Kolosi 3 - Aria New Testament

Ida Tapolngon due ite itopoga itetito kap Krais

¹ Ida Tapolngon due umu umopoga umetito kap Krais kodong e Krais dong ke Ida Tapolngon limla odung. E aling aling umoboko dagar ma umodue wan ka omur heven ina.

² Aitno lumu mter ke wan ka omur heven ina e mter ke wan ka taklak ane ina kovok.

³ Umemete kodong kap Krais e umeneklep ke iye. E umeile omur ke lumu mosongon itau keniye dau kovok e mase ma Ida Tapolngon due mosongon tonari polou malak.

⁴ Krais iye lumu mosongon itau batne e mase alo ka iye polou malak ke osep amtarsak umu blang ma umodong kap iye ke ila bublongon.

Itedidi elio oku ina

⁵ Umemete kap Krais kodong deka umopul dogur ke elio bitna bitna ka taklak ina ka soulu. Elio bitna bitna langka elio ka osep tikepis pulu e elio isungon ina e elio ka aling aling osep tiwaiki tidue elio epmes ina bitna bitna e elio ka osep tingale osep leklou urok wan. Elio ngalengen ina iye langka osep tilotuim sapingen.

⁶ Ma Ida Tapolngon aitno amnga ke osep ka tidue elio tonari kesua tini iye kovok.

⁷ Ke oglou elio bitna bitna tonari plau umu blang e umodue elio epmes ina bitna bitna.

⁸ E eknikane umosongon elio ka amnga umu ke osep e umosongon elio ka aitno lumu nevlik amnga ke osep e umosongon elio ka aitno lumu engil e soulu ke osep. E umosongon elio ka umawai soulu ke osep urok elio e umosongon elio ka umawai ke pelengon ka sasi.

⁹ Umayak umu pulu kovok kesua umosongon aitno lumu oglou ina kap lumu elio oglou ina kodong.

¹⁰ E umodue lumu mosongon oku ina kodong. Ida Tapolngon due lumu mosongon tonari polou oku aling aling e aling aling lua umu ma umeile omur ke ila elio keniye. Iye waiki lumu elio isuk isuk polou langka iye tona ila elio.

¹¹ Ida Tapolngon lua ila osep ka pula keniye ke urok mosongon oku e aitno lite langane. Langka ite leklou osep Yuda ina e ite leklou osep ka isak osep Yuda ina kovok aitno lite mter ine kovok. E langka ite leklou itedidi elio ulangngan ina e ite leklou itedidi elio ulangngan ina kovok aitno lite mter ine kovok. E langka ite leklou osep ke kantri silang koke ite leklou osep omong aitno ina aitno lite mter ine kovok. E langka ite leklou langka wokboi nating e ite leklou langka itodong fri aitno lite mter ine kovok. Aitno lite mter langane kovok kesua Krais vala dong e iye dong ke aitno lite.

¹² Deka langane. Umu Ida Tapolngon ila osep e iye lana iye ke umu e iye rere umu ila osep itau. Deka umodue elio bitna bitna langane. Elio ka aitno lumu due osep ka wan soulu polou ke isak e elio ka umodue mada ke osep e elio ka umodong moli e umepes angainmu. E elio ka umodue elio molil ke osep e elio ka amnga umu suong kovok ke osep ka tidue elio soulu ke umu.

¹³ Umodue elio itau ke osep ka tidue elio soulu ke umu e langka gute due elio soulu ke umu deka umu kenmu kenmu umasak ila elio soulu ka iye due. Umasak osep urok elio soulu eriar langka oglou Ida Puda sak lumu elio epmes ina.

¹⁴ E wan ka ombatno langane. Umu lana umu pulu. Kesua elio ka umu lana umu pulu iye langka pou umu pulu deka umodong kene vala langka Ida Tapolngon waiki umodong.

¹⁵ Krais due aitno lumu epen kap iye. E elio ka aitno lumu epen kap iye nis umu ma umeile omur ke elio bitna bitna ka Krais waiki umodue. Kesua Ida Tapolngon waiki aitno lumu epen pulu e iye waiki elio tonari gom umu e umodong langka umu Krais pampamu ine ka kene vala. E aitno lumu itau ke Ida Tapolngon ine.

¹⁶ Umosongon Krais ila pelengon keniye dong ke aitno lumu. Deka umedidi ilengen ka polou ke pelengon tonari e umaparere osep ine e umawai ke isak ma tikel isak itau. Umedidi sakul ka dong ke Buk Song e umodue sakul ka kakai Ida Tapolngon angaine tito la egim e umodue sakul ka Ano Itau due polou ke aitno lumu. Alo ka umodue sakul ma aitno lumu itau ke wan keniye ka Ida Tapolngon due.

¹⁷ Deka langane. Ke wan ka pula keniye ka umodue koke wan ka pula keniye ka umawai ine umodue batne aitno lumu dagar ke Ida Puda Yesus. E ke Yesus angaine umawai tenkyu ke Ida Tapolngon ka Pmada ke wan keniye ka iye due.

Osep pasinga e titorok

¹⁸ Umu apmang umeini lumu soboget urok pelengon. Kesua alo ka umodue elio langane Ida Puda aitno itau ine.

¹⁹ E umu arang umu lana umu ke lumu sasap e umodue elio ka opru isak kovok.

²⁰ E umu agau aling aling umeini sipmomu e titnomu urok pelengon. Alo ka umodue elio langane Ida Puda aitno itau ine.

²¹ Umu osep pasinga aling aling umawai soulu ke titopmu ma aitno lisak etres ine kovok. Lama lumu pelengon tonari due aitno lisak mter langka tikaranga tidue wan gesa ka itau kovok.

Osep bokongon ina e urok plaungan

²² Umu ka wokboi nating umeini upu puda urok pelengon keniye. Umoboko itau alo ka tikaranga tivati umu vala ma aitno lisak itau ke lumu bokongon kovok. Aurou. Umoboko itau lama tikaranga tivati umu koke tikaranga tivati umu kovok. Aitno lumu kene ke urok pelengon e umeinie itau. E ke elio langane umodue anit ke Ida Puda.

²³ Deka umoboko nangurasau ke lumu bokongon keniye langka umoboko ke Upu Puda ila bokongon e langka umoboko ke osep urok bokongon vala kovok.

²⁴ Umodue lumu bokongon itau kesua umeile omur umodue Upu Puda Krais ila bokongon. Deka ma iye kar kerengen ke umu ka iye wai ine kodong.

²⁵ E osep ka tidue elio soulu ma Ida Tapolngon koli batne ke isak. Ma iye didi ila elio itau ka kene vala deka wade osep ka pula keniye ine.