Matyu 14 - Aria New Testament

Jon ina metengen

¹ Alo ari gute Herot ka plau omur Galili klingen basikngen ke wan ka Yesus due.

² E iye wai ke ila osep bokongon ina langane. “Gute ane iye Jon ka paunim osep e iye poga tito ke ina denga. E ke batne langane iye due arit e karanga due elio arit ina.”

^3-4 Ke oglou Herot gi ina aiver Filip ila asap Herodias e aling aling Jon wai ke elio ane langane. “Elio ka omdue osuk e itau kovok.” Deka Herot wai ke osep ola ina ma tipou Jon limla e due sep ke kalabus.

⁵ E Herot waiki mter Jon ma iye mete e dau iye due langane kovok kesua iye lim ke osep. Kesua aitno lisak mter langka Jon gute napaprangan ina.

⁶ E alo ka tidue rogo ke oklou ka Herot tna divir iye Herodias otopmang tirie ke osep amtarsak e Herot aitno itau ine.

⁷ E Herot wai promis dagar ma iye kar iye wansua ka iye waiki due.

⁸ Deka Herodias sruk otopmang aitno deka iye wai ke Herot langane. “Ngawaiki suong amkar ngong Jon ka paunim osep otuk ine ke dis.”

⁹ Herot klingen pelengon tonari e aitno soulu ine e dau iye wai ma osep ola ina tidue langane kesua iye wai promis dagar kodong e osep pula pula ka tingen kap iye tiklingen ine.

¹⁰ Deka iye pagei osep ola ina ke kalabus ma tiblou Jon otuk ine.

¹¹ E tipaur Jon otuk ine sep ke dis e kare ke apmang e iye kare ke tna.

¹² E Jon ila disaipel time tidue pampamu ine e tiyase deka isak kla tipalongo Yesus ila ke wan ka polou.

Yesus kar ngangon ke osep 5,000

¹³ Alo ka Yesus klingen omon ke Jon ina metengen iye sep ke bot e la ke omur ka dong adai vala ma iye kene vala dong are. E alo ka osep tiklingen ine tisongon armok armok e tilila tididi iye.

¹⁴ E alo ka Yesus songon bot ke aki ina dingen batne iye vati osep pula pula tidong e aitno kro ke isak e iye due osep ka tipaia tipolou itau blang.

¹⁵ E alo ka isuk boto epmes polou ila disaipel time e tiwai ke iye langane. “Omur ane omur adai vala e kirui kodong e oku ane ampagei osep kla ma tikaranga tikli inarak ngangon ke armok armok.”

¹⁶ E Yesus koli wai langane. “Aurou. Ma isak kla kovok. Umakar inarak ngangon ke isak.”

¹⁷ E tikoli tiwai langane. “Imodue ngangon pula kovok. Bret elme e lodu orwo vala tidong.”

¹⁸ E Yesus wai langane. “Umapaur bret e lodu me ke ngong.”

¹⁹ E Yesus wai ke osep pula pula ma tidong ke gras. Deka iye due bret elme e lodu orwo e bitna tito la ke omur heven e iye wai tenkyu ke Ida Tapolngon ine. Deka iye tuktuk isak e kar isak ke ila disaipel e tikar isak ke osep.

²⁰ E osep keniye tingen e tigot. E ila disaipel titagom bret e lodu emkil emkil e tidue sep ke kerka songotno orwo ma isak bon.

²¹ E osep arang ka tingen ngangon inarak sasa 5,000 e apmang e agau tidong blang e tidue sasa tonari tito.

Yesus lila ke aki tona

²² E Yesus wai ke ila disaipel ma tisep ke bot e isak kla mgo ke iye ke aki burla. E iye waiki dong e pagei osep kla ke omur omur.

²³ Iye pagei osep kla kodong deka iye kene tito ke gigri ma iye wai itau ke Ida Tapolngon. Epmes polou e iye kene vala dong ke gigri.

²⁴ E alo are ila disaipel tidong mawa ke aki ina dingen batne ke bot e boitini mluke e engen ipue ma tikaranga kla itau kovok.

²⁵ E ke kotkotu lokono Yesus lila ke aki tona e polou ke isak.

²⁶ E alo ka ila disaipel tivati iye lila ke aki tona tiulou tarna lisak lokono e ansak nesik e tidaiku langane. “Wan are ano.”

²⁷ E suong Yesus wai ke isak langane. “Ngong tona ane. Aitno lumu epen e anmu nesik sakam.”

²⁸ Deka Pita koli wai langane. “Ipem Puda langka wom are amwai ke ngong ma ngalila ke wom ke aki tona.”

²⁹ E Yesus wai “omo” e Pita songon bot e lila ke aki tona e la ke Yesus.

³⁰ E alo ka Pita vati wan ka engen dagar due iye lim ine e iye nogrum duru ke aki. Deka iye daiku ke Yesus langane. “Ngau Puda omlua ngong.”

³¹ E suong Yesus due limla la e kis Pita deka wai langane. “Wom ka aitno lugom ila dagar daudeng ina lange aitno lugom orwo ke ngong?”

³² E alo ka tisep ke bot engen yagos.

³³ E osep ka tidong ke bot tilotuim iye e tiwai langane. “Lokono wom Ida Tapolngon Otno Arang.”

Yesus lua osep pula ka tipaia ke omur Genesaret

³⁴ Alo ka tibru aki tipolou ke omur Genesaret.

³⁵ E alo ka osep ke omur are tivati e tile Yesus polou tivai omon ke osep ke omur are e tipaur osep ka tipaia ke Yesus.

³⁶ E tikel Yesus ma iye songon isak ma limsak karanga kai molo ene vala. E osep ka pula keniye ka tikai iye tipolou itau blang.