Kolosi 4 - Aria New Testament

¹ Umu ka umaplau osep ka tidue lumu bokongon umodue elio ka itau e osuk ke isak. Kesua umeile omur Upu Puda dong ke omur heven blang.

Itodue elio ka didi udo mosongon oku ina

² Aling aling umawai itau ke Ida Tapolngon e umosongon elio tonari polou yagos kovok. Alo ka umawai itau aitno lumu mter itau ke lumu pmingen e umawai tenkyu ke wan ka Ida Tapolngon kare ke umu.

³ Alo ka umawai itau umepmi Ida Tapolngon ke imi blang ma iye due ekreng ma imakaranga imanapapra ila pelengon ka oglou dong kukwop ka lana ine la ke Krais. Nganapapra ila pelengon e ke batne langane ngadong ke kalabus ane.

⁴ E umawai itau ma ngakaranga nganapapra Ida Tapolngon ila pelengon malak ma osep tikaranga tile omur ine.

⁵ Alo ka umodong airavu ke osep epmes ina umeile umu itau ma umodue elio itau vala. Umodong umaplau umu itau ma umakaranga umodue elio itau ka nis isak ke aitno lumu ila dagar.

⁶ Alo ka umawai kap osep aling aling umawai ke pelengon ka itau vala ma aitno lisak itau ine. Alo ka umokoli osep urok pmingen umokoli ke pelengon lokono vala.

Gute Tikikus e gute Onesimus

⁷ Gute Tikikus iye sudo gesa ka imi lana imi ke iye e iye ma palongo lumu ke elio bitna bitna ka tipolou ke ngong. Iye Ida Puda ila gute bokongon ina gesa eriar langka ngong e aling aling iye due ila bokongon itau.

⁸ Ngapagei iye la ke umu ma iye karanga palongo lumu ke limem mosongon e ma iye due aitno lumu dong itau.

⁹ E Onesimus la kap iye. Iye supmu gesa e dong dagar ke ila bokongon e imi lana imi ke iye. Isak orwo ma tipalongo lumu ke wan ka pula keniye ka tipolou ke imi.

Pol wai osep kene kene aitno lisak itau ke osep Kolosi ina

¹⁰ Gute Aristarkus ka iye dong ke kalabus kap ngong wai “oklou itau” ke umu. E gute Mak ka iye Barnabas ila aidagu wai “oklou itau” ke umu blang. Oglou ngapagei pas uti ke umu ka wai langane. Langka Mak polou ke umu deka aitno lumu itau ke iye e umodue elio itau ke iye.

¹¹ Gute Jisas ka angaine silang Jastus wai “oklou itau” ke umu blang. Isak eklu isak osep Yuda ina vala ka tilua ngong ke lou bokongon ke omur ane e tilua ngong itau ine. Imoboko ma elio ka Ida Tapolngon vri mgo ke omur omur polou.

¹² Gute Epafras ka iye lumu aten gesa e iye Krais Yesus ila gute bokongon ina wai “oklou itau” ke umu blang. Aling aling iye wai itau pula lokono ma Ida Tapolngon due umu ma umodong dagar langka osep ngongle ka umeile omur ke aitno lumu ila dagar. Iye wai itau ma umedidi Ida Tapolngon aitno ke wan ka pula keniye ka iye waiki umodue.

¹³ Ngakaranga ngawai ke umu langane. Iye boko engil lokono ma iye lua umu. Iye boko ma lua umu kap osep ka tidong ke armok Laodisia e ke armok Hierapolis.

¹⁴ E gute Luk ka dokta ka imi lana imi ke iye kap gute Demas tiwai “oklou itau” ke umu blang.

¹⁵ Deka umawai “oklou itau” ke sudo ka tidong ke armok Laodisia. E silang blang umawai “oklou itau” ke Nimfa e osep ke sios ka tiduni pulu ke ila ninu.

¹⁶ Alo ka umeritim pas ane kodong deka umavaie la ke sios ke armok Laodisia ma tiritime blang. E umodue e umeritim pas ka ngapagei ke isak blang.

¹⁷ E umawai ke gute Arkipus langane. “Wom ma ambabrum bokongon ka Ida Puda kare ke wom.”

¹⁸ Ngong Pol ngasogo pas ane e ngawai “oklou itau” ke umu. Aitno lumu mter ke elio ka ngadong ke kalabus ane. Ngawaiki Ida Tapolngon ila makaingan dong kap umu.