Mak 3 - Aria New Testament

Yesus lua gute ka limla mete

¹ Mase ke oklou sabat gesa Yesus la sep ke osep Yuda ina urok duningen ina ninu. E ari gute gesa ka limla kene mete dong ke duningen ina ninu blang.

² Osep Farisi ina leklou tidong ke duningen ina ninu blang. E amtarsak kis dagar ke Yesus ma tivati langka iye lua gute ka limla mete ke oklou sabat koke aurou? Tidue langane kesua langka iye lua gute ka limla mete ke oklou sabat ma tisin elio vri ke iye.

³ Yesus vati isak e ile aitno lisak. Deka iye wai ke gute ka limla mete langane. “Omo emvri ane.”

⁴ Deka Yesus pmi osep Farisi ina langane. “Aitno lumu lange? Ma itodue elio itau ke oklou sabat koke ma itodue elio soulu ine? Ma itolua osep ine koke ma itodue burwa ke osep ine?” Osep tonari tiklingen Yesus ila pelengon e tikoli tiwai kovok.

⁵ Deka Yesus bitna lila ngen isak e aitno engil ke isak. Aitno kro ke isak kesua isak kensak kensak tipono aitno lisak ke elio itau. Deka iye wai ke gute tonari langane. “Omkotok livep.” Gute tonari klingen ila pelengon deka kotok limla la deka lokono limla polou itau.

⁶ Osep Farisi ina tivati elio tonari e aitno lisak nevlik amnga lokono ine. Deka tisongon duningen ina ninu e isak kla tipolou ke osep ka Herot sisrok. Deka osep Farisi ina e osep ka Herot sisrok tilalo pelengon ke elio ka tiwaiki tidue burwa ke Yesus.

Osep pula tididi Yesus

⁷ Mase Yesus gosok ila disaipel isak kla ke elim Galili. Deka osep pula ka tidong ke omur Galili tididi iye e time tipolou ke iye. E osep ka omur Judia ina time tipolou ke iye blang.

⁸ Deka osep ka armok Jerusalem ina e osep ka omur Idumea ina e osep ka tidong ke aki Jordan burla time tipolou ke iye. E osep pula ka tidong lelei ke armok orwo Tair e Saidon time tipolou ke iye. Osep pula pula tonari tiklingen ke elio isuk isuk ka Yesus due deka tisongon urok omur e time tipolou ke iye.

⁹ Yesus vati osep pula tonari time tipolou ke iye deka iye wai ke ila disaipel langane. “Umodue bot gesa e umekere ma iye dong olwo boto ke ngong. Deka langka osep ka time tipolou ke ngong tipor ngong ma ngala ngasep ke bot tonari e ngadong ine.”

¹⁰ Osep pula tonari time tipolou ke Yesus kesua batne iye lua osep pula ka tipaia. Deka ari osep pula ka inarak paiangan dong ke isak kotitit isak e tipara pulu ma tikai iye. Kesua aitno lisak mter langka tikaranga tikai iye deka ma inarak paiangan yagos.

¹¹ Alo ari angelo soulu ka tidong ke osep leklou tivati iye deka tigene ke Yesus kamla e tidaiku langane. “Wom tona Ida Tapolngon Otno Arang lokono.”

¹² Tiwai langane deka Yesus wai dagar ke isak langane. “Umapalongo osep ke ngong sakam.”

Yesus rere osep songotno orwo ma isak ila aposel

¹³ Mase Yesus tito la ke omur ka gigri gigri e dong ine. Deka iye gi osep leklou ka iye waiki tididi iye ma time tipolou ke iye.

¹⁴ Osep tonari time tipolou ke iye deka iye rere osep songotno orwo ma isak ila aposel. Kesua iye waiki tidong kap iye e waiki ma iye pagei isak kla tinapapra Ida Tapolngon ila pelengon ke osep.

¹⁵ E iye waiki ila arit dong ke isak ma tikaranga tisapir angelo soulu ka tidong ke osep aitno lisak.

¹⁶ Osep songotno orwo ka Yesus rere isak angainsak langane. Saimon ka iye baski angaine Pita.

¹⁷ E Sebedi titno arang Jems e Jon ka iye baski angainsak Boanerges. Boanerges lana ine osep ka aitno lisak nevlik.

¹⁸ E Andru e Filip e Bartolomyu e Matyu e Tomas e Jems ka Alfius otno arang. E Tadius e Saimon ka iye gute Selot ina. E osep Selot ina tiwaiki kantri silang tiplau isak kovok.

¹⁹ E Judas Iskariot ka mase iye lai Yesus ina.

Osep tiwai Belsebul dong ke Yesus aitno

²⁰ Yesus rere osep songotno orwo yagos deka iye songon gigri tonari e duru polou ke ninu gesa deka iye sepe e dong ine. E osep pula tididi iye e tipolou ke iye blang. Deka Yesus lua osep vala e iye gosok ila disaipel tikaranga timtong ma tingen inarak ngangon kovok.

²¹ Osep leklou tivati iye dong boko vala e ngen ina ngangon kovok deka tiwai langane. “Gute are manga manga.” Tiwai langane deka ila osua tiklingen ine deka time tipolou ke ninu tonari ma tidue.

²² Ari osep ka tile itau ke Moses ila sogongon ka tidong ke Jerusalem tiduru tipolou ke iye blang. Tivati elio ka Yesus due deka tiwai ke osep ka pula langane. “Belsebul dong ke aitno. Iye didi Belsebul ka angelo soulu inarak puda ila arit deka iye sapir angelo soulu ka tidong ke osep.”

²³ Deka Yesus gi ke osep tonari e wai langane. “Osep umomo ane.” Deka isak kla tipolou ke iye deka iye wai ke isak langane. “Ma Satan sapir iye tona koke aurou?” Deka iye wai ke isak ke pelengon ano langane.

²⁴ “Langka osep ka tidong ke kantri kene tidue ola pulu ma tidong tauni kovok. Ma tipaiavu isak kensak kensak vala deka isak yagos.

²⁵ Langka osep ka urok osua kene tidue evlei pulu ma tidong tauni kovok e ma isak yagos vala.

²⁶ Langka Satan due ola pulu ke angelo soulu ka iye plau isak ma iye paiavu isak ma iye dong tauni kovok. Elio ane ma ngen iye deka ma iye yagos blang.

²⁷ Langka gute gesa waiki la sep ke gute silang ka ila arit dong ila ninu ma panako ila wan ma iye mole gute tonari mgo e pou iye dagar. Langka iye due elio langane mgo ma iye karanga panako gute tonari ila wan keniye.”

²⁸ “Ngawai ke umu ke pele-ngon ane ka lokono lokono. Ida Tapolngon karanga sak elio epmes ina bitna bitna keniye ka osep tidue. Iye karanga sak osep ka tipul dogur ke urok elio ka tiwai soulu ke iye e tipes iye tona angaine urok elio epmes ina.

²⁹ E langka gute gesa wai soulu ke Ida Tapolngon Ano Itau e pes angaine ma Ida Tapolngon sak ila elio epmes ina ka langane kovok. Ma elio tonari vri ke iye e munu pes iye vala e dong vala dong.”

³⁰ Yesus wai pelengon tonari kesua batne osep tonari tiwai angelo soulu dong ke aitno.

Yesus tna e ina saiver

³¹ Alo ari Yesus tna e ina saiver time tipolou ke ninu ka iye dong ine. E tivri ke dogur e tiwai ke osep leklou langane. “Osep umawai ke gute Yesus ma iye me polou ke imi.”

³² Yesus dau dong ke ninu aitno e osep pula tidong lelei iye. Deka osep tiwai ke iye langane. “Aiya e ngap saiver tidong ke dogur e tiwaiki amla ompolou ke isak.”

³³ Deka Yesus koli osep tonari urok pelengon langane. “Nina e ngau saiver isak osep seisei?”

³⁴ Deka Yesus bitna lila e iye vati osep ka tidong lelei iye e wai langane. “Nina e ngau saiver umu ka umodong ane.

³⁵ Gute sei ka didi Ida Tapolngon aitno iye ngau aiver e luku e nina.”