Luk 18 - Aria New Testament

Jas ka klingen apmang asap batne ila pelengon

¹ Deka Yesus wai pelengon ano ke ila disaipel ma tile langane. Aling aling ma tiwai itau ke Ida Tapolngon e meingen isak ine kovok.

² Iye wai langane. “Ke armok gesa jas dong ka iye due anit ke Ida Tapolngon kovok e silang blang aitno mter ke osep kovok.

³ E apmang asap batne dong ke armok are blang ka aling aling iye me wai ke jas langane. ‘Omlua ngong e emkere elio kap ngong e ngau oul.’

⁴ Mgongon e sasi boto jas waiki lua apmang kovok e dau mase aitno mter langane. ‘Lama ngadue anit ke Ida Tapolngon kovok e aitno lungong mter ke osep kovok.

⁵ Ma ngalua apmang e ngakere iye kap ina oul kesua aling aling iye me ke ngong e due aitno lungong soulu. Ma ngalua iye lama iye me ke ngong aling aling e opru ngong ine.’”

⁶ E Ida Puda wai langane. “Umoklingen pelengon ka jas ka ila elio osuk kovok wai ine.

⁷ Aitno lumu lange? Ma Ida Tapolngon lua e kere osep ka iye rere isak ila osep alo ka tiwai itau ke iye ke oklou e epmes koke aurou? Ma iye dong tauni deka lua isak koke aurou?

⁸ Ngawai ke umu langane. Ma iye lua isak e kere isak suong. E dau alo ka Gute Ka Polou Langka Osep iding me ma iye pado osep ke taklak ka aitno lisak dagar ke iye koke aurou?”

Osep orwo ka tiwai itau ke Ida Tapolngon

⁹ Osep leklou aitno lisak lang-ka isak tona tidong itau ke Ida Tapolngon bitna e aitno lisak mter osep leklou isak osep soulu. Deka Yesus wai pelengon ano ane ka la ke isak.

¹⁰ “Osep orwo kla ke Ida Tapolngon ila ninu ma tiwai itau ke iye. Gute kene iye gute Farisi ina e gute silang iye gute ka due takis.

¹¹ E gute Farisi ina wai ke aitno langane. ‘Ngau Tapolngon aitno lungong itau ke wom kesua ngong langka osep leklou kovok. Isak osep panakongon ina e tidue elio ka itau e osuk ke emtem kovok e isak osep ka tidue okwa. Koke isak langka gute are ka due takis.

¹² Aling orwo ke wik kene kene ngapli ngau ngangon ma aitno lungong la ke wom e ngawade lou wan keniye ke emkil songotno ka isak eriar e ngakar emkil kene ke wom.’

¹³ E gute ka due takis dong mawa boto e waiki bitna tito ke omur heven kovok e iye mluk omun ine e wai langane. ‘Ngau Tapolngon aitno lugom due ngong kesua ngong gute epmes ina.’”

¹⁴ Deka Yesus wai langane. “Ngawai ke umu langane. Alo ka isak orwo tiding ke urok ninu ninu gute ka due takis dong itau ke Ida Tapolngon bitna e gute silang dong langane kovok. Kesua gute ka kakai iye tona angaine ma Ida Tapolngon pes iye duru e gute ka pes iye tona angaine ma Ida Tapolngon kakai iye tito.”

Yesus waiki agau time ke iye

¹⁵ E osep tipaur urok mimi ke Yesus ma limla kai isak. E alo ka ila disaipel tivati wan ane tiwai dagar ke osep ma tidue langane kovok.

¹⁶ E Yesus wai ke ila disaipel langane. “Umosongon mimi time ke ngong e umadangdang isak kovok. Kesua omur ka Ida Tapolngon plaue iye osep ka langane urok omur.

¹⁷ Ngawai lokono langane. Langka gute songon Ida Tapolngon plau iye kovok langka mimi tisongon iye plau isak ma iye karanga sep ke omur ka Ida Tapolngon plaue kovok.”

Yesus wai ke gute ka ila mani pula

¹⁸ Mase gute gesa ka angaine omba pmi Yesus langane. “Gute parerengen ina ka itau ma ngadue sua ma ngadue mosongon ka dong vala dong?”

¹⁹ E Yesus koli wai ke iye langane. “Ina lange emsir ngong gute itau? Kesua Ida Tapolngon kene vala iye itau.

²⁰ Emile Ida Tapolngon ila pelengon dagar ka langane. ‘Omdue okwa kovok e omdue burwa kovok e ampanako kovok e amwai pelengon yakngan ke kot bitna kovok e omdue anit ke abo e aiya.’”

²¹ E gute koli wai langane. “Ngadidi pelengon tonari ka pula keniye nogrum ke alo ka ngong agau me ke eknikane.”

²² Yesus klingen ila pelengon deka wai ke iye langane. “Omdue elio kene vala dau kovok. Omdue burong ke lem wan keniye e amkar lem mani ke osep ka urok wan isuk boto vala e wan bitna bitna ka itau lokono ma dong para ke wom ke omur heven. Deka omo emdidi ngong.”

²³ Alo ka gute klingen Yesus ila pelengon aitno soulu ine kesua ila mani pula lokono.

²⁴ Yesus vati gute aitno soulu ke ila pelengon deka iye wai langane. “Langka osep ka urok mani pula tiwaiki tisep ke omur ka Ida Tapolngon plaue are engil ke isak.

²⁵ Langka ongwa omba langka kamel waiki sep ke bitna ke nil sisirngen ina are engil sasi boto e langka osep ka urok mani pula tiwaiki tisep ke omur ka Ida Tapolngon plaue are engil lokono.”

²⁶ Deka osep ka tiklingen ila pelengon tiwai ke iye langane. “Langka langane Ida Tapolngon lua osep seisei ke urok elio epmes ina?”

²⁷ E Yesus koli wai langane. “Wan ka osep tikaranga tidue kovok Ida Tapolngon karanga due.”

²⁸ Deka Pita wai ke iye langane. “Emklingen. Imosongon limem wan keniye ma imedidi wom.”

²⁹ E Yesus wai ke isak langane. “Ngawai lokono ke umu. Langka gute songon ila ninu koke ila asap koke ina titovro koke ina saiver koke timla e tna koke titno kesua iye waiki elio ka Ida Tapolngon plau omur omur polou.

³⁰ Io Ida Tapolngon ma kar gute tonari wan pula ke taklak ane e silang blang ma iye due ila mosongon ka dong vala dong.”

Yesus wai aling eklu ina ke ina metengen

³¹ Yesus due ila disaipel songotno orwo e wai ke isak vala langane. “Umoklingen. Ma itala ke Jerusalem e wan ka pula keniye ka osep napaprangan ina tisogo ke Gute Ka Polou Langka Osep ma polou ke iye.

³² Ma osep tikar iye ke osep ka isak osep Yuda ina kovok. Ma tidue apok ke iye e tidue elio soulu ke iye e tiuri omsok ke iye.

³³ E ma tiules iye deka tidue burwa ke iye ma iye mete. Mase oklou eklu mela yagos deka ma iye poga tito ke ina denga.”

³⁴ E ila disaipel tile malak ine kovok kesua Ida Tapolngon kukwop lana ine ke isak. E tile ila pelengon batne kovok.

Yesus lua gute ka bitna evin

³⁵ Alo ka Yesus polou olwo boto ke Jeriko gute ka bitna evin dong ke ekreng galna e pang mani ke osep.

³⁶ E iye klingen osep pula pula tilila olwo boto ke iye e pmi isak ke wansua ka polou.

³⁷ E osep tiwai ke iye langane. “Yesus ka Nasaret ina lila la.”

³⁸ Deka iye daiku langane. “Yesus wom ka osep tisir wom Devit Otno Arang aitno lugom due ngong.”

³⁹ Deka osep ka timgo ke Yesus tiwai dagar ke gute ma iye wai kovok. E iye daiku omba lokono langane. “Wom ka osep tisir wom Devit Otno Arang aitno lugom due ngong.”

⁴⁰ Yesus dong e wai ma osep tipaur gute me ke iye e alo ka gute polou olwo boto ke iye Yesus pmi iye langane.

⁴¹ “Amwaiki ngadue sua ke wom?” E gute koli wai ke iye langane. “Ngau Puda ngawaiki ngakaranga ngavati omur blang.”

⁴² E Yesus wai ke iye langane. “Aitno lugom ila dagar due wom ompolou itau blang e oku ane amkaranga amvati omur blang.”

⁴³ Deka lokono iye karanga vati omur blang e iye didi Yesus e kakai Ida Tapolngon angaine tito la egim. E alo ka osep ka pula keniye tivati elio ane isak blang tikakai Ida Tapolngon angaine tito la egim.