Matyu 20 - Aria New Testament

Yesus wai pelengon ano ke osep ka tiboko ke yage galou wain ina

¹ Yesus wai pelengon ano langane. “Omur heven ka Ida Tapolngon plaue dong langane. Ke oklou kene ke 6 kilok ke kotkotu gute gesa la ke bilmu e waiki due osep ma tiboko ke ila yage galou wain ina.

² E iye pado osep e wai kap isak ma iye kli isak ke kina kene ke gute kene kene ke oklou kene deka iye vai isak ke ila yage.

³ E iye iding ke bilmu ke 9 kilok ke kotkotu e pado osep leklou tidong adai vala.

⁴ E iye wai ke isak langane. ‘Umu blang umala umoboko ke lou yage e ma ngakli umu ke klingen itau.’

⁵ E iye la ke bilmu ke belo e ke 3 kilok ke kirui blang e pado osep leklou e vai isak ke ila yage blang.

⁶ E isuk boto ke 5 kilok ke kirui iye la ke bilmu blang e pado osep leklou tidong are. E iye wai ke isak langane. ‘Ina lange umevri ane adai ke kotkotu me iding ke oku ane?’

⁷ E isak tikoli tiwai langane. ‘Imevri adai kesua gute gesa kli imi ma imodue ila bokongon kovok.’ Deka gute wai ke isak langane. ‘Umu blang umala umoboko ke lou yage.’

⁸ E alo ka isuk boto epmes polou yage ina gute wai ke gute ka plau ila osep bokongon ina langane. ‘Emgi osep ka tiboko ma tidue urok klingen. Omnogrum amkar klingen ke osep ka tiboko isuk boto vala la lama amkar klingen ke osep ka tinogrum tiboko ke 6 kilok ke kotkotu.’

⁹ E osep ka tiboko isuk boto vala tidue kina kene.

¹⁰ E alo ka osep ka tinogrum tiboko ke 6 kilok ke kotkotu tivati elio ane aitno lisak mter ma tidue mani pula e isak blang tidue kina kene.

¹¹ Osep tonari tidue urok mani e tingurngur ke yage ina gute.

¹² Tingurngur e tiwai langane. ‘Osep ane tiboko ke aua kene vala e imoboko alang ke oklou engil e dau tidue klingen eriar langka imodue.’

¹³ Deka yage ina gute wai ke gute kene ke isak langane. ‘Oka emklingen. Ngayak wom ke mani kovok. Ke kotkotu itawai pulu kodong ma umoboko ke oklou kene ke kina kene.

¹⁴ Umodue lumu mani e umala ke lumu ninu. Ngawaiki ngakar gute ka boko aua kene vala mani eriar langka ngakare ke umu.

¹⁵ Kesua ngakaranga ngadidi aitno lungong ke lou wan. Aitno lumu rim kesua ngadue tovro ke isak i?’”

¹⁶ E Yesus wai langane. “Osep ka time batne oku ane ma timgo e osep ka timgo oku ane ma time batne.”

Yesus wai aling eklu ina ke ina metengen

¹⁷ Yesus gosok ila disaipel tilila titito ke armok Jerusalem. E alo ka tilila iye gom isak e wai ke isak vala alo ka tilila kla.

¹⁸ Iye wai langane. “Umoklingen. Itetito itala ke Jerusalem e osep ma tikar Gute Ka Polou Langka Osep ke osep loulou ina ka omba e osep ka tile itau ke Moses ila sogongon ma timulu iye ma iye mete.

¹⁹ E ma tipaur iye ke osep ka isak osep Yuda ina kovok e osep tonari ma tidue apok ke iye e tiules iye e tinilim iye ke ina akai. E dau mase oklou eklu mela yagos deka ma iye poga tito ke ina denga.”

Jems orwo Jon tiwaiki timgo ke osep

²⁰ Deka gute Sebedi ila asap kap titno arang orwo time ke Yesus e iye grum kamla e waiki pmi Yesus ke wan gesa.

²¹ E Yesus wai ke iye langane. “Amwaiki empmi ngong ke wansua?” E iye wai ke Yesus langane. “Alo ka omo e emvri mgo ke omur ka pula keniye ngawaiki amwai ma erigu arang orwo tidong kap wom. Ngawaiki kene dong ke galna lugom odung e kene dong ke galna lugom gala.”

²² E Yesus koli wai langane. “Umeile wan ka umepmi ngong ine kovok. Umakaranga umanamani elio soulu ka ma nganamani ine?” E tikoli tiwai langane. “Imakaranga imanamani ine.”

²³ Deka Yesus wai ke isak langane. “Ma umanamani elio soulu ka nganamani e dau ngakaranga ngawai sei ma dong ke galna lungong odung e sei ma dong ke galna lungong gala kovok. Aurou. Livou rere osep seisei ma tidong ge.”

²⁴ Alo ka ila disaipel songotno leklou tiklingen ine aitno lisak engil ke isak orwo.

²⁵ E Yesus gi ila disaipel tiduni pulu e wai ke isak langane. “Umeile osep ka tivri mgo osep ka isak osep Yuda ina kovok timgo e tipagei isak e lokono osep tini urok pelengon.

²⁶ E langare ke umu kovok. Kesua gute ka waiki polou omba ke umu ma iye polou langka lumu gute bokongon ina.

²⁷ E gute ka waiki dong mgo ke umu ma iye dong langka lumu wokboi nating.

²⁸ Kesua Gute Ka Polou Langka Osep me ma osep tidue wan ka lua iye tona kovok. Aurou. Iye me ma iye lua osep e mete ma iye kli osep urok elio epmes ina.”

Yesus lua osep orwo ka amtarsak evin

²⁹ Alo ka tisongon Jeriko osep pula pula tididi isak.

³⁰ E osep orwo ka amtarsak evin tidong ke ekreng galna e tiklingen omon Yesus lila olwo boto ke isak. Deka tidaiku langane. “Wom ka osep tisir wom Devit Otno Arang aitno lugom due imi.”

³¹ E osep pula pula tiwai ke isak ma tidaiku kovok. E tinogrum tidaiku omba langane. “Ipem Puda wom ka osep tisir wom Devit Otno Arang aitno lugom due imi.”

³² E Yesus vri e gi ke isak e wai ke isak langane. “Umawaiki ngadue sua ke umu?”

³³ E tikoli tiwai langane. “Puda imawaiki omdue imi ima-karanga imavati omur blang.”

³⁴ Deka Yesus aitno kro ke isak e kai amtarsak e suong tikaranga tivati omur blang. E tididi Yesus.