Luk 3 - Aria New Testament

Jon ka paunim osep napapra pelengon

¹ Ke tobor songotno elme ina ke alo ka gute Sisar ka angaine Taiberius vri mgo ke osep Rom ina Pontius Pailat plau omur Judia e Herot plau omur emkil Galili. E ina aiver Filip plau omur emkil Ituria e Trakonitis e gute Lisanias plau omur emkil Abilene.

² E gute Anas deka mase gute Kaiafas tidong gute loulou ina ka mgo. E Ida Tapolngon ila pelengon me ke gute Sekaraia otno arang Jon alo ka iye dong ke omur ka dong adai vala.

³ Deka iye la ke omur ka dong lelei aki Jordan e napapra ma osep tibauluk aitno lisak e tidue elio paunimngen ina. Elio paunimngen ina tonari nisngen vala ke elio ka tibauluk aitno lisak ma Ida Tapolngon sak urok elio epmes ina la.

⁴ Eriar langka dong ke buk ka gute napaprangan ina Aisaia sogoe ka wai langane. “Gute kreine daiku ke omur ka dong adai vala langane. ‘Umomosi Ida Puda ila ekreng e umodue osuk vala.

⁵ Umononei omur ka glong glong ke taklak e umayas gigri omba e gigri daudeng ma tiduru e umodue ekreng ka kolok polou osuk e umodue ekreng ka tris tris polou itau.

⁶ Ma osep ka pula keniye tivati elio ka Ida Tapolngon due ma iye lua osep ke urok elio epmes ina.’”

⁷ E Jon wai ke osep pula pula ka time ma iye paunim isak langane. “Umu langka mota ka soulu titno. Sei wai ke umu ma umawaiki umokos ke Ida Tapolngon aitno ila engil ka ma me?

⁸ Umodue elio itau ka nis osep umabauluk aitno lumu. E aitno lumu mter langane kovok. ‘Ite Abraham ila napakngan.’ Kesua ngawai langane. Ida Tapol-ngon karanga due opmu ane e due Abraham ila napakngan ine.

⁹ E selembo dong redi olwo boto ke akai batne kodong e akai keniye ka tiusu otna itau kovok ma osep tiblou isak e tiuri isak ke eiou.”

¹⁰ Deka osep pula pula tipmi iye langane. “Langka langane ma imodue wansua?”

¹¹ E Jon koli wai ke isak langane. “Gute ka ila molo orwo dong ma iye kar kene ke gute ka ila molo dong kovok e gute ka ina ngangon dong ma due langane blang.”

¹² E osep ka tidue takis leklou time blang ma iye paunim isak e tipmi iye langane. “Gute parerengen ina ma imodue sua?”

¹³ Deka Jon koli wai ke isak langane. “Umodue mani ka takis ina ka osep gavman ina tiwai ine vala e umodue mani silang kovok.”

¹⁴ E osep ola ina leklou blang tipmi iye langane. “E wansua ke imi? Ma imodue sua?” E iye koli wai ke isak langane. “Umapagei osep ma umodue mani ke isak kovok e umesin pelengon yakngan vri ke osep kovok. E aitno lumu itau ke mani ka umodue ke lumu bokongon vala.”

¹⁵ E osep ka tivati elio tonari tidong tipara ke wan ka ma polou ke iye e aitno lisak mter langane. “Jon iye gute Krais ka Ida Tapolngon rere ma iye lua osep ke urok elio epmes ina koke aurou?”

¹⁶ E Jon wai ke isak langane. “Ngapaunim umu ke aki vala e mase gute ma me ka ila arit mole lou arit e ngong gute itau ma ngakaranga ngakles ila su kovok. Ma iye paunim umu ke Ano Itau e ke eiou.

¹⁷ E iye kis wan ka iye wade wit erine ke wit otna ine e ma iye gir omur ka timluk wit erine ine ma otna tipolou deka iye gom wit otna ke yage ina ngangon ila ninu. E iye ma uri wit tokonkon ke eiou ka ina yagosngon kovok.”

¹⁸ E ke pelengon dagar pula leklou Jon wai ke osep e napapra omon itau ke isak.

Herot due Jon sep ke kalabus

¹⁹ E Jon wai malak ke gute Herot ka plau omur emkil are ke ila elio ka iye due ina aiver ila asap angaine Herodias e asap iye e ke ila elio soulu leklou ka iye due.

²⁰ Deka Herot due elio soulu silang langane. Iye due Jon sep ke kalabus.

Jon paunim Yesus

²¹ E alo ka tidue Jon sep ke kalabus dau kovok osep pula tidue elio paunimngen ina. E Yesus blang due elio paunimngen ina e alo ka iye wai itau ke Ida Tapolngon omur heven noklok.

²² E Ano Itau langka belis duru dong ke Yesus e kreine wai ke omur heven langane. “Wom erigu arang ka ngong lana ngong ke wom e aitno lungong itau lokono ke wom.”

Yesus ila osua angainsak

²³ E Yesus ina tobor iseklu alo ka iye nogrum boko ke Ida Tapolngon ila bokongon. Osep pula aitno lisak mter iye gute Josep otno arang. E Josep gute Heli otno arang.

²⁴ E Heli gute Matat otno arang e Matat gute Livai otno arang e Livai gute Melki otno arang e Melki gute Janai otno arang e Janai gute Josep otno arang.

²⁵ E Josep gute Matatias otno arang e Matatias gute Amos otno arang e Amos gute Nahum otno arang e Nahum gute Esli otno arang e Esli gute Nagai otno arang.

²⁶ E Nagai gute Mat otno arang e Mat gute Matatias otno arang e Matatias gute Semen otno arang e Semen gute Josek otno arang e Josek gute Joda otno arang.

²⁷ E Joda gute Joanan otno arang e Joanan gute Resa otno arang e Resa gute Serubabel otno arang e Serubabel gute Sealtiel otno arang e Sealtiel gute Neri otno arang.

²⁸ E Neri gute Melki otno arang e Melki gute Adi otno arang e Adi gute Kosam otno arang e Kosam gute Elmadam otno arang e Elmadam gute Er otno arang.

²⁹ E Er gute Josua otno arang e Josua gute Elieser otno arang e Elieser gute Jorim otno arang e Jorim gute Matat otno arang e Matat gute Livai otno arang.

³⁰ E Livai gute Simeon otno arang e Simeon gute Juda otno arang e Juda gute Josep otno arang e Josep gute Jonam otno arang e Jonam gute Eliakim otno arang.

³¹ E Eliakim gute Melea otno arang e Melea gute Mena otno arang e Mena gute Matata otno arang e Matata gute Natan otno arang e Natan gute Devit otno arang.

³² E Devit gute Jesi otno arang e Jesi gute Obet otno arang e Obet gute Boas otno arang e Boas gute Salmon otno arang e Salmon gute Nason otno arang.

³³ E Nason gute Aminadap otno arang e Aminadap gute Atmin otno arang e Atmin gute Arni otno arang e Arni gute Hesron otno arang e Hesron gute Peres otno arang e Peres gute Juda otno arang.

³⁴ E Juda gute Jekop otno arang e Jekop gute Aisak otno arang e Aisak gute Abraham otno arang e Abraham gute Tera otno arang e Tera gute Nahor otno arang.

³⁵ E Nahor gute Seruk otno arang e Seruk gute Reu otno arang e Reu gute Pelek otno arang e Pelek gute Eber otno arang e Eber gute Sela otno arang.

³⁶ E Sela gute Kainan otno arang e Kainan gute Arpaksat otno arang e Arpaksat gute Siem otno arang e Siem gute Noa otno arang e Noa gute Lamek otno arang.

³⁷ E Lamek gute Metusela otno arang e Metusela gute Enok otno arang e Enok gute Jaret otno arang e Jaret gute Mahalalel otno arang e Mahalalel gute Kenan otno arang.

³⁸ E Kenan gute Enos otno arang e Enos gute Set otno arang e Set gute Adam otno arang e Adam Ida Tapolngon otno arang.