Luk 15 - Aria New Testament

Sipsip ka imina

¹ E osep ka tidue takis e osep epmes ina time ke Yesus ma tiklingen ila pelengon.

² E osep Farisi ina e osep ka tile itau ke Moses ila sogongon tingurngur ke iye langane. “Gute ane waiki osep epmes ina time ke iye e iye ngen kap isak.”

³ Deka Yesus wai pelengon ano ke isak langane.

⁴ “Langka gute kene ke umu ila sipsip buno kene dong e sipsip kene vala imina la. Ma iye due sua? Iye ma songon sipsip 99 tidong ke omur ka tikaranga tingen ine e la krim ke sipsip kene ka imina la lama iye padoe i?

⁵ E alo ka iye padoe aitno neser e iye due munu ke agune.

⁶ E iye kalke la ke ila ninu. Iye polou ke ninu deka iye gi ke ila saten e osep ka tidong olwo boto ke iye e wai ke isak langane. ‘Aitno lumu neser kap ngong kesua ngapado lou sipsip ka imina la.’

⁷ Ngawai ke umu langane. Elio eriar langane polou ke omur heven blang. Osep ke omur heven tiketir ke gute epmes ina kene ka bauluk aitno e urok ketirngen mole ketirngen ke osep 99 ka aitno lisak mter langka tidong itau e osuk ke Ida Tapolngon bitna kodong e urok elio epmes ina pes isak kovok.”

Mani ka imina

⁸ “E silang blang langane. Langka apmang ila mani silva songotno dong e kene imina la. Ma iye due sua? Ma iye bik lam e gir ninu aitno e krim mani tonari itau la lama iye padoe i?

⁹ E alo ka iye padoe iye gi ke ila saten e osep ka tidong olwo boto ke iye e wai ke isak langane. ‘Aitno lumu neser kap ngong kesua ngapado lou mani silva ka imina.’

¹⁰ Ngawai ke umu langane. Eriar langane Ida Tapolngon ila ensel ma tiketir alo ka gute epmes ina kene bauluk aitno.”

Gute titno arang orwo

¹¹ Yesus wai blang langane. “Gute dong ka titno arang orwo tidong kap iye.

¹² E otno arang orwo ina wai ke timla langane. ‘Livou oku ane ngawaiki amkar lou wan matamuli ka mase ma ngadue ke ngong.’ Deka gute tonari wade ila brokngon ke isak orwo.

¹³ E mase isuk boto vala gute orwo ina gom ila wan keniye e la ke omur mawa. E ke omur tonari iye kepis pula e due elio ulik ulik e suong boto ila mani e wan bitna bitna isak yagos.

¹⁴ Ila wan yagos deka sapanga omba polou ke omur tonari e ila wan dong kovok

¹⁵ E iye la due bokongon ke gute matamur ke omur tonari. E gute vai iye ma iye vaken ila ovar.

¹⁶ E iye waiki ngen wan ka ovar tingen e dau gute kar ngangon ke iye kovok.

¹⁷ E alo ka aitno mter malak iye wai ke iye tona langane. ‘Osep bokongon ina ka tiboko ke livou urok ngangon pula dong e ke omur ane sapanga due ngong e isuk boto ngamete ine.

¹⁸ Ma ngatito e ngala ke livou e ngawai ke iye langane. “Livou ngadue elio epmes ina ke Ida Tapolngon bitna e ke emtem blang.

¹⁹ Ngadue elio soulu e oku ane ngakaranga ngadong langka etim arang kovok. Omsongon ngong ngadong langka lem gute bokongon ina.”’

²⁰ E iye tito la iding ke timla.” “Alo ka iye dau didi ekreng e dong mawa boto timla vati iye me e aitno due e suong la ke iye e berber iye e ene ngen banga.

²¹ E gute wai ke timla langane. ‘Livou ngadue elio epmes ina ke Ida Tapolngon bitna e ke emtem blang. E ngong gute itau ma emsir ngong etim arang kovok.’

²² E gute wai ke ila osep bokongon ina langane. ‘Umosuong umodue molo ka alang ka itau ma iye tnei e umodue baresngen e umodue ke limla titno e umodue su dong ke kamla.

²³ E umodue bulmakau otno ka malugi omba e umemtere ma mete. Ma itodue rogo e aitno lite neser.

²⁴ Aitno lite neser kesua erigu arang ane langka iye mete e eknikane iye dong blang. E iye imina e oku ane itapado iye blang.’ Deka tinogrum tiketir.”

²⁵ “Alo ari gute ina sirngen dong boko ke yage. E alo ka iye iding ke ninu iye klingen osep tidue sakul e titirie.

²⁶ Deka iye gi ke gute bokongon ina kene e pmi iye ke wansua ka polou.

²⁷ E gute bokongon ina koli wai ke iye langane. ‘Ngap aiver iding me kodong e abo mter bulmakau otno ka malugi omba kesua aitno itau ke elio ka ngap aiver iding e dong itau.’

²⁸ Deka gute ka sirngen aitno amnga e iye waiki sep ke ninu kovok. E timla polou ke iye e pmi iye dagar me iye sep.

²⁹ E iye koli wai ke timla langane. ‘Lange? Livou emile tobor pula ngaboko langka lem gute bokongon ina e ngapli lem pelengon kovok. E dau amkar wan langka meme otno vala ke ngong ma ngadue rogo kap lou saten kovok.

³⁰ E alo ka etim arang are ka kepis ke apmang ekreng palma ina e due lem brokngon yagos iye iding ane ommluk bulmakau otno ka malugi omba ke iye.’

³¹ E gute timla koli wai ke iye langane. ‘Erigu arang omdong kap ngong aling aling e lou wan keniye langka lem wan blang.

³² E eknikane ngap aiver ka langka iye mete dong blang e iye langka imina e oku ane itapado iye blang. E ke batne langane wan ka itau itodue rogo e aitno lite neser.’”