Luk 2 - Aria New Testament

Maria divir Yesus

¹ Alo ari Sisar Ogastus wai pelengon dagar ma tidue sensis ke osep ka pula keniye ka tidong ke omur omur ka iye vri mgo ine.

² Ane sensis kene ina ka tidue alo ka gute Kwirinius plau provins Siria.

³ E osep ka pula keniye kla ke urok armok batne ma titik isak ke sensis.

⁴ E Josep songon ila armok Nasaret ka dong ke omur Galili e la ke Betleham ka Devit ila armok batne ka dong ke omur Judia kesua iye dong ke Devit ila osua.

⁵ E iye la kap Maria ka iye wai pulu ke iye ma iye gi iye. E Maria somugu kodong.

⁶ E alo ka tidong ke Betleham mimi ngen Maria.

⁷ E Maria divir ina sirngen otno arang e tikading iye ke molo arlak e tidue munu ke karoro ka ongwa aim tingen inarak ngangon ine. Tidue langane kesua spes dong ke isak ke ninu kaulei ina kovok.

Ensel palongo osep ka tiplau sipsip ke Yesus ina divirngen

⁸ Ke omur are sipsip ina plaungan tidong ke omur ka lelei armok e tiplau urok sipsip ke epmes.

⁹ E Ida Puda ila ensel gesa polou ke isak e Ida Tapolngon ila bublongon bublo lelei ke isak e tiulou tarna lisak omba ine.

¹⁰ E ensel tonari wai ke isak langane. “Umelim sakam. Umoklingen. Ma ngapalongo lumu ke omon itau ka due osep aitno lisak neser omba ine. E omon tonari me ke osep Israel ina ka pula keniye.

¹¹ Kesua eknikane ke Devit ila armok apmang gesa divir mimi e ma iye polou Upu Luangan ka iye Krais ka Ida Tapolngon rere ma iye lua osep ke urok elio epmes ina e ka iye Upu Puda.

¹² E wan ane nisngen ke umu. Ma umapado mimi ka tikading iye ke molo arlak e iye munu ke karoro ka ongwa aim tingen inarak ngangon ine.”

¹³ Ensel wai kodong deka suong ensel pula pula ka omur heven ina tipolou e tikakai Ida Tapolngon angaine tito la egim e tiwai langane.

¹⁴ “Itodue anit ke Ida Tapolngon ka dong egim lokono e itakakai angaine. E osep ka Ida Tapolngon aitno itau ke isak ke taklak ma aitno lisak epen.”

Osep ka tiplau sipsip kla tivati Yesus

¹⁵ Alo ka ensel tisongon isak e tiding ke omur heven sipsip ina plaungan tiwai pulu langane. “Ma itala itesep ke Betleham ma itavati wan ka polou ka ensel palongo udo ine.”

¹⁶ Deka isak kla suong e tipado Maria e Josep e mimi ka munu ke ongwa aim inarak ngangon ina karoro.

¹⁷ Tivati isak kodong deka tipalongo osep ke wan ka ensel wai ke isak ine ka la ke mimi tonari.

¹⁸ E osep ka pula keniye ka tiklingen ine aitno lisak mter pula ke wan ka sipsip ina plaungan tipalongo urok ine.

¹⁹ E Maria bitna sisir wan ka pula keniye ane e aitno mter ine.

²⁰ E sipsip ina plaungan tiding ke urok sipsip e tidue anit ke Ida Tapolngon e tikakai angaine tito la egim. Kesua wan ka tiklingen ine e wan ka tivati polou eriar langka ensel wai ke isak ine.

Tibaski Yesus angaine

²¹ Oklou epmes lumeklu mela yagos deka tiulang mimi e tibaski angaine Yesus ke iye. Angaine tonari angaine ka ensel wai ke Maria ine alo ka Maria dau somugu kovok.

Simeon orwo Ana tivati Yesus ke Ida Tapolngon ila ninu

²² Oklou polou ka Josep e Maria tididi Moses ila sogongon e tidue elio ka due isak tipolou eip ke Ida Tapolngon bitna alo ka divirngen kodong. E tipaur Yesus la ke Jerusalem ma tikar iye ke Ida Puda.

²³ Ma tididi Ida Puda ila pelengon dagar ka wai langane. “Ma umerere mimi arang ka sirngen ma iye Ida Puda ila gute.”

²⁴ E ma tidue elio opmu ina langka Ida Puda ila pelengon dagar wai ine langane. “Ma umakar belis orwo koke monuk otno silang orwo.”

²⁵ Alo ari gute dong ke Jeru-salem ka angaine Simeon ka dong itau e osuk ke Ida Tapolngon bitna e iye lotuim Ida Tapolngon. E Ano Itau dong ke iye e iye dong para ke alo ka gute ka Ida Tapolngon rere ma iye due elio ka opru osep Israel ina isak yagos iye polou.

²⁶ E Ano Itau nis iye ma iye mete kovok la lama iye vati gute ka Ida Puda rere Krais ka ma lua osep ke urok elio epmes ina.

²⁷ E Ano Itau due aitno e iye la ke Ida Tapolngon ila ninu. E Yesus timla e tna tipaur iye ari ma tididi wan ka Moses ila sogongon wai ine.

²⁸ Deka Simeon due Yesus ke limla e kakai Ida Tapolngon angaine tito la egim e wai langane.

²⁹ “Ngau Puda emdidi lem pele-ngon e oku ane aitno lungong epen e amkaranga omsongon lem gute bokongon ina ngong ma ngamete.

³⁰ Kesua ngavati gute ka emrere ma iye lua imi ke limem elio epmes ina.

³¹ Emrere gute ane ma osep ka pula keniye tivati iye.

³² Ma iye due bublongon bublo ke osep ka isak osep Yuda ina kovok e ma osep tidue anit ke lem osep Israel ina.”

³³ E Yesus timla e tna tidigrik ke wan ka Simeon wai ine ke Yesus.

³⁴ E Simeon wai ma Ida Tapolngon aitno itau itau ke isak e wai ke tna Maria langane. “Emklingen. Ida Tapolngon rere mimi ane ma iye due osep Israel ina pula tigene batne ke iye e iye due osep pula titito batne ke iye blang. E iye dong nisngen ke Ida Tapolngon aitno e ma osep pula tiwai soulu ke iye.

³⁵ E wan ka osep pula aitno lisak mter ine ma polou malak. E wan langka elil omba ma mter aitno lugom blang.”

³⁶ E apmang napaprangan ina ka angaine Ana dong ke Jerusalem. Timla angaine Fanuel ka iye dong ke gute Aser ila osua. E Ana lapun lokono kodong. Oglou alo ka iye dau bela iye gi e dong kap ila boget tobor lumorwo.

³⁷ Deka ila boget mete e Ana dong asap batne la lama alo ka ina tobor polou 84. E aling aling iye dong ke Ida Tapolngon ila ninu e songone kovok. Iye pli ina ngangon ma aitno la ke Ida Tapolngon e wai itau ke iye e lotuim iye ke oklou e epmes.

³⁸ Ke alo ari iye polou ke isak e wai itau ke Ida Tapolngon ke mimi. E wai ke isak ma mimi tonari lua osep Jerusalem ina ka tipara ke alo ka Ida Tapolngon lua isak ke urok elio epmes ina.

Josep isak tiding ke Nasaret

³⁹ E alo ka Josep e Maria tidue elio keniye ka Ida Puda ila pelengon dagar wai ine kodong tiding ke urok armok Nasaret ka dong ke omur Galili.

⁴⁰ E mimi rim polou omba e ila arit dong ke iye e ila ilengen omba e Ida Tapolngon ila makaingan dong ke iye.

Yesus iye auram e la ke Ida Tapolngon ila ninu

⁴¹ E timla e tna kla ke Jerusalem ke tobor kene kene ma tingen rogo omba ka lana ine la ke alo ka Ida Tapolngon lua osep Yuda ina tisongon omur Isip.

⁴² E alo ka Yesus ina tobor songotno orwo iye didi rogo omba tonari ina apu e la kap isak.

⁴³ E alo ka rogo omba yagos tisongon Jerusalem e Yesus dau dong ke Jerusalem e timla e tna tile ine kovok.

⁴⁴ Aitno lisak mter iye dong kap osep leklou ka tidue langan kap isak e tilila oklou kene deka tikrim ke iye ke urok osua e osep ka kla kap isak.

⁴⁵ E tipado iye kovok deka tiding ke Jerusalem ma tikrim ke iye.

⁴⁶ Tikrim ke iye oklou epmes eklu mela yagos deka tipado iye ke Ida Tapolngon ila ninu. Iye dong kap osep parerengen ina e iye klingen ke isak. E iye pmi isak ke pmingen blang.

⁴⁷ E osep ka pula keniye ka tiklingen ila pelengon aitno lisak mter pula ine batne ke ila ilengen ka omba e tidigrik ke ila kolingen blang.

⁴⁸ E alo ka timla e tna tivati iye tidigrik e tna pmi iye langane. “Erigu arang ina lange omdue elio langane ke imi? Ngong e abo aitno limi kro lokono e imekrim ke wom.”

⁴⁹ E iye koli wai ke isak langane. “Ina lange umekrim ke ngong? Umeile ngong ma ngadong ke Livou ila ninu kovok i?”

⁵⁰ E tile ila pelengon ka iye wai ke isak lana ine kovok.

⁵¹ Deka iye la kap isak e tiduru tipolou ke Nasaret e iye meit ke isak. E tna bitna sisir wan keniye tonari e aitno mter ine.

⁵² E Yesus rim polou omba e ila ilengen omba e osep aitno lisak itau ke iye e Ida Tapolngon aitno itau ke iye blang.