Matyu 22 - Aria New Testament

Yesus wai pelengon ano ke gingen ina rogo

¹ E Yesus wai pelengon ano silang ke osep langane.

² “Omur heven ka Ida Tapolngon plaue langane. Gute ka vri mgo ke omur kene waiki due rogo omba kesua otno arang ma gi.

³ E iye vai ila wokboi nating ma tiwai ke osep ka iye waiki time ke gingen ina rogo ma time. E tiwaiki time kovok.

⁴ E aling silang iye vai ila wokboi nating leklou e wai ke isak langane. ‘Umawai ke osep ka ngawaiki time langane. “Umoklingen. Ngakere ngangon kodong. Osep tibisik bulmakau arang e bulmakau otno ka malugi omba e tikere wan keniye kodong. Umomo ke gingen ina rogo.”’

⁵ E osep tonari tiklingen gute ka vri mgo ke omur ila omon kovok e tididi aitno lisak vala. Gute kene la ke ila yage e gute silang la due burong.

⁶ E osep leklou tikis ila wokboi nating e tidue elio soulu ke isak e timluk isak ma timete.

⁷ E gute ka vri mgo ke omur are aitno engil lokono e iye pagei ila osep ola ina e timter osep ka tidue burwa tonari ma timete e tibik urok armok ma eiou ngene.

⁸ Deka iye wai ke ila osep bokongon ina langane. ‘Tikere gingen ina rogo kodong e dau osep ka ngawaiki time isak osep itau kovok e ngawaiki time kovok.

⁹ E oku ane umala ke ekreng omba e umawai ke osep keniye ka umapado isak ma time ke rogo.’

¹⁰ E ila wokboi nating isak kla ke ekreng omba e tigom osep keniye ka tipado isak. Tigom osep ka itau e osep ka soulu ma time deka ninu ka tingen gingen ina rogo ine bon ke osep.”

¹¹ “E gute ka vri mgo ke omur are sep ke rogo ina eliang ma iye vati osep ka tidong e iye vati gute kene ka tnei gingen ina klos kovok.

¹² Deka iye wai ke iye langane. ‘Ate emtnei gingen ina klos kovok. Lange ka amkaranga emsep ane?’ E gute karanga koli wai kovok.

¹³ Deka gute ka vri mgo ke omur wai ke ila osep bokongon ina langane. ‘Umopou gute ane limla e kamla e umouri iye ke aivoro ke dogur. Ke omur are osep tikngis omba e tisak orsak erine pulu kesua tarna lisak doro doro lokono.’”

¹⁴ E Yesus wai blang langane. “Ida Tapolngon gi ke osep pula ma tisep ke omur ka iye plaue e dau iye rere osep awal boto vala ma tisep ke omur tonari.”

Ma osep tikli takis ke Sisar koke aurou?

¹⁵ E osep Farisi ina kla e tiwai pulu ke elio ka tikaranga tikotim Yesus batne ke ila pelengon.

¹⁶ E tivai urok disaipel kap osep leklou ka tiwaiki gute Herot vri mgo ke isak kla ke Yesus e tiwai langane. “Gute parerengen ina imeile amwai pelengon lokono e amparere osep lokono ke wan ka Ida Tapolngon waiki tidue e aitno lugom mter ke osep leklou urok pelengon kovok. E aitno lugom mter langka gute angaine omba koke angaine daudeng.

¹⁷ Deka aitno lugom lange? Moses ila sogongon songon ite ma itekli takis ke Sisar koke aurou?”

¹⁸ E Yesus ile wan soulu ka tiwaiki tidue e iye wai ke isak langane. “Umu ka aitno lumu orwo ina lange umawaiki umotok ngong?

¹⁹ Umenis ngong ke mani ka itekli takis ine.” Deka tinis iye ke mani tonari.

²⁰ E Yesus pmi isak langane. “Gute sei ano e angaine dong ke mani ane?”

²¹ E tikoli tiwai Sisar ano e angaine dong ine. Deka Yesus wai ke isak langane. “Umakar Sisar ila wan ke iye e langane blang umakar Ida Tapolngon ila wan ke iye.”

²² E alo ka tiklingen pelengon ane tidigrik e tisongon iye e isak kla.

Osep Sadyusi ina tipmi Yesus ke osep ka timete

²³ Ke oklou tonari blang osep Sadyusi ina leklou time ke Yesus. Osep Sadyusi ina aitno lisak mter osep tipoga titito ke inarak denga kovok. Deka tiwaiki tipmi Yesus ke pmingen gesa.

²⁴ Tiwai langane. “Gute parerengen ina Moses ila sogongon wai langane. ‘Langka gute gi e ila asap divir kovok e gute mete deka gute ina aiver ma gi asap batne tonari ma iye divir titno e tidong langka gute ka mete titno.’

²⁵ Io oglou gute e ina saiver lumakene tidong kap imi. Gute ka sirngen gi e mase mete e ila asap divir titno kovok. Deka gute orwo ina gi asap batne tonari.

²⁶ Gute orwo ina mete blang deka gute eklu ina gi iye deka mete blang la lama iding ke gute lumorwo ina gi iye deka mete.

²⁷ E mase apmang tonari mete blang.

²⁸ Deka alo ka osep tipoga titito ke inarak denga apmang tonari dong sei ila asap kesua isak lumorwo tigi iye?”

²⁹ E Yesus koli wai ke isak langane. “Umeile Ida Tapolngon ila pelengon kovok e umeile ila arit kovok e ke batne ane aitno lumu kaka ine.

³⁰ Kesua alo ka osep tipoga titito ke inarak denga tidong langka ensel ke omur heven e tigi kovok.

³¹ E ngawaiki ngawai ke elio ka osep tipoga titito ke inarak denga. Umeritim pelengon ka Ida Tapolngon wai ke umu ine kovok i?

³² Iye wai langane. ‘Ngong Upu Tapolngon ka Abraham e Aisak e Jekop tilotuim ngong.’ Iye osep ka timete Inarak Tapol-ngon kovok. Aurou. Iye osep ka tidong Inarak Tapolngon.”

³³ E alo ka osep pula pula ka tidong are tiklingen ila parerengen tidigrik ine.

Yesus wai ke Moses ila sogongon

³⁴ Alo ka osep Farisi ina tiklingen omon Yesus due osep Sadyusi ina ma tikaranga tiwai kovok isak leklou tiduni pulu e isak kla ke iye.

³⁵ E gute kene ke isak ka parere Moses ila sogongon waiki tok iye e pmi iye langane.

³⁶ “Gute parerengen ina wansua ke Moses ila pelengon dagar dong mgo e mole ila pelengon dagar leklou keniye?”

³⁷ E Yesus koli wai ke isak langane. “Pelengon dagar are langane. ‘Umu lana umu ke Upu Tapolngon ka Upu Puda ke aitno lumu keniye e ke anmu keniye e ke bara lumu keniye.’

³⁸ Ane pelengon dagar ka mgo e mole ila pelengon dagar leklou keniye.

³⁹ E pelengon orwo ina langka pelengon tonari. ‘Umu lana umu ke osep leklou langka umu lanu umu ke umu tona.’

⁴⁰ Moses ila sogongon e osep napaprangan ina urok pelengon dong batne ke pelengon dagar orwo tonari.”

Yesus pmi osep ke gute ka Ida Tapolngon rere Krais

⁴¹ E alo ka osep Farisi ina dau tiduni pulu are Yesus pmi isak langane.

⁴² “Aitno lumu lange ke gute Krais ka Ida Tapolngon rere ma iye lua osep? Iye sei ila napakngan?” E tikoli tiwai langane. “Iye Devit ila napakngan.”

⁴³ E Yesus pmi isak langane. “Deka ina lange Ano Itau due Devit aitno ma Devit sir iye ‘Ngau Puda’? Kesua Devit wai langane.

⁴⁴ ‘Ida Puda wai ke Ngau Puda langane. “Omdong ke lungu odung la lama ngadue ngap oul tidong moli ke kevep.”’

⁴⁵ Langka Devit sir iye ‘Ngau Puda’ lange ka gute Krais ka Ida Tapolngon rere ma iye lua osep karanga dong Devit ila napakngan?”

⁴⁶ Deka gute gesa karanga koli wai kovok e nogrum ke oklou are osep tilim ma tipmi iye ke pmingen silang blang.