Luk 10 - Aria New Testament

Yesus pagei osep 72 kla tidue ila bokongon

¹ Mase Yesus rere osep 72 silang ma tidue ila bokongon. Deka iye pagei isak orwo orwo ma timgo ke iye ke armok keniye e omur keniye ka iye ma la ine.

² E iye wai ke isak langane. “Ngangon pula ka anino dong ke yage e osep awal boto vala tidong ka tikaranga tidue ngangon tonari. Umepmi Upu Puda ka plau ivungon ma iye pagei osep bokongon ina isak kla tidue ngangon tonari.

³ Umala ke lumu langan. E umoklingen. Umodong langka sipsip titno e ngapagei umu airavu ke osep ka isak langka gemle kevena.

⁴ E umakalke mani koke kerka koke su kovok e umawai ‘oklou itau’ ke osep ka umososon isak ke ekreng kovok.

⁵ Alo ka umesep ke ninu gesa umawai langane mgo. ‘Ida Tapolngon ila elio ka due aitno lumu epen dong kap umu.’

⁶ E langka gute ka aitno epen dong ke ninu tonari lumu pelengon dong kap iye e langka gute ka aitno epen dong kovok lumu pelengon ma iding ke umu.

⁷ E alo ka umodong ke armok umodong ke ninu kene vala e umala ke ninu ninu kovok. E umangen e umeinim wan ka tikare ke umu. Kesua gute bokongon ina karanga due ina klingen ke ila bokongon.”

⁸ “Alo ka umesep ke armok gesa e aitno lisak itau ke umu deka umangen wan ka tikare ke umu.

⁹ Umodue osep ka tipaia ke armok are tipolou itau blang e umapalongo urok langane. ‘Elio ka Ida Tapolngon plau osep polou olwo boto ke umu kodong.’

¹⁰ E alo ka umesep ke armok gesa e aitno lisak itau ke umu kovok deka umevri ke ekreng ke armok e umawai ke isak langane.

¹¹ ‘Imasak lumu armok ina taklak ina group ka dong ke kepmi la langka nisngen ke lumu elio soulu. E dau imawaiki umeile langane. Elio ka Ida Tapolngon plau osep polou olwo boto ke umu kodong.’

¹² Ngawai ke umu langane. Alo ka Ida Tapolngon wade osep urok elio armok tonari ina ulesngen ma mole armok Sodom ina ulesngen.”

Yesus aitno soulu ke osep ka tibauluk aitno lisak kovok

¹³ “Aisudo umu osep Korasin ina e osep Betsaida ina. Elio soulu ma polou ke umu. Kesua langka elio arit ina ka ngadue ke lumu armok orwo ngadue ke Tair e Saidon ma tibauluk aitno lisak tauni kodong. E tidue nisngen langka titnei klos ka sasi e tisak eiou ina group ke bara lisak ma tinis ite aitno lisak soulu ke urok elio soulu.

¹⁴ E alo ka Ida Tapolngon wade osep urok elio soulu upu ulesngen ma mole osep Tair ina e osep Saidon ina inarak ulesngen.

¹⁵ E umu osep Kaperneam ina aitno lumu mter osep ma tidue anit ke umu ke omur heven i? E aurou. Ma umoduru ke omur hel.”

¹⁶ E Yesus wai ke ila osep bokongon ina tonari langane. “Gute ka klingen lumu pelengon klingen lou pelengon blang e gute ka pli umu pli ngong blang. E gute ka pli ngong pli Ida Tapolngon ka pagei ngong ngame.”

Osep tiding ke Yesus

¹⁷ Deka alo ka osep 72 tiding ke Yesus aitno lisak neser e tiwai langane. “Ipem Puda angelo soulu blang tididi limem pelengon alo ka imesir angain wom.”

¹⁸ Deka Yesus wai ke isak langane. “Oglou ngavati Satan gene ke omur heven eriar langka aragu egle duru ke taklak.

¹⁹ Umoklingen. Ngakar lou arit ke umu ma umakaranga umelila e kopmu tipes mota soulu e tipes gitu e umomole upu oul Satan. E wan gesa karanga due asmel ke umu kovok.

²⁰ E dau aitno lumu neser kesua angelo soulu tididi lumu pelengon kovok. Aurou. Aitno lumu neser kesua Ida Tapolngon sogo angainmu ke ila buk ka dong ke omur heven.”

Yesus aitno itau e iye wai itau ke Timla

²¹ Alo ari Ano Itau due Yesus deka aitno neser e iye wai langane. “Livou wom ka omur heven e taklak Inarak Puda ngakakai angain wom tito la egim. Kesua embisi wan ane ke osep ka urok ilengen omba koke osep ka tile omur itau e emnis isak ke agau. Livou omdue langane kesua amwaiki omdue mada ke osep e aitno lugom itau ke elio ane.”

²² Yesus wai itau yagos deka iye wai ke osep langane. “Livou kar wan keniye ke ngong kodong. Livou kene vala ile ngong ka Otno Arang e gute kene ile Livou kovok. E Otno Arang e osep ka iye nis isak ke Timla vala tile Livou.”

²³ Deka Yesus bauluk e wai ke ila disaipel ka isak vala tidong langane. “Osep ka tivati elio ka umavati aitno lisak itau itau.

²⁴ Ngawai ke umu langane. Oglou osep napaprangan ina pula e osep pula ka tivri mgo ke omur omur tiwaiki tivati wan ka umavati e tivati kovok. E tiwaiki tiklingen wan ka umoklingen e tiklingen kovok.”

Yesus wai pelengon ano ke gute Samaria ina ka due mada ke gute silang

²⁵ Mase gute kene ka ile itau ke Moses ila sogongon tito vri ma iye tok Yesus e pmi iye langane. “Gute parerengen ina ma ngadue sua ma ngadue lou mosongon ka dong vala dong?”

²⁶ E Yesus koli wai ke iye langane. “Moses ila sogongon wai lange? Emritim Moses ila sogongon e aitno lugom lange ine?”

²⁷ Deka gute tonari koli wai langane. “Moses ila sogongon wai langane. ‘Umu lana umu ke Upu Tapolngon ka Upu Puda. Umu lana umu ke aitno lumu keniye e ke anmu keniye e ke lumu arit keniye e ke bara lumu keniye. E silang umu lana umu ke osep ka tidong lelei ke umu eriar langka umu lana umu ke umu tona.’”

²⁸ E Yesus wai ke iye langane. “Amwai lokono. Oku ane emdidi elio are e ma omdue lem mosongon ka dong vala dong.”

²⁹ E gute tonari waiki osep aitno lisak mter langka iye gute itau deka iye pmi Yesus langane. “Alo ka Moses ila sogongon wai ngong lana ngong ke osep ka tidong lelei ke ngong iye wai ke osep seisei lokono?”

³⁰ Deka Yesus koli wai ke pelengon ano langane. “Gute gesa songon Jerusalem e la duru ke Jeriko e osep panakongon ina tipolou ke iye. E tipanako ila wan keniye e ila klos e timluk iye deka isak kla. E gute munu ke taklak e isuk boto ma mete.

³¹ Mase gute loulou ina gesa didi ekreng e vati gute tonari e sala la.

³² E eriar langare mase gute Livai ina gesa me ke omur are e vati gute deka sala la.

³³ E gute Samaria ina la ke ila langan e polou ke gute tonari. Alo ka iye vati gute munu ke taklak aitno kro ke iye.

³⁴ Iye la ke iye deka baser wel e aki wain ke tarna e pou banis ke tarna ina amal amal. Deka iye due gute tito ke ila donki e paur iye la ke ninu kaulei ina e kere iye itau.

³⁵ Deka ke oklou silang iye kar mani silva orwo ke gute ka plau ninu kaulei ina e wai ke iye langane. ‘Emkere gute ane itau e langka mani ane karanga kovok ma ngakoli lem mani batne alo ka ngaiding.’”

³⁶ Deka Yesus pmi gute langane. “Ke osep eklu ka ngawai ine gute sei due elio itau ke gute ka osep panakongon ina due agegeng ke iye?”

³⁷ E gute koli wai langane. “Gute ka aitno due gute silang.” Deka Yesus wai langane. “Amla e omdue elio eriar langare.”

Yesus dong ke Marta e Maria urok ninu

³⁸ E Yesus e ila disaipel tilila tipolou ke armok gesa e apmang angaine Marta ka dong ke armok tonari due Yesus sep ke ila ninu.

³⁹ E Marta lutno angaine Maria dong kap iye e iye dong olwo boto ke Ida Puda kamla e klingen ila parerengen.

⁴⁰ E Marta aitno mter pula ke elio ka iye kere ngangon ke osep deka iye la wai ke Yesus langane. “Ngau Puda ngong vala ngakere wan ke osep e ngau aiver dong vala. Aitno lugom mter ine kovok? Amwai ke ngau aiver ma iye lua ngong.”

⁴¹ E Ida Puda koli wai ke iye langane. “Marta Marta aitno lugom mter e kro ke wan pula.

⁴² E dau wan kene vala omba e Maria aitno mter ke wan are. E osep ma tikaranga tipi wan are ke iye kovok.”