Matyu 25 - Aria New Testament

Yesus wai pelengon ano ke apmang belbela songotno

¹ “Alo ari omur heven ka Ida Tapolngon plaue dong eriar langka apmang belbela songotno ka tikalke urok lam e isak kla tipara ke gute ka ma gi.

² E apmang elme ke isak aitno lisak kaka e apmang elme leklou aitno lisak mter itau.

³ Kesua alo ka apmang ka aitno lisak kaka tikalke urok lam tikalke wel leklou kape kovok.

⁴ E apmang ka aitno lisak mter itau tikalke wel leklou ke urok lam ke botol.

⁵ E alo ka gute ka ma gi me dau kovok isak keniye amtarsak bunga e timunu kudung.

⁶ E ke epmes airavu gute gesa wai omba langane. ‘Umoklingen. Gute ka ma gi isuk boto ma polou. Umomo e umososon iye ke ekreng.’

⁷ Deka apmang songotno titipa e tikere urok lam.

⁸ E apmang ka aitno lisak kaka tiwai ke apmang ka aitno lisak mter itau langane. ‘Umakar lumu wel leklou ke imi kesua isuk boto limem lam emsim.’

⁹ E apmang ka aitno lisak mter itau tikoli tiwai langane. ‘Aurou. Wel dong ka karanga ke imi e umu blang kovok. Umala ke osep ka tidue burong ke wel e umekli lumu wel.’

¹⁰ E alo ka isak dau kla tikli wel gute ka ma gi polou e apmang elme ka tidong redi tisep ke ninu kap iye ma tingen gingen ina rogo. Deka tidiva ninu ina ekreng bitna.

¹¹ Mase apmang elme leklou time blang e tiwai langane. ‘Ipem puda omklok ekreng bitna ke imi.’

¹² E iye koli wai ke isak langane. ‘Ngawai lokono ke umu langane. Ngaile umu kovok.’”

¹³ Deka Yesus babrum ila pelengon lang-ane. “Umaplau umu itau kesua umeile oklou koke aua alo ka Gute Ka Polou Langka Osep ma iding me kovok.”

Yesus wai pelengon ano ke wokboi nating eklu

¹⁴ “Alo ka Gute Ka Polou Langka Osep ma iding me omur heven ka Ida Tapolngon plaue ma dong langane. Aling kene gute waiki la ke ila langan e gom ila wokboi nating e wai ke isak ma tiplau ila wan keniye.

¹⁵ E iye kar isak mani karanga ke wan ka tikaranga tidue. Iye kar 5,000 kina ke gute kene e iye kar 2,000 kina ke gute silang e iye kar 1,000 kina ke gute silang blang. Deka iye la ke ila langan.

¹⁶ E suong gute ka due 5,000 kina la due burong ine e iye due 5,000 kina silang.

¹⁷ E gute ka due 2,000 kina due burong ine blang e iye due 2,000 kina silang.

¹⁸ E gute ka due 1,000 kina la yas ovuk ke taklak e kukwop ina puda ila mani.

¹⁹ E tauni la kodong deka gute tonari iding ke ila langan. E iye waiki ila wokboi nating tipalongo ila ke wan ka tidue ke mani ka iye kare ke isak.

²⁰ E gute ka due 5,000 kina me kar iye 5,000 kina silang e wai langane. ‘Ngau puda amkar 5,000 kina ke ngong e ngadue 5,000 kina silang.’

²¹ Deka ina puda wai ke iye langane. ‘Wom wokboi nating ka itau e emdidi lou pelengon keniye. Omdue elio itau. Emdidi lou pelengon keniye ke wan daudeng e oku ane ngadue wom ommgo ke wan pula. Ngawaiki aitno lugom neser kap ngong.’

²² E gute ka due 2,000 kina me kar iye 2,000 kina silang e wai langane. ‘Ngau puda amkar 2,000 kina ke ngong e ngadue 2,000 kina silang.’

²³ Deka ina puda wai ke iye langane. ‘Wom wokboi nating ka itau e emdidi lou pelengon keniye. Omdue elio itau. Emdidi lou pelengon keniye ke wan daudeng e oku ane ngadue wom ommgo ke wan pula. Ngawaiki aitno lugom neser kap ngong.’

²⁴ E gute ka due 1,000 kina me wai langane. ‘Ngau puda ngaile wom gute burong ina ka omdue mada ke osep kovok e omdue wan otna ke omur ka emser londo ine kovok e omgom wan erine ke omur ka omblou erine ine kovok.

²⁵ E ngalim ke wom deka ngala ngayas lem mani ke ovuk ke taklak. Io lem 1,000 kina ane.’

²⁶ E ina puda koli wai ke iye langane. ‘Wom wokboi nating ka soulu e amwaiki omboko engil kovok e omdue ropo vala. Emile ngadue otna ke omur ka ngaser londo ine kovok e ngagom wan erine ke omur ka ngablou erine ine kovok.

²⁷ Deka wan ka itau langka omdue lou mani sep ke beng e alo ka ngaiding ngakaranga ngadue lou mani kap ina klousege blang.

²⁸ E oku ane osep umodue 1,000 kina ke iye e kare ke gute ka due 10,000 kina.

²⁹ Kesua gute ka due wan gesa ma iye due wan leklou blang. E ila wan pula pula dong. E gute ka ila wan isuk boto wan ka dong ke iye ma osep tipie ke iye.

³⁰ Umodue wokboi nating ane ka karanga lua ngong kovok e umouri iye ke dogur ka aivoro. Ke omur ari osep ma tikngis omba e tisak orsak erine pulu kesua tarna lisak doro doro lokono.’”

Krais ma wade osep ka pula keniye urok elio

³¹ “Alo ka Gute Ka Polou Langka Osep iding me ke ila bublongon iye ma me kap ila ensel keniye. Deka ma iye dong ke ila kova ka itau lokono.

³² E ma osep ka pula keniye ke taklak tiduni pulu ke bitna e ma iye wade isak kene kene langka gute ka plau sipsip wade sipsip ke meme.

³³ Ma iye due sipsip tidong ke galna odung e due meme tidong ke galna gala.

³⁴ Deka ma gute ka vri mgo ke omur are wai ke osep ka tidong ke galna odung langane. ‘Umu osep ka Livou due aitno lumu itau itau umomo e umodue omur ka Ida Tapolngon rere ke umu alo ka iye tapol wan ka pula keniye.

³⁵ Kesua alo ka sapanga due ngong umakar ngangon ke ngong ma ngangen e alo ka aki vel ngong umakar aki ke ngong ma ngainim e alo ka ngadong langka gute kaulei umodue ngong ngasep ke lumu ninu.

³⁶ E alo ka ngadong ten ngong ovuk e lou klos kovok umakar klos ke ngong ma ngatnei e alo ka ngapaia umaplau ngong e alo ka ngadong ke kalabus umomo e umavati ngong.’

³⁷ Deka osep ka tidong itau itau ma tikoli tiwai langane. ‘Ipem Puda lesen imavati sapanga due wom e imakar ngangon ke wom koke lesen aki vel wom e imakar aki ke wom?

³⁸ Koke lesen imavati wom langka gute kaulei e imodue wom emsep ke limem ninu koke lesen imavati wom omdong ten wom ovuk e imakar klos ke wom ma emtnei?

³⁹ Koke lesen imavati wom ampaia koke lesen omdong ke kalabus e imala e imavati wom?’

⁴⁰ Deka gute ka vri mgo ke omur ma koli wai ke isak langane. ‘Ngawai lokono ke umu. Alo ka umodue elio tonari ke osep ke lou osua lama angainsak daudeng e tidong moli ke osep leklou umodue ke ngong blang.’”

⁴¹ “Deka iye ma wai ke osep ka tidong ke galna gala langane. ‘Umu ka Ida Tapolngon mulu umu umosongon ngong e umala ke eiou ka dong vala dong ka Ida Tapolngon rere ke Satan e ila angelo soulu.

⁴² Kesua sapanga due ngong e umakar ngangon ke ngong kovok e aki vel ngong e umakar aki ke ngong kovok.

⁴³ E ngadong langka gute kaulei e umodue ngong ngasep ke lumu ninu kovok. Ngadong ten ngong ovuk e umakar klos ke ngong ma ngatnei kovok e ngapaia e ngadong ke kalabus e umomo umavati ngong kovok.’

⁴⁴ E ma tikoli tiwai langane. ‘Ipem puda lesen imavati sapanga due wom koke aki vel wom koke wom langka gute kaulei koke wom ten wom ovuk koke ampaia koke omdong ke kalabus e imala imolua wom kovok?’

⁴⁵ Deka gute ka vri mgo ke omur ma koli wai ke isak langane. ‘Ngawai lokono ke umu. Langka umodue elio tonari kovok ke lou osua lama angainsak daudeng e tidong moli ke osep leklou umodue ke ngong kovok blang.’”

⁴⁶ E Yesus babrum ila pelengon langane. “Osep tonari ma tidue ulesngen ka dong vala dong. E osep ka tidong itau e osuk ma tidue urok mosongon ka dong vala dong.”