Luk 22 - Aria New Testament

Judas wai ma iye lai Yesus ina

¹ E isuk boto rogo omba ka osep Yuda ina tidue alo ka tingen bret ka yis dong ine kovok ka tisire blang oklou ka Ida Tapolngon lua isak tisongon omur Isip polou.

² E osep loulou ina ka omba e osep ka tile itau ke Moses ila sogongon tikrim ekreng ma tidue burwa ke Yesus kesua tilim ke osep.

³ E Satan sep ke Judas ka tisir iye blang Iskariot aitno. Judas tonari iye gute kene ke Yesus ila disaipel songotno orwo.

⁴ E Judas la ke osep loulou ina ka omba e osep ka timgo ke osep ka tiplau Ida Tapolngon ila ninu. E iye wai pulu kap isak ke elio ka ma iye lai Yesus ina ke isak.

⁵ Aitno lisak itau lokono ke iye e tiwai ma tikar iye mani ine.

⁶ Judas wai ma iye due e la krim ekreng ma iye karanga lai Yesus ina ke isak alo ka osep pula pula tile ine kovok.

Yesus ila disaipel orwo tikere ngangon

⁷ Rogo omba ke alo ka tingen bret ka yis dong ine kovok ina oklou mgongon polou. E ke oklou kene ina tidue elio opmu ina ke sipsip otno ma amtarsak sisir alo ka Ida Tapolngon lua isak tisongon omur Isip.

⁸ E Yesus wai ke Pita e Jon langane. “Umala umekere wan bitna bitna ma itangen rogo omba ina ngangon.”

⁹ E tipmi iye langane. “Ma imekere wan bitna bitna ke omur ge?”

¹⁰ Deka Yesus koli wai ke isak langane. “Umoklingen. Umala e alo ka umesep ke armok ma umososon gute ka iye kalke aki tarna. E umedidi iye ke ninu ka iye sepe.

¹¹ E umawai ke ninu ina gute langane. ‘Limem gute parerengen ina waiki imepmi wom langane. “Eliang kaulei ina ma ngangen rogo omba ina ngangon kap lou disaipel ine dong ge?”’

¹² Deka iye ma nis umu ke eliang omba ka dong egim ka ina bota e kova dong ine kodong. Ma umekere rogo omba ina wan bitna bitna are.”

¹³ Deka tisongon iye e isak kla e wan ka iye wai ine polou e tikere wan bitna bitna ari.

Yesus kar bret e aki wain ke ila disaipel

¹⁴ Taim ka tingen rogo omba ina ngangon polou e Yesus kap ila aposel tidong ke bota.

¹⁵ E iye wai ke isak langane. “Ngawaiki lokono ngangen rogo omba ina ngangon ane kap umu mgo ke alo ka nganamani elio soulu e tarna lungong doro doro ine ka osep ma tidue ke ngong.

¹⁶ E ngawai ke umu langane. Ma ngangen rogo omba ane ina ngangon blang kovok la lama rogo omba ane lana ine polou lokono ke omur ka Ida Tapolngon plaue.”

¹⁷ E iye due kap ka aki wain dong ine e wai tenkyu ke Ida Tapolngon ine deka wai ke isak langane. “Umodue kap ane e umotongo ine ke umu.

¹⁸ E ngawai ke umu langane. Ma ngainim aki wain aling kene blang kovok la lama omur ka Ida Tapolngon plaue polou.”

¹⁹ E iye due bret e wai tenkyu ke Ida Tapolngon ine e tuktuke e kare ke isak e wai langane. “Bret ane pampamu lungong ka ngakare ma lua umu. Aling aling alo ka umengen bret langane omtomu sisir ke ngong.”

²⁰ Alo ka tingen yagos iye due kap ka aki wain dong ine e wai ke isak langane. “Aki wain ane iye kontrak oku ka ngadue ke ngau marau ka baser ma lua umu.

²¹ E umoklingen. Gute ka lai ngong ngau limla dong ke bota kap lungu.

²² Lokono. Gute Ka Polou Langka Osep ma didi ekreng ka didi Ida Tapolngon aitno e aisudo ke gute ka lai iye ina.”

²³ Iye wai langane deka tinogrum tipmi isak pulu langka sei ke isak ma due elio tonari.

Yesus ila disaipel tituktuk pelengon pulu langka sei dong omba ke isak

²⁴ Deka ila disaipel tituktuk pelengon pulu langka sei ke isak ma dong omba e mgo ke isak.

²⁵ E Yesus wai ke isak langane. “Osep ka tivri mgo ke omur omur ke osep ka isak osep Yuda ina kovok tipagei isak e osep ka urok arit omba tiplau isak e osep tisir isak osep ka tidue tovro itau.

²⁶ E umodue elio langane sakam. Gute ka omba ke umu ma iye dong langka ina tobor awal boto e gute ka mgo ma iye dong langka gute bokongon ina.

²⁷ Aitno lumu lange? Sei omba? Gute ka dong ke bota e ngen ngangon koke gute bokongon ina ka kar ina ngangon ke iye? Gute ka dong ke bota iye gute ka omba. E dau ngadong kap umu langka ngong gute bokongon ina.

²⁸ E umu osep ka umodong kap ngong alo ka tokngon bitna bitna tipolou ke ngong.

²⁹ Livou kar omur ka ma ngavri mgo ine ke ngong e eriar langane ngarere umu ma umodong langane.

³⁰ Ke omur ka ngavri mgo ine ma umodong ke lou bota e umangen e umeinim kap ngong. E ma umodong ke kova kova langka osep ka tiplau omur omur e umawade osua songotno orwo ke osep Israel ina.”

Yesus wai ma Pita wai iye ile Yesus kovok

³¹ E Yesus wai blang langane. “Saimon emklingen. Satan pmi Ida Tapolngon ma iye karanga tok aitno lumu ila dagar langka gute uri wit otna ke egim ma engen ipu wit tarna la. E Ida Tapolngon songon iye ma iye due.

³² E ngawai itau ke Ida Tapolngon ke wom ma aitno lugom ila dagar dong dagar. E alo ka ambauluk e emiding ke ngong ngawaiki omdue lem osua aitno lisak ila dagar tidong dagar lokono.”

³³ E Pita koli wai ke iye langane. “Ngau Puda langka osep tidue wom emsep ke kalabus ma ngasep kap wom e langka tidue burwa ke wom ma emmete ma ngamete kap wom.”

³⁴ E Yesus koli wai ke iye langane. “Pita ngawai lokono ke wom langane. Ke epmes ane mgo ke alo ka kwako bole wai aling kene ina ma amwai emile ngong kovok aling eklu.”

Yesus wai ke ila disaipel ke elio ka ma tidue

³⁵ E Yesus wai ke ila disaipel langane. “Alo ka oglou ngapagei umu ma umala umodue lou bokongon ngawai ke umu langane. ‘Umakalke lumu mani ina bek koke lumu kerka koke umesep ke lumu su kovok.’ E alo ari lumu wan bitna bitna karanga ke umu koke aurou?” E tikoli tiwai langane. “Ee. Limem wan bitna bitna karanga ke imi.”

³⁶ Deka Yesus wai ke isak langane. “E oku ane langka lumu mani ina bek dong deka umakalke e umakalke lumu kerka blang. E langka lumu elil omba dong kovok umodue burong ke lumu klos alang e umekli lumu elil omba.

³⁷ Kesua oglou gute napaprangan ina gesa sogo ke elio ka ma polou ke ngong langane. ‘Osep tivati iye langka iye gute soulu bitna.’ E ngawai langane. Sogongon tonari ka me ke ngong isuk boto ma polou lokono.”

³⁸ Deka ila disaipel tiwai ke iye langane. “Ipem Puda amvati elil omba orwo dong ane.” E Yesus koli wai langane. “Are karanga.”

Yesus wai itau ke Ida Tapolngon ke gigri Oliv

³⁹ Yesus didi ila aiding e songon Jerusalem e la ke gigri Oliv e ila disaipel isak kla kap iye.

⁴⁰ Tipolou ke omur are deka Yesus wai ke isak langane. “Umawai itau ke Ida Tapolngon ma tokngon polou ke umu kovok.”

⁴¹ Iye songon isak e la isuk boto deka grum kamla e wai itau ke Ida Tapolngon.

⁴² E iye wai itau langane. “Livou langka aitno lugom itau ine ngawaiki amdangdang elio soulu ma tipolou ke ngong kovok. E dau ngawaiki emdidi aitno lungong ine kovok e ngawaiki emdidi aitno lugom ine vala.”

⁴³ *Yesus wai itau deka ensel kene me ke omur heven e lua iye ke ila arit.

⁴⁴ E Yesus aitno kro lokono e iye arit iye ma iye wai itau ke Ida Tapolngon e iye ulep e ina ulepngen gene ke taklak langka marau.

⁴⁵ Alo ka iye wai itau yagos iye tito e la ke ila disaipel e vati isak timunu kudung kesua aitno lisak soulu lokono.

⁴⁶ Deka iye pmi isak langane. “Ina lange umomunu kudung? Umetito e umawai itau ke Ida Tapolngon ma tokngon tipolou ke umu kovok.”

Judas lai Yesus ina

⁴⁷ Alo ka Yesus dau wai osep pula pula tipolou e Judas ka iye gute kene ke Yesus ila disaipel songotno orwo mgo ke isak. Iye me polou olwo boto ke Yesus ma iye ngen Yesus banga.

⁴⁸ E Yesus pmi iye langane. “Judas ma emngen banga lungong e amlai Gute Ka Polou Langka Osep ine i?”

⁴⁹ E alo ka osep ka tididi Yesus tile wan ka ma polou tipmi Yesus langane. “Ipem Puda ma imomluk isak ke limem elil omba koke aurou?”

⁵⁰ E gute kene ke isak mluk gute kene e blou tala odung la. E gute tonari iye wokboi nating ke gute loulou ina ka mgo.

⁵¹ E Yesus wai ke isak langane. “Umodong. Umodue langane sakam.” Deka limla kai gute tala e tala polou itau blang.

⁵² Deka Yesus wai ke osep loulou ina ka omba e ke osep ka timgo ke osep ka tiplau Ida Tapolngon ila ninu e ke osep namormor ke osep Yuda ina ka tiwaiki tidue langane. “Umomo e umakalke elil omba e akai ma umodue ngong langka ngong gute panakongon ina i?

⁵³ Oklou kene kene ngadong ke omur ka lelei Ida Tapolngon ila ninu e umekis ngong kovok. E oku ane lumu taim e Satan ka plau osep ka tidong ke aivoro kar arit ke umu ma umodue lumu elio.”

Pita wai iye ile Yesus kovok

⁵⁴ Deka osep tikis Yesus e tipaur iye la ke gute loulou ina ka mgo ila ninu. E Pita didi isak mawa boto.

⁵⁵ E alo ka osep tibik eiou ke omur ka dong ke ninu bitna e tidong lelei eiou tonari Pita la dong kap isak.

⁵⁶ Eiou bublo e apmang bokongon ina vati Pita e bitna nekek ke iye e wai langane. “Gute ane dong kap Yesus.”

⁵⁷ E Pita koli wai ke iye langane. “Apmang ngaile gute tonari kovok.”

⁵⁸ E mase isuk boto gute silang vati iye e wai langane. “Wom blang Yesus ila aten gesa.” E Pita koli wai ke iye langane. “Oka ngong ila aten gesa kovok.”

⁵⁹ Mase langka aua kene la kodong e gute silang wai dagar langane. “Ngawai lokono gute are dong kap Yesus kesua iye gute Galili ina blang.”

⁶⁰ E Pita koli wai ke iye langane. “Oka ngaile lem pelengon lana ine kovok.” E alo ka iye dau wai kwako bole wai.

⁶¹ E Ida Puda bauluk e bitna nekek ke Pita e Pita bitna sisir pelengon ka Ida Puda wai ke iye langane. “Oku ane mgo ke alo ka kwako bole wai aling kene ina ma amwai emile ngong kovok aling eklu.”

⁶² Deka Pita la ke dogur e kngis omba lokono.

Osep ola ina timluk Yesus

⁶³ Deka osep ka tiplau Yesus tiwai apok ke iye e timluk iye.

⁶⁴ E tikading bitna ke molo arlak ma iye karanga vati omur kovok e tiwai ke iye langane. “Amnapapra ke imi. Ampalongo limem gute sei mluk wom?”

⁶⁵ E tiwai pelengon leklou pula ka wai soulu ke iye.

Osep kaunsil ina tiklingen Yesus ila pelengon

⁶⁶ Alo ka oklou tito osep namormor e osep loulou ina ka omba e osep ka tile itau ke Moses ila sogongon tiduni pulu ke urok duningen ina ninu e osep tipaur Yesus ke amtarsak. E tiwai ke iye langane.

⁶⁷ “Langka wom Krais ka Ida Tapolngon rere wom ma omlua osep ke urok elio epmes ina amwai malak ke imi ine.” E Yesus koli wai ke isak langane. “Lama ngawai malak ke umu ine ma aitno lumu dagar ke lou pelengon kovok.

⁶⁸ E langka ngapmi umu ke pmingen gesa ma umokoli lou pmingen kovok.

⁶⁹ E nogrum ke oku ane e la ine Gute Ka Polou Langka Osep ma dong ke Ida Tapolngon ka ila arit ombatno limla odung.”

⁷⁰ E isak keniye tipmi iye langane. “Wom tona Ida Tapolngon Otno Arang i?” Deka Yesus koli wai ke isak langane. “Umu tona umawai lokono alo ka umawai ngong gute tonari.”

⁷¹ E tiwai omba langane. “Ma iteklingen gute silang ila sinngen elio koke aurou? Aurou. Iye tona wai ine kodong.”