Jon 4 - Aria New Testament

Yesus wai ke apmang Samaria ina

¹ E Ida Puda ile osep Farisi ina tiklingen omon langka iye paunim osep pula e tipolou ila disaipel e inarak sasa mole Jon ila disaipel inarak sasa.

² E dau Yesus tona paunim osep kovok. Aurou. Ila disaipel tipaunim osep vala.

³ Deka iye songon omur Judia e la ke omur Galili.

⁴ E iye lila airavu ke omur Samaria ma iye polou ke omur Galili.

⁵ E iye lila ke omur Samaria e polou ke armok Sikar ka dong olwo boto ke taklak ka Jekop kare ke otno arang Josep.

⁶ E aki ina ovuk ka Jekop yase dong olwo boto ke armok are e Yesus dong ke aki ina ovuk tonari kesua ila langan uder iye. Alo ari langka oklou airavu.

⁷ Mase apmang Samaria ina me ma iye itip aki ke aki ina ovuk. E Yesus wai ke iye langane. “Ngawaiki ngainim aki. Ma amkar aki gesa ke ngong.”

⁸ Iye wai langane kesua ila disaipel isak kla ke armok ma tikli inarak ngangon.

⁹ Deka apmang Samaria ina wai ke iye langane. “Wom gute Yuda ina e ngong apmang Samaria ina deka ina lange empmi ngong ma ngakar aki gesa ke wom?” Iye wai langane kesua osep Yuda ina e osep Samaria ina tidue wan kene pulu kovok.

¹⁰ E Yesus koli wai langane. “Langka emile presen ka Ida Tapolngon waiki kare ke wom e langka emile gute sei iye wai ke wom ma amkar iye aki deka amkaranga empmi iye e ma iye kar aki ka mosongon ina ke wom.”

¹¹ E apmang wai ke iye langane. “Gute. Aki ina ovuk ane duru moli e lem wan ka omdue aki ine dong ke wom kovok. Omdue aki ka mosongon ina ka amwai ine ke omur ge?

¹² Oglou udo eia Jekop inim aki ke aki ina ovuk ane kap titno e ila sipsip e ila bulmakau. E iye kare ke imi. E oku ane aitno lugom mter langka ommole iye i?”

¹³ Deka Yesus koli wai ke iye langane. “Gute sei ka inim aki ane ma aki vel iye blang.

¹⁴ E gute sei ka inim aki ka ngakare ke iye ma aki vel iye blang kovok. Aurou. Aki ka ngakare ke iye ma dong langka aki ina ovuk ka polou ke aitno ka kar iye mosongon ka dong vala dong.”

¹⁵ Deka apmang wai ke Yesus langane. “Oka. Amkar aki are ke ngong ma aki vel ngong blang kovok e ngame e ngaitip ke aki ina ovuk ane blang kovok.”

¹⁶ Deka Yesus wai ke iye langane. “Amla e omdue lem boget deka emiding ane.”

¹⁷ E apmang koli wai ke iye langane. “Lou boget dong kovok.” E Yesus wai ke iye langane. “Amwai lokono alo ka amwai lem boget dong kovok.

¹⁸ Kesua oglou emgi aling elme e gute ka oku ane omdong kap iye io iye lem boget kovok. Lem pelengon ka amwai ine iye lokono.”

¹⁹ E apmang wai ke iye langane. “Gute. Aitno lungong mter wom gute napaprangan ina gesa.

²⁰ Oglou limem seia tilotuim Ida Tapolngon ke gigri ane e umu osep Yuda ina umawai ma itolotuim Ida Tapolngon ke Jerusalem.”

²¹ E Yesus koli wai langane. “Bela. Emklingen lou pelengon e aitno lugom la dagar ine. Mase taim ma polou alo ka umolotuim Pmada ke gigri ane koke Jerusalem kovok.

²² Umu osep Samaria ina umolotuim wan ka umeile itau ine kovok. E imi osep Yuda ina imolotuim wan ka imeile itau ine. Kesua Ida Tapolngon pagei osep Inarak Luangan ka lua isak ke urok elio epmes ina ma iye polou ke osep Yuda ina.

²³ E dau mase osep ka tilotuim Ida Tapolngon lokono ma tilotuim iye ke Ano Itau e ke elio lokono. Kesua Ida Tapolngon waiki osep ka urok elio langane ma tilotuim iye. E taim are polou kodong.

²⁴ Ida Tapolngon iye ano e osep ka tilotuim iye ma tilotuim iye ke Ano Itau e ke elio lokono.”

²⁵ Deka apmang wai ke iye langane. “Ngaile Mesaia ka Krais ka iye gute ka Ida Tapolngon rere ma iye lua osep ke urok elio epmes ina ma me e alo ka iye polou ma iye palongo udo malak ke wan bitna bitna keniye.”

²⁶ Deka Yesus wai ke iye langane. “Ngong ka ngawai ke wom ngong gute ka amwai ine.”

²⁷ Alo ari Yesus ila disaipel tiding e tidigrik alo ka tivati Yesus dong e wai ke apmang. E gute kene ke isak pmi apmang langane kovok. “Amwaiki omdue wansua?” Koke tipmi Yesus langane kovok. “Ina lange amwai ke apmang are?”

²⁸ Deka apmang songon aki tarna dong are e la iding ke armok e wai ke osep.

²⁹ Iye wai ke isak langane. “Osep umomo e umavati gute ka wai ke ngong ke wan ka pula keniye ka oglou ngadue. Gute ane iye Krais ka Ida Tapolngon rere ma iye lua osep ke urok elio epmes ina koke aurou?”

³⁰ Deka tisongon armok e tilila kla ke Yesus.

³¹ E alo ari Yesus ila disaipel tiwai ke iye langane. “Rabai emngen ngap ngangon.”

³² E iye koli wai ke isak langane. “Ngau ngangon dong ka ngangene ka umeile ine kovok.”

³³ Deka ila disaipel tipmi isak pulu langane. “Gute gesa me e kar ngangon ke iye koke aurou?”

³⁴ E Yesus wai ke isak langane. “Ngau ngangon langka ngadidi gute ka pagei ngong ngame aitno e ngababrum bokongon ka iye kare ke ngong ma ngadue.

³⁵ Umeile osep tiwai langane alo ka tiusak wan londo. ‘Taiko apanal ma mela yagos deka wan polou anino deka itepie.’ E ngawai ke umu langane. Umavati wan ka umousake ke yage. Wan tonari lana ka anino polou oku ane.

³⁶ E oku ane osep ka tipi ngangon tidue inarak klingen ine kodong e titagom wan ma tidue urok mosongon ka dong vala dong. Ma osep ka tiusak wan e osep ka tipi wan tonari aitno lisak neser pulu.

³⁷ E ke elio ane pelengon ka wai langane polou lokono. ‘Gute kene usak wan e gute silang pi wan tonari.’

³⁸ Ngapagei umu ma umepi wan ka osep leklou tiusake. Osep leklou tiboko engil e umepi wan ka anino kesua batne ke urok bokongon engil tonari.”

³⁹ Osep Samaria ina pula ka tidong ke armok are aitno lisak la dagar ke Yesus kesua tiklingen apmang ila pelengon ka langane. “Iye wai ke ngong ke wan ka pula keniye ka oglou ngadue.”

⁴⁰ E alo ka tipolou ke iye tiwai dagar ma iye dong kap isak. E iye dong kap isak oklou orwo.

⁴¹ E tiklingen ila pelengon deka osep pula leklou aitno lisak la dagar ke iye.

⁴² E tiwai ke apmang tonari langane. “Oku ane aitno limi dagar ke iye batne ke lem pelengon vala kovok. Aurou. Eknikane imi tona imeklingen ila pelengon e imeile lokono gute ane iye gute Krais ka Ida Tapolngon rere ma iye lua osep ka tidong ke taklak ke urok elio epmes ina.”

Yesus lua gute otno arang ka paia

⁴³ Oklou epmes orwo mela yagos deka Yesus songon omur Samaria e la ke omur Galili.

⁴⁴ E oglou Yesus wai langane. ‘Ma osep tidue anit ke gute napaprangan ina ke ila omur batne kovok.’

⁴⁵ Alo ka iye polou ke omur Galili osep Galili ina aitno lisak itau alo ka tivati iye. Kesua oglou isak kla ke Jerusalem ke rogo omba blang e tivati elio keniye ka iye due ke rogo omba tonari.

⁴⁶ E Yesus polou ke Kena ka dong ke omur Galili blang. Ke armok tonari oglou iye due elio arit ina ka iye due aki polou aki wain. E gute gavman ina gesa otno arang paia ke armok Kaperneam.

⁴⁷ E alo ka iye klingen omon Yesus songon omur Judia e iding ke omur Galili iye la ke iye e wai dagar ma iye duru me e due otno arang polou itau blang. Kesua isuk boto otno arang ma mete.

⁴⁸ E Yesus wai ke iye langane. “Langka umavati elio arit ina ka nisngen kovok ma aitno lumu la dagar ke Ida Tapolngon kovok.”

⁴⁹ Deka gute gavman ina koli wai langane. “Gute namor. Oku ane omo omsuong lama erigu arang mete.”

⁵⁰ E Yesus wai ke iye langane. “Amla ma etim arang polou itau blang.” E gute aitno dagar ke Yesus ila pelengon e songon iye e la.

⁵¹ E alo ka iye dau lila duru ke ekreng ila wokboi nating leklou tisoson iye e tiwai otno arang polou itau blang kodong.

⁵² Deka gute tonari pmi isak ke lesen otno arang nogrum polou itau blang e tikoli tiwai ke iye langane. “Tarna ka engil polou epen narep ke 1 kilok ke kirui.”

⁵³ Deka mimi ina abo ile aua ari iye alo ka Yesus wai ma otno arang polou itau blang. E iye kap osep ka tidong kap iye ke ila ninu aitno lisak la dagar ke Ida Tapolngon.

⁵⁴ Elio ane elio arit ina ka nisngen ka orwo ina ka Yesus due alo ka iye songon omur Judia e la ke omur Galili.