Jon paunim Yesus yagos deka Yesus tito ke aki ina dingen batne e sirva noklok e Yesus vati Ida Tapolngon Ano Itau duru langka belis e munu ke iye.

¹⁷ E osep tiklingen kreine kene wai ke omur heven langane. “Gute ane Erigu Arang ka ngong lana ngong ke iye e aitno lungong itau lokono ke iye.”