Luk 23 - Aria New Testament

Tipaur Yesus ke Pailot bitna

¹ Deka isak keniye titito e tipaur Yesus la ke Pailot.

² Tipolou ke Pailot bitna e tisin elio vri ke Yesus e tiwai langane. “Imavati gute ane pagolgol imi osep Yuda ina aitno limi. Iye waiki imekli takis ke Sisar kovok e wai iye tona gute Krais ka Ida Tapolngon rere ma iye lua osep e iye vri mgo ke isak.”

³ E Pailot pmi Yesus langane. “Wom gute ka vri mgo ke osep Yuda ina?” Deka Yesus koli wai ke iye langane. “Wom tona amwai ine.”

⁴ Deka Pailot wai ke osep loulou ina ka omba e osep pula pula langane. “Ngaklingen lumu pelengon e aitno lungong mter lumu sinngen elio ke gute ane batne dong kovok.”

⁵ E tiwai dagar langane. “Gute ane sruk osep aitno lisak ke omur Judia keniye nogrum ke omur Galili e me ke armok ane.”

⁶ Alo ka Pailot klingen pelengon tonari iye pmi isak langane. “Gute ane gute Galili ina i?”

⁷ E alo ka iye ile Yesus me ke omur Galili ka Herot plaue iye vai iye ke Herot. Kesua alo ari Herot dong ke Jerusalem blang.

Yesus dong ke Herot bitna

⁸ Alo ka Yesus polou ke Herot bitna Herot aitno itau kesua ke tauni kodong iye klingen omon ke wan bitna bitna ka Yesus due e waiki vati iye. Iye waiki vati Yesus due elio arit ina gesa.

⁹ E Herot pmi Yesus ke pmingen pula e Yesus koli wai ke Herot kovok.

¹⁰ Deka osep loulou ina ka omba e osep ka tile itau ke Moses ila sogongon tivri olwo boto e tiwai dagar e tisin elio vri ke Yesus.

¹¹ Deka Herot kap ila osep ola ina tidue elio soulu e tiwai apok ke iye. E titnei Yesus ke molo ka itau lokono e tivai iye iding ke Pailot.

¹² E langane. Oglou Herot e Pailot aitno lisak soulu pulu e nogrum ke oklou are aitno lisak itau pulu.

Pailot waiki songon Yesus la

¹³ Deka Pailot gi osep loulou ina ka omba e osep kaunsil ina e osep leklou ma time tiduni pulu ke bitna.

¹⁴ E iye wai ke isak langane. “Umapaur gute ane me ke ngong e umawai iye sruk osep aitno lisak ma aitno lisak soulu ke osep gavman ina. Ngaklingen ila pelengon ke omtomu e aitno lungong mter lumu sinngen elio ke gute ane batne dong kovok.

¹⁵ E Herot aitno mter langane blang kesua iye vai iye iding ke ite. Gute ane due elio gesa ma imemter iye ma iye mete ine kovok.

^16-17 Ke batne ane ma ngaules iye e ngasongon iye la.”

Pailot wai ma tinilim Yesus ke ina akai

¹⁸ E osep ka pula keniye tidaiku langka kre lisak kene lang-ane. “Umemter gute are ma iye mete e omsongon Barabas ke imi.”

¹⁹ Ke oglou osep Rom ina tidue Barabas sep ke kalabus kesua iye sruk osep aitno lisak ma tidue evlei ke gavman ke armok are e silang blang iye due burwa ke gute gesa.

²⁰ E Pailot waiki songon Yesus la e iye wai ke isak ine blang.

²¹ E aling aling tidaiku omba langane. “Umenilim iye ke ina akai. Ma iye mete ine.”

²² E aling eklu ina Pailot wai ke isak langane. “Ina lange ma iye mete? Iye due elio soulu lange? Ngaklingen ila pelengon e aitno lungong mter ila elio soulu dong ke iye ma iye mete ine kovok. Ma ngawai ke osep tiules iye deka ngasongon iye la.”

²³ E tidaiku omba e tiwai dagar ma tinilim iye ke ina akai e sasi boto sasi boto urok pelengon mole Pailot ila pelengon.

²⁴ Deka Pailot didi urok pelengon e iye wai ma Yesus mete.

²⁵ E iye songon gute ka dong ke kalabus kesua iye sruk osep aitno lisak ma tidue evlei ke gavman e iye due burwa ke gute gesa. Iye gute ka osep tiwaiki Pailot songon iye la. E Pailot vai Yesus ke osep ola ina ma tididi wan ka osep tiwaiki tidue.

Osep ola ina tinilim Yesus ke ina akai

²⁶ E alo ka osep ola ina tipaur iye la tisoson gute kene ka angaine Saimon ka ila armok batne Sairini. Iye lila ke omur ka lelei Jerusalem e me ke armok. Tikis iye e tidue Yesus ina akai dong ke agune e tipagei iye la batne ke Yesus.

²⁷ E osep pula pula tididi iye e apmang pula aitno lisak soulu e tikngis omba ke Yesus.

²⁸ E Yesus bauluk e wai ke isak langane. “Umu apmang Jerusalem ina umekngis ke ngong kovok. Aurou. Umekngis ke umu tona e titopmu.

²⁹ Umoklingen. Mase ma osep tiwai langane. ‘Apmang ka isak opon e apmang ka tidivir mimi kovok e tipainim mimi kovok aitno lisak itau itau.’

³⁰ E ma tiwai ke gigri omba e gigri daudeng langane. ‘Umegene ke imi e umakading imi.’

³¹ Kesua langka osep tidue elio langane ke ngong ka langka akai ka olune dong ine ma tidue wansua ke umu ka umodong langka akai ka kakrak?”

³² E osep ola ina tipaur osep orwo blang ka isak osep soulu bitna ma timete blang.

³³ Alo ka tipolou ke omur ka tisire omur ka baraine erine tinilim Yesus ke ina akai e tinilim gute soulu bitna kene ke galna gala e tinilim gute soulu bitna silang ke galna odung.

³⁴ E Yesus wai itau ke Ida Tapolngon langane. “Livou amsak urok elio kesua tile omur ke wansua ka tidue kovok.” E osep ola ina tiuri opmu ka nisngen dong ine e tiwade Yesus ila klos ine.

³⁵ Osep tivri e tipalem wan ka polou e osep kaunsil ina tidue apok ke iye e tiwai langane. “Iye lua osep leklou e oku ane langka iye gute ka Ida Tapolngon rere Krais ma iye lua osep ma iye lua iye tona blang.”

³⁶ E osep ola ina blang tidue apok ke iye e tipolou olwo boto ke iye e tiwaiki tikar iye galou wain ka meli.

³⁷ E tiwai ke iye langane. “Langka wom gute ka vri mgo ke osep Yuda ina omlua wom tona.”

³⁸ E tidue sogongon dong egim ke Yesus ka wai langane. “Gute ane gute ka vri mgo ke osep Yuda ina.”

³⁹ E gute soulu bitna kene ka mana ke ina akai wai pelengon soulu ke Yesus langane. “Wom gute Krais ka Ida Tapolngon rere ma omlua osep i? Omlua wom tona e omlua imi blang.”

⁴⁰ E gute soulu bitna silang wai dagar ke iye langane. “Omdue anit ke Ida Tapolngon kovok i? Kesua tiwai emmete langka tiwai iye mete.

⁴¹ E tidue elio osuk ke ite kesua oku ane udo elio ngen ite. E iye due wan gesa ka soulu kovok.”

⁴² Deka iye wai ke Yesus langane. “Yesus emtem sisir ngong alo ka emiding e emvri mgo ke omur ka pula keniye.”

⁴³ E Yesus koli wai ke iye langane. “Ngawai lokono ke wom langane. Eknikane ma omdong kap ngong ke omur ka itau lokono.”

Yesus mete

⁴⁴ Oklou airavu polou e aivoro kading omur are la lama iding ke 3 kilok ke kirui.

⁴⁵ Osep tikaranga tivati oklou kovok e molo ka botom ka dong ke Ida Tapolngon ila ninu notrum ke emkil orwo.

⁴⁶ E Yesus daiku omba langane. “Livou ngakar anngong ke wom.” Iye wai langane deka iye mete.

⁴⁷ E alo ka gute ka plau osep ola ina buno kene vati wan ka polou iye kakai Ida Tapolngon angaine tito la egim e wai langane. “Lokono gute ane iye gute ka osuk lokono e ila elio vri ke iye kovok.”

⁴⁸ Alo ka osep pula pula ka tiduni pulu ma tipalem elio ane tivati wan ka polou aitno lisak soulu e aitno lisak kro ine e timluk omun lisak. Elio ane nisngen ke elio ka aitno lisak soulu. Deka isak kla tiding ke urok ninu ninu.

⁴⁹ E Yesus ila saten kap apmang ka tididi iye nogrum ke alo ka iye songon omur Galili e me ke Jerusalem tivri mawa boto e tipalem wan ka polou.

Osep tiyas Yesus pampamu ine

⁵⁰ E ari gute kene dong ka angaine Josep. Iye me ke armok Arimatea ka dong ke omur Judia. E iye gute kaunsil ina ka ila elio itau e osuk.

⁵¹ E aitno kene ke wan ka osep kaunsil ina lelkou tilalo e tidue kovok. E iye dong para ke alo ka omur ka Ida Tapolngon plaue ma polou.

⁵² E iye la ke Pailot e pmi iye ma iye karanga due Yesus pampamu ine.

⁵³ E iye due Yesus pampmau ine duru ke ina akai e dugume ke molo ka okou. Deka iye due sep ke denga ka osep tiyase ke opmu ka oglou gute gesa pampamu ine munu ine kovok.

⁵⁴ Oklou are oklou ka tirere wan ka oklou sabat ina e isuk boto oklou sabat polou.

⁵⁵ E apmang ka time ke omur Galili e tididi Yesus ke Jerusalem tididi Josep e tivati denga tonari e tivati elio lange ka Josep due ma Yesus pampamu ine munu ine.

⁵⁶ Deka isak kla ke urok ninu e tikere wel e wan ka amna itau ka tiwaiki tisake ke Yesus pampmau ine. E tididi Moses ila sogongon e timtong ke oklou sabat.