Luk 17 - Aria New Testament

Osep ka tipagolgol osep leklou aitno lisak ila dagar

¹ Yesus wai ke ila disaipel langane. “Elio bitna bitna ka titok osep ma tidue elio epmes ina ma tipolou. E dau aisudo ke gute ka due osep ka aitno lisak ila dagar dau dagar kovok ma tidue elio epmes ina.

² E langka osep tidue gute tonari e tipou opmu ka anit ke agune e tiuri iye ke misuon ma iye unim e mete are itau. E langka tidue elio ane dau elio ane karanga mole Ida Tapolngon aitno ila engil ke gute tonari kovok. Aurou. Ida Tapolngon aitno dau engil ke iye.

³ E umaplau umu itau. Langka gute gesa ke lumu osua due elio soulu deka umawai malak ke iye e umenis iye ke ila elio soulu. E langka iye bauluk aitno ke ila elio soulu deka umasak ila elio.

⁴ Langka iye due elio soulu ke umu aling lumorwo ke oklou kene e mase aling lumorwo iye me ke umu e wai langane ‘ngabauluk aitno lungong ke lou elio soulu’ io deka aling kene kene umasak ila elio.”

Yesus wai ke aitno lite ila dagar

⁵ Deka Yesus ila aposel tipmi iye langane. “Ipem Puda omdue aitno limi ila dagar res polou omba.”

⁶ E Ida Puda koli wai ke isak langane. “Langka aitno lumu ila dagar daudeng langka mastet londo umakaranga umawai ke akai omba langane. ‘Lem gigitno polou e amla e omusak wom tona ke misuon.’ E akai are ma didi lumu pelengon.”

Yesus wai ke osep bokongon ina urok elio

⁷ “Langka gute gesa ke umu ila wokboi nating boko e kul taklak ke yage koke plau sipsip. Alo ka iye boko yagos e me ke ninu ma gute tonari wai ke iye langane? ‘Omsuong omo omdong ke bota e emngen ngap ngangon.’

⁸ Aurou. Ma iye wai ke iye langane. ‘Emkere ngau ngangon e emtnei lem klos itau e amkar ngangon ke ngong ma ngangen e ngainim. Deka ma amkaranga emngen e eminim.’

⁹ Ma iye wai tenkyu ke ila wokboi nating kesua iye didi ila pelengon? Aurou.

¹⁰ E umu blang langane. Alo ka umodue lumu bokongon ka Ida Tapolngon waiki umodue aitno lumu mter langane. ‘Imi wokboi nating vala e ma osep tiwai tenkyu ke imi kovok. Aurou. Imodue wan ka Ida Tapolngon waiki imodue vala.’”

Yesus lua osep songotno ka paiangan lepra due isak

¹¹ Alo ka Yesus lila la ke Jerusalem iye lila ke olung airavu ke omur Galili e omur Samaria.

¹² Alo ka iye waiki sep ke armok gesa osep songotno ka paiangan lepra due isak tisoson iye e dau tidong mawa ke iye.

¹³ E tigi ke iye e tiwai omba langane. “Ipem Puda Yesus aitno lugom due imi.”

¹⁴ E alo ka Yesus vati isak iye wai ke isak langane. “Umala e umenis tarna lumu ke osep loulou ina.” E alo ka tididi ekreng tarna lisak tipolou itau blang.

¹⁵ Deka gute kene ke isak vati tarna polou itau blang deka iye iding ke Yesus e wai omba e kakai Ida Tapolngon angaine tito la egim.

¹⁶ Iye grum kamla e bitna pes taklak ke Yesus bitna deka iye wai tenkyu ke wan ka Yesus due ke iye. E iye gute Samaria ina.

¹⁷ E Yesus wai ke iye langane. “Ngadue osep songotno tarna lisak tipolou itau blang. E osep lumesnal leklou tidong ge?

¹⁸ Gute kene vala ka kantri silang ina iding e kakai Ida Tapolngon angaine tito la egim. E osep leklou kovok i?”

¹⁹ Deka Yesus wai ke gute tonari langane. “Emtito e amla. Aitno lugom ila dagar due wom ompolou itau blang.”

Yesus wai ke alo ka Ida Tapolngon ma plau osep

²⁰ Aling kene osep Farisi ina tipmi Yesus langane. “Lesen ma omur ka Ida Tapolngon plaue polou?” E Yesus koli wai ke isak langane. “Omur ka Ida Tapolngon plaue ma polou kap nisngen ka osep tikaranga tivati ma tile omur ine kovok. Aurou.

²¹ Ma osep tikaranga tiwai langane kovok. ‘Omur dong ane koke omur dong are.’ Umoklingen. Omur ka Ida Tapolngon plaue dong airavu ke umu.”

²² Deka Yesus wai ke ila di-saipel langane. “Mase ma umawaiki umavati Gute Ka Polou Langka Osep blang langka oklou kene vala e ma umavati iye kovok.

²³ Osep ma tiwai ke umu langane. ‘Iye dong ane koke iye dong are.’ E umala umedidi isak kovok.

²⁴ Kesua taim ka Gute Ka Polou Langka Osep iding me ila baulukngon ma polou langane. Iye polou langka aragu egle ka nevlik bublo ke omur kene ke sirva e la ke omur silang ke sirva.

²⁵ E mgo ke taim ari osep ka tidong oku ane ma tidue elio soulu pula ke iye e tipli iye.

²⁶ Elio ka osep tidue alo ka Gute Ka Polou Langka Osep ma iding me isak eriar langka elio ka osep tidue oglou alo ka Noa dong.

²⁷ Alo ari osep tingen e tinim e tigi e tikar titorok ke gingen la lama oklou ka Noa sep ke sip omba. Deka ongon ombatno me e kading isak keniye e timete ine.

²⁸ E osep tidue elio eriar langane blang alo ka Lot dong. Tingen e tinim e tikli wan bitna bitna e tidue burong ke wan bitna bitna e tiusak wan bitna bitna ke yage e tiuri ninu ninu.

²⁹ E ke oklou ka Lot songon Sodom Ida Tapolngon due eiou e opmu salfa ka eiou ngene duru ke taklak langka aragu. E elio ane paiavu osep Sodom ina keniye ma timete.

³⁰ E elio eriar langane ma dong alo ka Gute Ka Polou Langka Osep ma polou malak ke osep amtarsak.

³¹ Ke oklou are langka gute gesa dong ke ninu tona e ila brokngon dong ke ninu aitno ma iye duru e due kovok. E eriar langane langka gute gesa dong ke yage ma iye iding ke ila ninu kovok.

³² Omtomu sisir elio ka polou ke Lot esna.

³³ Gute ka waiki ila mosongon dong ke taklak ma ila mosongon imina la e gute ka aitno mter ke ila mosongon ke taklak kovok ma ila mosongon dong itau.

³⁴ Ngawai ke umu langane. Ke epmes are osep arang orwo ma timunu ke kova kene e Ida Tapolngon ma due gute kene e gute silang ma dong.

^35-36 E apmang orwo ma tidong timtung wit otna ma tidue plaua ine ke omur kene e Ida Tapolngon ma due apmang kene e apmang silang ma dong.”

³⁷ Deka Yesus ila disaipel tipmi iye langane. “Ipem Puda elio ane ma polou ke omur ge?” E Yesus koli wai ke isak langane. “Ke omur ka wan ka mete pampamu ine dong ine io ke omur are monuk ka tingen metengen okurne ma tiduni pulu ine.”