Luk 19 - Aria New Testament

Yesus la ke Sakius ila ninu

¹ Yesus sep ke Jeriko e waiki lila airavu deka songon armok.

² E umoklingen. Gute dong ke armok ka angaine Sakius ka iye gute mgongon ina kene ke osep ka tidue takis e ila mani pula.

³ E iye waiki vati Yesus ma iye ile ke iye e iye karanga kovok kesua iye gute bolbolo e osep pula pula tidangdang iye ine.

⁴ Deka iye suong mgo e tito ke akai gesa ma iye vati Yesus kesua iye ile ma Yesus didi ekreng are.

⁵ Alo ka Yesus polou ke akai tonari deka bitna tito e iye wai ke Sakius langane. “Sakius omsuong omduru ane kesua eknikane ma ngadong ke lem ninu.”

⁶ Deka iye suong duru e aitno itau ke Yesus e due sep ke ila ninu.

⁷ E alo ka osep tivati elio ane tinogrum tingurngur langane. “Yesus la dong kap gute epmes ina.”

⁸ E Sakius vri e wai ke Ida Puda langane. “Ngau Puda emklingen. Oku ane ma ngawade lou wan keniye ke emkil orwo ka eriar e ngakar emkil kene ke osep ka urok wan isuk boto vala. E langka ngayak gute gesa e ngadue ila mani ine ma ngakoli batne ke mani tonari aling apanal.”

⁹ E Yesus wai ke iye langane. “Eknikane Ida Tapolngon lua osep ka tidong ke ninu ane ke urok elio epmes ina. Kesua wom blang Abraham ila napakngan gesa.

¹⁰ E Gute Ka Polou Langka Osep me ke taklak ma iye krim e lua osep ka timina ke urok elio epmes ina.”

Wokboi nating songotno ka tidue mani ke inarak puda

¹¹ Alo ka osep tiklingen pele-ngon tonari Yesus wai pelengon ano ke isak. Kesua iye dong olwo boto ke Jerusalem e osep aitno lisak mter omur ka Ida Tapolngon plaue ma suong polou malak ke taim ari.

¹² Iye wai langane. “Gute gesa ka angaine omba la ke kantri mawa ma osep are tirere iye gute ka vri mgo ke urok kantri deka mase ma iye iding ke ila omur.

¹³ E iye gi ke osep songotno ke ila wokboi nating e kar mani gol kene ke isak kene kene e wai ke isak langane. ‘Umodue burong ke mani ane la lama ngaiding ngame.’

¹⁴ E osep ka tidong ke ila omur aitno lisak soulu e amnga ke iye e tipagei osep leklou isak kla batne ke iye ma tiwai langane. ‘Imawaiki gute are vri mgo ke imi kovok.’

¹⁵ E alo ka osep ke kantri silang tirere iye vri mgo ke urok kantri deka iye iding ke ila omur. Iye iding kodong deka gi ma ila wokboi nating songotno ka iye kar mani ke isak time ma iye ile tidue klousege sesue ke ila mani.

¹⁶ Gute gesa me mgo e wai ke iye langane. ‘Ngau puda ngadue burong ke lem mani gol kene e ngadue mani gol songotno silang.’

¹⁷ E gute wai ke iye langane. ‘Lou wokboi nating omdue elio itau. Emdidi lou pelengon lokono ke wan ka daudeng e ke batne langane ngadue wom ma amplau armok songotno.’

¹⁸ E wokboi nating orwo me e wai ke iye langane. ‘Ngau puda ngadue burong ke lem mani gol kene e ngadue mani gol elme silang.’

¹⁹ E ina puda koli wai ke iye langane. ‘Wom ma amplau armok elme.’

²⁰ E wokboi nating silang me e wai ke iye langane. ‘Ngau puda lem mani gol kene ane. Ngakukwope ke molo arlak.

²¹ Ngadue langane kesua ngaulou tarna lungong ke wom e ngaile wom gute ka omdue wan ka opru osep leklou. Omdue wan ka lem wan kovok e empi wan ka anino ke omur ka osep leklou tiusak londo ine.’

²² Deka ina puda koli wai ke iye langane. ‘Wom wokboi nating ka soulu. Ma ngamulu wom ke wom tona lem pelengon. Emile kodong ngadue wan ka opru osep leklou e ngadue wan ka lou wan kovok e ngapi wan ka anino ke omur ka osep leklou tiusak londo ine.

²³ Deka ina lange omdue lou mani dong ke beng kovok? Langka omdue langane alo ka ngaiding ngakaranga ngadue lou mani kap ina klousege.’

²⁴ Deka iye wai ke osep ka tivri are langane. ‘Umodue mani gol kene ke iye e umakare ke gute ka due mani gol songotno.’

²⁵ E tiwai ke iye langane. ‘Ipem puda iye due mani gol songoto kodong.’

²⁶ E gute wai ke isak langane. ‘Ngawai ke umu langane. Osep ka urok wan dong ma tidue wan pula blang. E osep ka aitno lisak mter urok wan dong ma osep tipi wan tonari.

²⁷ E umapaur ngau oul keniye ka tiwaiki ngavri mgo ke isak kovok time ane e umomluk isak ma timete ke omtongu.’”

Yesus la polou ke Jerusalem

²⁸ Alo ka Yesus wai pelengon ane yagos iye lila e tito la ke Jerusalem.

²⁹ Iye polou olwo boto ke armok orwo Betfage e Betani ka dong olwo boto ke gigri Oliv e iye pagei ila disaipel orwo ke armok are.

³⁰ E iye wai ke isak langane. “Umala ke armok ka dong are e alo ka umesepe lokono ma umavati donki otno ka osep tipoue ke akai. E oglou gute gesa dong e la ine kovok. Umekles galou e umapaure me ke ngong.

³¹ E langka gute gesa pmi umu ke batne lange umekles donki otno umokoli umawai ke iye langane. ‘Ida Puda waiki dong ine e la ke ila langan.’”

³² Isak orwo kla e tipado donki otno langka Yesus wai ke isak ine.

³³ Alo ka tiwaiki tikles galou donki ina gute wai ke isak langane. “Ina lange umekles donki otno?”

³⁴ Deka tikoli tiwai ke iye langane. “Ida Puda waiki dong ine e la ke ila langan.”

³⁵ E tipaur donki otno ke Yesus e tidue urok molo munu ine e due Yesus dong ine.

³⁶ E alo ka iye la osep tidue urok molo timunu ke ekreng.

³⁷ Deka alo ka iye polou olwo boto ke omur ka ekreng duru ke gigri Oliv Yesus ila disaipel ka pula pula keniye tinogrum tikakai Ida Tapolngon angaine tito la egim e aitno lisak neser omba e tidaiku omba kesua tivati elio arit ina pula.

³⁸ E tiwai langane. “Ma Ida Tapolngon aitno itau itau ke gute ka vri mgo ke omur ane ka me ke Ida Puda angaine. Osep ka tidong ke omur heven aitno lisak epen e ma itakakai Ida Tapolngon ka dong egim lokono angaine.”

³⁹ E osep Farisi ina leklou ka tidong are tiwai ke Yesus langane. “Gute parerengen ina amdangdang lem disaipel ma tiwai langane kovok.”

⁴⁰ E Yesus koli wai ke isak langane. “Ngawai ke umu langane. Langka tiwai kovok ma opmu tiwai langare.”

Yesus kngis ke osep Jerusalem ina

⁴¹ Alo ka Yesus polou olwo boto ke Jerusalem e vati armok iye kngis ine.

⁴² E iye wai langane. “Umu osep Jerusalem ina ngawaiki eknikane umeile omur ke elio ka due aitno lumu epen kap Ida Tapolngon. E oku ane elio ane dong kukwop e umakaranga umeile ine kovok.

⁴³ Mase taim ma me alo ka upu oul ma tiyas taklak e tiuri ari lelei armok ane e tidong lelei umu keniye e tidangdang umu ma umakaranga umosongon armok kovok.

⁴⁴ Ma tiuri umu kap titnomu ke taklak ma umemete ke armok aitno. Ma tidardar lumu ninu ma opmu kene napal munu ke opmu silang kovok. Ma tidue langane kesua batne umeile taim alo ka Ida Tapolngon me e waiki lua umu kovok.”

Yesus sapir osep ka tidue burong ke omur ka lelei Ida Tapolngon ila ninu

⁴⁵ Deka iye sep ke omur ka dong mgo ke Ida Tapolngon ila ninu e sik osep ka tidue burong ine.

⁴⁶ E iye wai ke isak langane. “Osep tisogo Ida Tapolngon ila pelengon ka wai langane. ‘Lou ninu dong ninu ma osep tiwai itau ke ngong ine. E umodue polou langka omus ka osep panakongon ina tikalu ine.’”

⁴⁷ E oklou kene kene iye parere osep ke omur ka lelei Ida Tapolngon ila ninu. E osep loulou ina ka omba e osep ka tile itau ke Moses ila sogongon e osep namormor ke osep Yuda ina tiwaiki tidue burwa ke iye.

⁴⁸ E tikaranga tidue langane kovok kesua osep ka pula keniye are tiwaiki tiklingen ila pelengon keniye.