Luk 8 - Aria New Testament

Apmang leklou tididi Yesus

¹ Mase sasi boto Yesus lila la ke armok omba e armok daudeng e iye napapra omon itau ka la ke omur ka Ida Tapolngon plaue. E ila disaipel songotno orwo isak kla kap iye.

² E apmang leklou ka oglou Yesus sapir angelo soulu ke isak e due inarak paiangan bitna bitna yagos isak kla kap iye blang. Apmang kene angaine Maria ka armok Makdala ina ka Yesus sapir angelo soulu lumorwo ke iye.

³ E Joana e Susana e apmang pula leklou isak kla kap iye blang. Apmang Joana iye gute Kusa ka plau Herot ila ninu ila asap. Apmang tonari tikar urok wan bitna bitna ma tilua Yesus e ila disaipel ine.

Gute ka lila ser wit londo

⁴ Alo ka osep pula pula time ke armok armok e tiduni pulu Yesus wai pelengon ano ke isak langane.

⁵ “Gute yage ina la ser wit londo ke ila yage. E londo leklou tiduru timunu ke ekreng e osep kamsak tipes londo e silang blang monuk time e tingen londo tonari.

⁶ E londo leklou tiduru timunu ke taklak ka isuk boto vala ka napal munu ke opmu tona e londo tinobolbol e erine tipolou kakrak kesua aki dong ke taklak are kovok.

⁷ E londo leklou tiduru timunu ke omur ka galou marak tidong ine e londo tikaranga tinobolbol kovok kesua galou marak kading isak.

⁸ E londo leklou tiduru timunu ke talkak itau e tinobolbol e alo ka isak anino erine tiusu otna pula langka buno kene.” Yesus wai langane deka iye gi ke osep langane. “Langka umakaranga umoklingen pelengon ano deka umoklingen itau.”

Yesus wai ke pelengon ano vala

⁹ Mase Yesus ila disaipel time e tipmi iye ke pelengon ano lana ine.

¹⁰ Deka Yesus koli wai ke isak langane. “Ida Tapolngon songon ngong ma ngapalongo lumu ke pelengon kukwop ka la ke omur heven ka Ida Tapolngon plaue. E ke osep leklou ngawai ke pelengon ano vala ma amtarsak vati wan bitna bitna e dau tivati itau kovok e talsak klingen e dau tile ine kovok.

Yesus kere pelengon ano ka la ke gute ka lila ser wit londo

¹¹ “E pelengon ano lana ine langane. Londo tonari Ida Tapol-ngon ila pelengon.

¹² Londo ka tiduru timunu ke ekreng isak langka osep ka tiklingen omon itau deka Satan me pi omon ke aitno lisak ma aitno lisak karanga la dagar ine kovok e Ida Tapolngon lua isak ke urok elio epmes ina kovok.

¹³ E londo ka tiduru timunu ke taklak ka isuk boto vala ka napal munu ke opmu tona isak langka osep ka tiklingen omon itau e suong bara lisak due e aitno lisak neser ine. E dau tidong dagar ine kovok kesua isak langka wit erine ka gigitno kovok e aitno lisak dagar sasi boto vala e alo ka tokngon polou ke isak io tisongon aitno lisak ila dagar.

¹⁴ E londo ka tiduru timunu ke omur ka galou marak dong ine isak langka osep ka tiklingen omon itau e dau aitno lisak kro ke wan ka taklak ane ina. E aitno lisak mter ke wan bitna bitna ke taklak ka due aitno lisak itau e aitno lisak mter pula ke mani. E londo tonari anino kovok.

¹⁵ E londo ka tiduru timunu ke taklak itau isak langka osep ka tiklingen omon itau e tikise dagar. E aitno lisak mter osuk e itau e tivri dagar e anino itau.”

Yesus wai pelengon ano ke lam

¹⁶ E Yesus wai blang langane. “Gute gesa bik lam deka kadinge ke gimare koke due dong ke kova bisna kovok. Aurou. Iye due dong ke wan ka dong egim ma osep ka tisep ke eliang tikaranga tivati omur itau.

¹⁷ Kesua wan ka kukwop oku ane mase ma polou malak e wan ka osep tibisi ine oku ane mase ma osep tivati e tile ine.

¹⁸ Deka umeile umu itau ma umoklingen pelengon itau. Kesua gute ka wan dong ke iye ma iye due wan leklou e gute ka wan dong ke iye kovok Ida Tapolngon ma pi wan ka aitno vala mter dong ke iye.”

Yesus tna e ina saiver time ke iye

¹⁹ Deka Yesus tna e ina saiver time e tikaranga tipolou ke iye kovok kesua osep pula pula tidangdang isak.

²⁰ E gute gesa wai ke Yesus langane. “Aiya e ngap saiver tidong ke dogur e tiwaiki tiwai ke wom.”

²¹ E Yesus koli wai langane. “Nina e ngau saiver isak osep ka tiklingen Ida Tapolngon ila pelengon e tididie.”

Yesus wai deka engen omba yagos

²² Ke oklou kene Yesus sep ke bot kap ila disaipel e wai ke isak langane. “Ma itala ke elim ane burla.” Deka tisongon aki ina dingen batne ma tibru elim.

²³ E alo ka isak kla Yesus munu kudung. Deka engen omba polou ke elim e aki sep ke bot e isuk boto bot gro e elio ane kakluk metengen.

²⁴ Deka ila disaipel isak kla ke iye e tidue tipa e tiwai ke iye langane. “Ipem Puda isuk boto ma itemete.” Deka alo ka iye tipa iye wai dagar ke engen e boitini omba ma isak yagos e lokono isak yagos e aki mete.

²⁵ E iye wai ke ila disaipel langane. “Lange? Aitno lumu ila dagar dong ge?” E tilim e tidigrik e tiwai pulu langane. “Gute ane lange? Kesua iye wai deka engen e boitini tini ila pelengon.”

Yesus sapir angelo soulu ke gute kene

²⁶ Mase tipolou ke omur ka osep Gerasa ina tidong ine ka dong ke elim burla ke omur Galili.

²⁷ E alo ka Yesus songon bot gute kene ke armok are soson iye. E angelo soulu pula tidong ke gute e tauni iye dong tena ovuk e dong ke ninu kovok. Aurou. Iye dong ke omur ka denga ina.

²⁸ Alo ka iye vati Yesus iye daiku omba e gene ke Yesus bitna. Iye gene deka ngangir langane. “Yesus wom ka Ida Tapolngon ka dong egim lokono Otno Arang amwaiki omdue sua ke ngong? Ngapmi wom dagar ma omdue agegeng ke ngong kovok.”

²⁹ Iye wai langane kesua Yesus wai dagar ma angelo soulu tisongon gute tonari. Oglou aling pula osep tipou limla e kamla ke sen e tiplau iye itau e dau angelo soulu tidue deka iye trum sen deka angelo soulu tipagei iye la ke omur ka dong adai vala.

³⁰ Deka Yesus pmi iye langane. “Angain wom sei?” E gute koli wai langane. “Angain ngong Ami.” Kesua angelo soulu pula pula tidong ke iye.

³¹ E angelo soulu tonari tipmi Yesus dagar ma iye sapir isak kla ke ovuk ka duru moli lokono ka angelo soulu tidong ine kovok.

³² E ovar pula tidong ke gigri ari e tingen inarak ngangon. E angelo soulu tipmi Yesus dagar ma iye songon isak kla tisep ke ovar tonari. E Yesus songon isak kla tisep ke ovar.

³³ Deka angelo soulu tisongon gute e tisep ke ovar deka ovar keniye tisuong tiduru ke perper e tisep ke aki e tiunim ine.

³⁴ Osep ka tiplau ovar tonari tivati elio are deka tiulou kla e tipalongo elio ane ke osep ka tidong ke armok e ke omur ka lelei armok.

³⁵ E osep isak kla ma tile elio ka polou deka tipolou ke Yesus e tivati gute ka angelo soulu tisongon iye. E iye tnei klos e dong ke Yesus kamla e manga manga kovok. Aurou. Aitno malak e iye mter itau. E osep tonari tiulou tarna lisak ke elio ane.

³⁶ E osep ka tivati elio ka polou kodong tipalongo osep ke wan ka polou ma gute ka oglou angelo soulu tidong ke iye polou itau blang.

³⁷ Deka osep ka pula keniye ke omur Gerasa tiulou tarna lisak omba e tipmi Yesus ma iye songon isak e la. Deka Yesus sep ke bot ma iye iding ke aki burla.

³⁸ E gute ka angelo soulu tisongon iye pmi Yesus dagar ma iye la kap iye. E Yesus pagei iye la e wai ke iye langane.

³⁹ “Emiding ke lem osua e ampalongo urok ke wan keniye ka Ida Tapolngon due ke wom.” Deka gute la e napapra ke osep ka pula keniye ke armok ke wan ka Yesus due ke iye.

Yesus due Jairus otopmang poga tito e lua apmang silang ka paia

⁴⁰ Alo ka Yesus iding polou ke elim burla osep pula pula aitno lisak neser kesua tipara ke alo ka iye iding.

⁴¹ Deka gute gesa ka plau osep Yuda ina urok duningen ina ninu ka angaine Jairus polou e grum kamla ke Yesus bitna e wai dagar ine ma iye me ke ila ninu.

⁴² Kesua otopmang ka kene vala ka ina tobor langka songotno orwo isuk boto mete. E alo ka Yesus lila la ke gute ila ninu osep pula pula tipes iye.

⁴³ E apmang kene dong ka ina marau baser ke tobor songotno orwo e gute gesa karanga due polou itau kovok.

⁴⁴ Apmang tonari polou ke Yesus dogurne e limla kai ila molo ene e lokono ina marau baser kovok.

⁴⁵ Deka Yesus pmi osep langane. “Sei kai ngong?” E osep tiwai tikai iye kovok deka Pita wai ke iye langane. “Ngau Puda osep pula pula tidong lelei wom e tipes wom.”

⁴⁶ E dau Yesus wai langane. “Gute gesa kai ngong kesua nganamani arit polou la ke ngong.”

⁴⁷ Deka apmang ile iye karanga bisi ila elio kovok e nakarkar e me grum kamla ke Yesus bitna. E ke osep amtarsak iye wai ke batne lange iye kai Yesus e elio ka lokono iye polou itau blang.

⁴⁸ E Yesus wai ke apmang tonari langane. “Aiya aitno lugom ila dagar due wom ompolou itau blang. Amla e aitno lugom epen.”

⁴⁹ Alo ka Yesus dau wai ka apmang gute kene me ke gute plaungan ina ila ninu e wai ke iye langane. “Etim apmang mete kodong. E oku ane omdue wan ka opru gute parerengen ina kovok.”

⁵⁰ E Yesus klingen omon tonari e wai ke Jairus langane. “Emlim sakam. Aitno lugom dagar vala e ma iye polou itau blang.”

⁵¹ Alo ka iye polou ke ninu iye songon Pita e Jon e Jems e apmang timla e tna vala tisep ke ninu kap iye. E osep leklou kovok.

⁵² E osep pula tidong ke ninu e tikngis e urok sisngen omba ke apmang ka mete. Deka Yesus wai ke isak langane. “Umekngis sakam kesua iye munu kudung vala.”

⁵³ E tivel kesua tile apmang mete kodong.

⁵⁴ Deka Yesus kis apmang limla e wai ke iye langane. “Mimi emtito.”

⁵⁵ Yesus wai langane deka ano iding ke apmang e lokono iye tito vri. Deka Yesus wai ke timla e tna ma tikar ngangon gesa ke iye ma iye ngene.

⁵⁶ E timla e tna tidigrik e Yesus wai dagar ke isak ma tipalongo osep ke elio ka polou kovok.