Luk 16 - Aria New Testament

Gute bokongon ina ila elio

¹ E Yesus wai basikngen ke ila disaipel langane. “Gute dong ka ila mani pula pula e gute silang dong ka boko e plau gute tonari ila wan bitna bitna. E osep time ke gute e tisin elio vri ke gute bokongon ina ka langka iye songon gute ila wan leklou imina la.

² E gute gi ke ila gute bokongon ina ma iye me e pmi iye langane. ‘Lange ke elio ka osep tisin isak tivri ke wom? Omsogo pepa e ampalongo lou ke elio ka amplau lou wan. Kesua amkaranga omdong e amplau lou wan blang kovok.’

³ Deka gute bokongon ina aitno mter langane. ‘Ma ngadue sua kesua gute wai lou bokongon ma ngaplau ila wan yagos? E ngakaranga ngayas taklak kovok kesua lou arit sasi boto e langka ngapang mani ke osep ma ngong mnak ngong ine.

⁴ Ai ngaile wansua ma ngadue ma alo ka gute pi ngong ke lou bokongon ane ma osep tidue ngong ngasep ke urok ninu.’

⁵ E iye gi ke osep kene kene ka urok aglunga dong ke ina puda. Iye pmi gute ka me mgo langane. ‘Lem aglunga ke ngau puda sesue?’

⁶ E iye koli wai langane. ‘Dram buno kene ke oliv ina wel.’ Deka gute bokongon ina wai ke iye langane. ‘Omdue lem pepa omdong e omsuong omsogo dram iselme vala.’

⁷ Deka iye pmi gute silang ka me langane. ‘Lem aglunga sesue?’ E iye koli wai langane. ‘Bek wit buno kene.’ Deka gute bokongon ina wai ke iye langane. ‘Omdue lem pepa e omsogo bek iselme iseklu vala.’”

⁸ “Mase gute bokongon ina tonari ina puda pakaru iye lama ila elio soulu kesua aitno mter itau. E osep ka taklak ina aitno lisak mter itau alo ka tidue burong kap osep taklak ina leklou. E urok elio mole Ida Tapolngon ila osep urok elio langare.

⁹ Deka ngawai ke umu langane. Alo ka umodong ke taklak umodue elio itau ke lumu mani ka taklak ina ma osep tipolou lumu satan. Umodue langane deka alo ka lumu mani yagos ma Ida Tapolngon due umu umesep umodong ke omur heven dong vala dong.”

¹⁰ “Gute ka karanga plau wan daudeng itau karanga plau wan omba itau blang. E gute ka didi elio ka osuk kovok alo ka iye plau wan daudeng ma iye didi elio ka osuk kovok alo ka iye plau wan omba blang.

¹¹ Deka langka umaplau lumu mani ke taklak itau kovok sei ma kar lumu wan itau itau ka lokono ka omur heven ina ke umu?

¹² E langka umaplau gute silang ila wan itau kovok sei ma kar lumu wan ke umu?

¹³ Gute ka wokboi nating iye karanga boko ke osep orwo ke aling kene kovok. Ma aitno itau ke gute kene e aitno soulu ke gute silang. Koke ma iye didi gute kene ila pelengon e pul dogur ke gute silang ila pelengon. Umakaranga umoboko ke Ida Tapolngon e ke mani ke aling kene kovok.”

Osep Farisi ina aitno lisak la ke mani vala

¹⁴ Osep Farisi ina isak lana isak ke mani. E alo ka tiklingen Yesus ila pelengon tiwai apok ke iye.

¹⁵ E Yesus wai ke isak langane. “Umu osep ka umawaiki osep tivati umu langka umu osep itau lokono e dau Ida Tapolngon ile aitno lumu. Wan ka osep tivati langka wan ka itau lokono Ida Tapolngon vati wan tonari langka wan ka soulu lokono.”

¹⁶ “Osep tinapapra Moses ila sogongon e osep napaprangan ina urok sogongon la lama alo ka Jon polou. E nogrum ke alo ka Jon polou me ke oku ane nganapapra omon itau ka la ke omur ka Ida Tapolngon plaue e osep arit isak lokono ma tikaranga tisep ke omur tonari.

¹⁷ E dau langka taklak e sirva tipolou yagos ane engil sasi boto. E langka leta daudeng ke Moses ila sogongon polou yagos ane wan ka engil lokono.”

Yesus wai ke elio ka osep tidar urok gingen

¹⁸ “Langka gute dar ila gingen e la gi apmang silang iye due okwa. E gute ka gi apmang gesa ka ila boget dar urok gingen kodong iye due okwa blang.”

Gute ka ila mani pula orwo gute Lasarus

¹⁹ E Yesus wai ke isak blang langane. “Oglou gute gesa dong ka ila mani pula pula e aling aling iye tnei klos ka edimor e okou ka itau lokono e oklou kene kene iye ngen ngangon ka itau lokono.

^20-21 E gute ka angaine Lasarus dong ke ekreng bitna ke ari ka lelei gute tonari ila ninu e pang mani ke osep. E Lasarus waiki ngen ngangon emkil ka gene ke gute tonari ila bota. E silang blang Lasarus tarna egle egle. E gemle time e tidimdim tarna ina egle egle.”

²² “Mase gute ka pang mani mete e Ida Tapolngon ila ensel tipaur iye la ma iye dong ke Abraham galna. Deka mase gute ka ila mani pula pula mete blang e osep tiyas iye.

²³ E iye dong ke omur ka osep ka timete kodong tidong ine e ngangir omba e tarna doro doro. E bitna tito e iye vati Abraham dong mawa lokono e vati Lasarus dong ke galna.

²⁴ Deka iye gi langane. ‘Livou Abraham aitno lugom due ngong e ampagei Lasarus me ma iye due limla titno sep ke aki e kai ogu blene ine ma epen. Kesua ngananami doro lokono ke eiou ane.’

²⁵ E Abraham koli wai ke iye langane. ‘Erigu emtem sisir alo ka omdong ke taklak wan itau lokono polou ke wom e wan soulu polou ke Lasarus. E eknikane Lasarus aitno itau ane e amnamani wan soulu are.

²⁶ E silang blang langane. Ida Tapolngon due olung omba dong airavu ke imi e umu ma osep ka tiwaiki tisongon ane e isak kla are tikaranga kovok. E osep ka tiwaiki tisongon are e time ane tikaranga kovok blang.’”

²⁷ “E gute koli wai langane. ‘Deka livou Abraham ngakel wom dagar langane. Ampagei Lasarus ke livou ila ninu.

²⁸ Kesua ngau saiver elme tidong e ngawaiki iye wai ke isak dagar ma isak blang time ke omur ane ka osep tingangir e tarna lisak doro doro ine kovok.’

²⁹ E Abraham koli wai ke iye langane. ‘Aurou. Moses ila sogongon e osep napaprangan ina urok sogongon dong. Ma tiklingen ke isak.’

³⁰ E gute koli wai langane. ‘Livou Abra-ham aurou. E langka gute ka mete kodong poga tito ke ina denga e wai ke isak ma tibauluk aitno lisak.’

³¹ E Abraham wai ke iye langane. ‘Aurou. Langka tiklingen Moses ila sogongon e osep napaprangan ina urok sogongon kovok ma tiklingen e tididi gute ka poga tito ke ina denga ila pelengon kovok blang.’”