Kolosi 2 - Aria New Testament

¹ Ngawaiki ma umeile langane. Ngaboko engil lokono ma ngalua umu kap osep ka tidong ke sios ke armok Laodisia e osep leklou blang ka tivati ngong dau kovok.

² Ngadue bokongon tonari ma umodong dagar e ma umu ka pula keniye lana umu pulu e elio langane res polou omba. Ngawaiki ma umodue ilengen itau e ma umeile omur ke pelengon lokono. E ngawaiki ma umeile batne lokono ke Ida Tapolngon ila pelengon ka dong kukwop. Krais iye tona pelengon ka dong kukwop batne.

³ Krais ile ilengen itau keniye e elio itau keniye e iye karanga lua osep ma tile ine blang.

⁴ Ngawaiki ma gute gesa karanga wai dikngen ke umu e yak umu kovok deka ngawai pelengon ane.

⁵ Pampamu lungong dong kap umu kovok e dau ke aitno lungong ane langka ngadong kap umu. E aitno lungong itau ma ngavati umu umevri dagar e aitno lumu dagar lokono ke Krais.

Itekis dagar ke Krais e itodue udo mosongon ka itau lokono

⁶ Eriar langka aitno lumu la dagar ke Krais Yesus kodong ma iye Upu Puda deka ma umodong ke iye e umelila kap iye.

⁷ Ngawaiki umevri dagar ke iye langka akai ka gigitno tiduru ke taklak aitno e vri dagar ine. E silang blang langka kadanga dong ke taklak e due ninu vri dagar ngawaiki aitno lumu ila dagar due umu umopolou dagar lokono. Eriar langka oglou osep tiparere umu deka eknikane umedidi pelengon tonari e umawai tenkyu ke Ida Tapolngon ke wan ka pula keniye ka iye due ke umu.

⁸ Deka umaplau umu itau lama osep tiyak umu e tipagolgol aitno lumu ke urok pelengon vala. Tidue pelengon tonari ke urok seia e ke ano soulu ka tiplau sirva e taklak. E pelengon tonari me ke Krais kovok.

⁹ Umeile oglou Krais polou langka itosep e Ida Tapolngon ila elio keniye dong ke Krais e isak orwo eriar.

¹⁰ Umeneklep ke Krais deka umodue mosongon ka lokono lokono batne ke iye. Ila arit ombatno e iye mole e plau ano ka pula keniye ka tiplau wan bitna bitna.

¹¹ Umeneklep ke iye deka umodue elio ulangngan ina. E elio ulangngan ina tonari langka elio ka osep tidue ke pampamu lumu kovok. Aurou. Krais ulang umu langka iye klok lumu elio epmes ina deka elio epmes ina plau umu blang kovok.

¹² Alo ka umodue elio paunimngen ina umenis osep aitno lumu dagar ke Ida Tapolngon ka ila arit due Krais poga tito e dong blang. Deka ari osep tipaunim umu langka umogosok Krais umemete e osep tiyas umu kap iye. Deka Ida Tapolngon ila arit due umu umogosok Krais umopoga umetito e umodong blang.

¹³ Oglou umodue elio soulu bitna bitna e umedidi elio ke aitno lumu oglou ina deka ke elio tonari langka anmu timete. E Ida Tapolngon due umu umodue lumu mosongon oku ina kap Krais deka Ida Tapolngon klok lumu elio epmes ina la.

¹⁴ Oglou itadar Ida Tapolngon ila pelengon e itodue elio epmes ina bitna bitna ka tivri lite e iye sogo ite kente kente udo elio soulu ke ila buk. Deka alo ka Ida Tapolngon klok udo elio epmes ina la ane langka iye sak udo elio epmes ina ke ila buk ma isak yagos e tivri lite kovok. Elio ka iye lua ite langka iye nilim udo elio epmes ina bitna bitna ke Krais ina akai deka isak yagos.

¹⁵ Iye due wan ka ano e angelo soulu ka tiplau omur omur urok arit yagos. Ke Krais ina akai Ida Tapolngon nis osep ka pula keniye iye mole wan tonari e due isak tipolou langka isak wan adai vala.

Itemete kap Krais

¹⁶ Umosongon gute gesa ma iye wade umu ke wan ka umangen koke wan ka umeinim koke ke oklou bitna bitna ka osep tirere ma itolotuim Ida Tapolngon ine koke ke rogo ke alo ka taiko nepel oku koke ke oklou sabat kovok.

¹⁷ Wan tonari isak langka ano e nisngen vala ke wan bitna bitna ka ma me e Krais iye wan ka lokono.

¹⁸ Langka gute gesa waiki pi lumu wan itau batne ke wan ka iye vati alo ka iye munu ano koke langka iye waiki umepes umu umoduru e umolotuim ensel io umosongon iye ma iye due langane kovok. Gute ka ila elio langare didi aitno oglou ina e aitno mter langka iye itau lokono e iye due ilengen itau.

¹⁹ Osep ka langare tisongon elio ka tikis dagar ke Krais ka iye mgo ke ila osep ka pula keniye. Krais langka otuk lite e ite pampamu ine. Krais kar ngangon ke ite e ila arit due ite itodong kene pulu ma itopolou dagar langka Ida Tapolngon waiki itopolou dagar. Itopolou dagar langka pampamu lite ina papalma bitna bitna due pampamu lite dong dagar.

²⁰ Umemete kap Krais kodong e ano ka tiplau taklak ane tiplau umu kovok. Deka ina lange umu dau umelila langka isak dau tiplau umu? Ina lange umedidi urok pelengon bitna bitna?

²¹ Pelengon tonari langka parangan langane. Umekise sakam. Umangene sakam. Umakaie sakam.

²² Parangan to-nari la ke wan bitna bitna ka isak polou yagos alo ka itodue wan gesa ine. Parangan tonari polou ke osep aitno lisak vala e tiwaiki itedidie.

²³ Parangan tonari bitna langka isak ilengen omba e tisruk ite ma itolotuim ensel e itepes ite itoduru e itadangdang pampamu lite ke ngangon e aki e wan langane. E parangan tonari karanga lua ite ma itadangdang pampamu lite ke elio oglou ina kovok. Aurou.