Matyu 11 - Aria New Testament

Jon vai ila disaipel isak kla ke Yesus

¹ Yesus palongo ila disaipel songotno orwo ke pelengon tonari yagos deka iye la e nogrum parere osep e napapra ke armok armok ke omur are.

² Alo ari Jon dong ke kalabus e iye klingen omon ke wan ka Krais due deka iye pagei ila disaipel leklou kla ke Yesus.

³ E tipmi Yesus langane. “Wom gute ka Ida Tapolngon pagei me koke ma imekrim ke gute silang?”

⁴ Yesus koli wai ke isak langane. “Umala e umapalongo Jon ila ke wan ka umavati e wan ka umoklingen ine.

⁵ Osep ka amtarsak evin tikaranga tivati omur blang e osep ka kamsak timete tikaranga tilila blang. Osep ka paiangan lepra due isak tipolou itau blang e osep ka tikaranga tiklingen pelengon kovok tikaranga tiklingen blang. Osep ka timete kodong tipoga tidong blang e osep ka urok wan isuk boto vala tiklingen omon itau.

⁶ E Ida Tapolngon due elio itau itau ke osep ka aitno lisak dagar ke ngong e orwo kovok.”

⁷ Alo ka Jon ila disaipel tisongon kla Yesus wai ke osep pula pula ka tidong are ke Jon ila elio langane. “Umala ke omur ka dong adai vala ma umavati wansua? Umala ma umavati engen ipu wan ka ina arit kovok langka tobor?

⁸ Umala ma umavati wansua? Umala ma umavati gute ka tnei klos ka itau lokono? Oo. Langane kovok. Osep ka titnei klos ka itau lokono tidong ke gute ka vri mgo ke omur ila ninu.

⁹ Umawai ke ngong. Umala ma umavati wansua? Umala ma umavati gute napaprangan ina i? Lokono. Iye gute napaprangan ina e iye gute napaprangan ina vala kovok. Aurou. Iye mole osep napaprangan ina leklou.

¹⁰ Ida Tapolngon ila pelengon wai ke iye langane. ‘Ma ngapagei gute ka kalke omon mgo ke wom e ma iye kere ekreng ke wom.’”

¹¹ E Yesus wai blang langane. “Ngawai lokono ke umu. Gute gesa ka taklak ane ina mole Jon ka paunim osep kovok. E dau gute ka aitno mter iye dong adai ke omur ka Ida Tapolngon plaue iye mole Jon.”

¹² “Ke oklou Jon ka paunim osep nogrum napapra ke osep lila me ke oku ane osep ka aitno lisak amnga tiwaiki tidue evlei e tidue omur heven ka Ida Tapolngon plaue.

¹³ Buk keniye ka osep napaprangan ina tisogo isak e Moses ila pelengon wai ke wan bitna bitna ka ma tipolou la lama alo ka Jon polou.

¹⁴ E langka aitno lumu dagar ke urok sogongon Jon iye gute napaprangan ina Elaija ka tiwai iye ma me.

¹⁵ Langka umakaranga umoklingen pelengon ane deka umoklingen itau.

¹⁶ “Ma ngawai pelengon ano lange ke osep ka tidong oku ane? Isak langka agau ka tidong ke bilmu e tidaiku ke agau leklou langane.

¹⁷ ‘Imeipu piloli e umetirei kovok. E imodue sakul metengen ina e umekngis kovok.’

¹⁸ Kesua Jon ka paunim osep me e ngen pula kovok e inim aki wain kovok e osep tiwai angelo soulu dong ke iye.

¹⁹ E Gute Ka Polou Langka Osep me e ngen ngangon e inim aki wain e osep tiwai langane. ‘Gute are iye ngen ngangon pula e inim aki wain ma bitna balilu e ila saten isak osep ka tidue takis e osep epmes ina.’ E dau Ida Tapolngon ila osep tidue elio itau e elio are nis osep Ida Tapolngon ila ilengen iye pelengon lokono.”

Osep ka tipul dogur ke urok elio epmes ina kovok tidong soulu

²⁰ Ke armok ka Yesus due elio arit ina pula ine osep tibauluk aitno lisak ke Ida Tapolngon kovok e Yesus mulu isak e wai ke isak langane.

²¹ “Umu osep ke armok Korasin e osep ke armok Betsaida ma elio soulu polou ke umu. Kesua langka elio arit ina ka ngadue ke lumu armok orwo ngadue ke armok Tair e armok Saidon tibauluk aitno lisak kodong. E tidue elio ka nis ite aitno lisak soulu ke urok elio epmes ina e tibauluk aitno lisak ine.

²² Ngawai lokono ke umu. Ke oklou ka Ida Tapolngon wade osep ka pula keniye urok elio ine lumu ulesngen ma mole osep Tair ina e osep Saidon ina urok ulesngen.

²³ E umu osep ke armok Kaperneam aitno lumu mter osep ma tidue anit ke umu ke omur heven i? Aurou. Ma umoduru ke omur hel kesua langka elio arit ina ka ngadue ke lem armok ngadue ke armok Sodom ma armok tonari dau dong eknikane.

²⁴ Ngawai lokono ke umu. Ke oklou ka Ida Tapolngon wade osep ka pula keniye urok elio ine ma lem ulesngen mole osep Sodom ina urok ulesngen.”

Yesus waiki lua osep ma timtong

²⁵ Deka Yesus wai langane. “Livou wom ka amplau omur heven e taklak aitno lungong itau kesua omkukwop wan ane ke osep ilengen ina e osep ka tile pula e emnis isak ke osep ka isak langka agau vala.

²⁶ E aitno lugom itau e omdue elio ane.”

²⁷ “Livou kar wan ka pula keniye ke ngong e iye vala ile Otno Arang. E Otno Arang kene vala iye ile Ida Tapolngon lokono. E osep leklou ka Otno Arang tonari waiki palongo urok ke Ida Tapolngon ma tile iye blang.”

²⁸ “Langka umakalke lumu sigi e umobure deka umomo ke ngong e ma ngalua umu ma umomtong.

²⁹ Umomo ke ngong e umanana ke ngong deka umodue sigi ka ngakare ke umu e umakalke sigi tonari kesua ngong gute ka due mada e ngapes ngong tona e ma aitno lumu mtong e dong epen ke ngong.

³⁰ Kesua lou sigi tonari engil kovok e markan vala.”