Matyu 16 - Aria New Testament

Osep tiwaiki tivati Yesus due elio arit ina

¹ E Osep Farisi ina e osep Sadyusi ina time ke Yesus e tiwaiki titok iye deka tipmi iye ma iye due nisngen ka omur heven ina.

² *E iye koli wai ke isak langane. “Alo ka kirui kodong umawai ma kotu oklou itau kesua umavati sirva edimor.

³ E ke kotkotu lokono umawai aragu ma me kesua umavati sirva edimor e gaup pula ka aivoro tidong. Umakaranga umavati sirva e umeile wansua ma polou ke sirva e dau umakaranga umeile elio isuk isuk ka tipolou oku ane lana ine kovok.

⁴ Osep ka tidong oku ane isak osep soulu e aitno lisak dagar ke Ida Tapolngon kovok e tiwaiki tivati nisngen. E ma tivati nisngen kene ka la ke gute Jona vala.” E Yesus songon isak e la.

Yesus wai ke osep Farisi ina e osep Sadyusi ina urok elio soulu

⁵ Alo ka tibru elim Galili kodong ila disaipel amtarsak sisir tidue inarak bret kovok.

⁶ E Yesus wai ke isak langane. “Umaplau umu itau ke osep Farisi ina e osep Sadyusi ina inarak yis.”

⁷ E osep disaipel tiwai pulu langane. “Iye wai langane kesua itodue bret kovok.”

⁸ E Yesus ile wan ka tiwai ine e wai ke isak langane. “Umu osep ka aitno lumu ila dagar isuk boto vala. Ina lange umawai pulu ke elio ka umodue bret kovok?

⁹ Umeile kovok e omtomu uli ke bret elme ka osep 5,000 tingene e kerka sesue umodue batne?

¹⁰ Koke omtomu uli ke bret lumorwo ka osep 4,000 tingene e kerka sesue umodue batne?

¹¹ Ina lange umakaranga umeile kovok ngawai ke umu ke bret kovok. E umaplau umu itau ke osep Farisi ina e osep Sadyusi ina inarak yis.”

¹² Deka tile iye wai ma tiplau isak itau ke yis ka osep tidue sep ke bret kovok. Aurou. Iye wai ke osep Farisi ina e osep Sadyusi ina urok parerengen.

Pita wai Yesus iye Krais lokono

¹³ Alo ka tipolou ke omur ka armok Sisaria Filipai dong ine Yesus pmi ila disaipel langane. “Osep tiwai lange ke Gute Ka Polou Langka Osep? Tiwai iye sei?”

¹⁴ E tikoli tiwai langane. “Osep leklou tisir iye Jon ka paunim osep e osep leklou blang tisir iye Elaija e osep leklou blang tisir iye Jeremaia koke tisir iye gute napaprangan ina silang.”

¹⁵ E Yesus pmi isak langane. “E aitno lumu lange? Ngong sei?”

¹⁶ E Saimon Pita wai langane. “Wom gute Krais ka Ida Tapolngon rere ma iye lua osep ke urok elio epmes ina. Wom Ida Tapolngon ka dong vala dong Otno Arang.”

¹⁷ E Yesus koli wai ke iye langane. “Ngawai lokono ke wom Saimon ka Jon otno arang. Aitno lugom ma dong itau itau kesua gute kene ka taklak ina nis wom ine kovok. Aurou. Livou ka dong ke omur heven nis wom ine.

¹⁸ E ngawai ke wom langane. Angain wom Pita e ke opmu ane ma ngauri lou sios e wan bitna bitna e metengen blang tikaranga timole kovok.

¹⁹ Ma ngakar ki ke omur heven ka Ida Tapolngon plaue ke wom e wan ka amdangdange ke taklak ma Ida Tapolngon dangdange ke omur heven e wan ka omsongone ke taklak ma Ida Tapolngon songone ke omur heven.”

²⁰ Deka iye wai dagar ke ila disaipel ma tipalongo osep iye gute Krais ka Ida Tapolngon rere ma iye lua isak osep ke urok elio epmes ina kovok.

Yesus wai ma iye mete deka poga tito ke ina denga

²¹ Alo ari Yesus nogrum palongo ila disaipel ma iye la ke Jerusalem e namani elio soulu pula ke osep namormor e osep loulou ina ka omba e osep ka tile itau ke Moses ila sogongon. E ma timter iye ma iye mete e mase ke oklou elku ina ma iye poga tito ke ina denga.

²² Iye wai langane deka Pita due e wai dagar ke iye langane. “Ngau Puda Ipem Tapolngon ma songon elio are polou kovok. Elio ane ma polou ke wom kovok.”

²³ E Yesus klingen Pita ila pelengon e bauluk wai ke iye langane. “Satan amla ke dogur lungong. Amwaiki amdangdang ngong kesua emdidi osep aitno lisak vala e emdidi Ida Tapolngon aitno kovok.”

²⁴ Deka Yesus wai ke ila disaipel langane. “Langka gute waiki didi ngong ma iye pli tarna e didi ngong. Iye due langane e langka osep tidue elio soulu ke iye e iye mete are wan gesa kovok.

²⁵ Kesua gute ka waiki ila mosongon dong ke taklak ane ma ila mosongon imina la. E gute ka ila mosongon imina ke taklak ane batne iye didi ngong ma iye pado ila mosongon ka lokono.

²⁶ Langka gute due wan keniye ka taklak ina e dau ila mosongon imina ma iye due wansua? Koke ma gute kar wansua ma iye due ila mosongon?

²⁷ Kesua Gute Ka Polou Langka Osep ma me ke Timla ila bublongon kap ila ensel. E alo ari ma iye kar klingen ke elio bitna bitna ka osep tidue.

²⁸ Ngawai lokono ke umu langane. Umu leklou ma dau umodong alo ka Gute Ka Polou Langka Osep ma me ke omur ka iye plaue.”