Jon 19 - Aria New Testament

¹ Deka Pailat wai ma osep ola ina tiules Yesus.

² E tipilai galou marak e tidue lelei Yesus baraine e titnei iye ke molo ka edimor langka osep ka tivri mgo ke omur omur urok baresngen.

³ E tivri ke bitna e tiwai ke iye langane. “Imodue anit ke wom ka emvri mgo ke osep Yuda ina.” E limsak napau ke banga.

⁴ Deka Pailat la ke osep Yuda ina blang e wai ke isak langane. “Osep umoklingen. Ngapaur gute ane ke omtomu ma umakaranga umeile ngaile ila elio gesa vri ke iye ma iye mete ine kovok.”

⁵ Deka Yesus polou ke amtarsak e galou marak lelei baraine e iye tnei molo ka edimor. E Pailat wai langane. “Osep umavati gute ane.”

⁶ Alo ka osep loulou ina ka omba e osep ka tiplau Ida Tapolngon ila ninu tivati Yesus tiwai langane. “Umenilim iye ke ina akai.” E Pailat wai ke isak langane. “Umu tona umodue e umenilim iye ke ina akai kesua ngawai ke iye e ngaile ila elio gesa vri ke iye ma iye mete ine kovok.”

⁷ Deka osep Yuda ina tikoli tiwai langane. “Limem pelengon dagar dong ka wai gute ane ma mete. Kesua iye wai iye Ida Tapolngon Otno Arang.”

⁸ Alo ka Pailat klingen pele-ngon are iye lim omba ine.

⁹ Deka iye sep ke ila ninu blang e pmi Yesus langane. “Lem omur batne ge?” E Yesus koli wai ke iye kovok.

¹⁰ E Pailat wai langane. “Wom omkoli lou pelengon kovok i? Emile langane kovok i? Lou arit dong ma ngakaranga ngasongon wom amla koke ngakaranga ngawai ke osep ma tinilim wom ke ngap akai.”

¹¹ Deka Yesus koli wai ke iye langane. “Langka Ida Tapolngon kar arit ke wom kovok amkaranga omdue elio gesa ke ngong kovok. E ke batne langane gute ka kar ngong ke wom ila elio epmes ina omba e mole lem elio epmes ina.”

¹² Pailat klingen pelengon ane deka iye krim ekreng ma iye karanga songon Yesus la. E osep Yuda ina tidaiku omba langane. “Langka omsongon gute ane la wom Sisar ila aten kovok. Kesua gute ka wai iye vri mgo ke omur gesa iye Sisar ina oul.”

¹³ Alo ka Pailat klingen urok pelengon iye paur Yesus ke dogur e dong ke ila bota ka iye wade osep ine. Bota tonari dong ke omur ka tisire plua ka opmu ina. E ke pelengon Hibru tisire Gabata.

¹⁴ E oklou ari oklou ka osep Yuda ina tikere ngangon e wan bitna bitna ke oklou ka me ka tidue rogo omba ka lana ine la ke alo ka Ida Tapolngon lua osep Yuda ina tisongon omur Isip. E ari langka oklou airavu. E Pailat wai ke osep Yuda ina langane. “Umavati gute ka vri mgo ke umu.”

¹⁵ E tidaiku langane. “Umapaur iye la. Ma iye la. Umenilim iye ke ina akai.” E Pailat wai ke isak langane. “Umawaiki nganilim gute ka vri mgo ke umu ke ina akai?” E osep loulou ina ka omba tikoli tiwai ke iye langane. “Sisar vala iye gute ka vri mgo ke imi.”

¹⁶ Deka Pailat kar Yesus ke isak ma tinilim iye ke ina akai.

Osep tinilim Yesus mana ke ina akai

¹⁷ Deka osep ola ina tidue Yesus e tipaur iye tisongon armok e Yesus kalke ina akai. E isak kla ke omur ka tisire omur ka baraine erine e ke pelengon Hibru tisire Golgota.

¹⁸ Ke omur are tinilim iye mana ke ina akai e tinilim osep arang orwo kap iye. Tinilim gute kene ke ina akai ke limla odung e gute silang ke ina akai ke limla gala. E Yesus dong airavu ke isak orwo.

¹⁹ E Pailat sogo pelengon e tipoue ke Yesus ina akai e pelengon tonari langane. “Gute ane Yesus ka Nasaret ina ka iye gute ka vri mgo ke osep Yuda ina.”

²⁰ E osep Yuda ina pula tiritim sogongon tonari kesua omur ka Yesus mana ine dong olwo boto ke armok e Pailat sogo sogongon ke pelengon eklu. Iye sogo ke pelengon Hibru e ke osep Rom ina urok pelengon e ke pelengon Grik.

²¹ Deka osep Yuda ina urok osep loulou ina ka omba tiwai ke Pailat langane. “Omsogo ‘gute ka vri mgo ke osep Yuda ina’ kovok. Aurou. Omsogo langane. ‘Gute ane wai iye gute ka vri mgo ke osep Yuda ina.’”

²² E Pailat koli wai ke isak langane. “Aurou. Pelengon ka ngasogoe kodong ma dong.”

²³ Alo ka osep ola ina tinilim Yesus mana ke ina akai yagos osep ola ina tiwade ila klos ke emkil apanal e isak kene kene tidue emkil kene. E tidue ila siot blang ka osep tidue ke molo kene vala.

²⁴ E tiwai pulu langane. “Ma itotrum siot ane kovok e itouri opmu daudeng ka nisngen dong ine ma iteile sei due ila siot.” Tidue langane ma Ida Tapolngon ila pelengon palma ka oglou gute napaprangan ina gesa sogoe polou lokono. Iye sogo langane. “Tiwade pulu ke lou klos e tiuri opmu daudeng ka nisngen dong ine ma tile sei ma due lou siot.”

²⁵ Deka osep ola ina tidue langare. E apmang apanal tivri olwo boto ke Yesus ina akai. Isak Yesus tna e tna ina aiver e Maria ka gute Klopas esna e Maria ka armok Makdala ina.

²⁶ Alo ka Yesus vati tna e ila disaipel ka iye lana iye omba ke iye tivri olwo boto iye wai ke tna langane. “Nina oku ane gute are langka etim arang.”

²⁷ Deka iye wai ke ila disaipel langane. “Oku ane apmang are langka ngap aiya.” E ke alo ari e la ine Yesus ila disaipel tonari due apmang e iye dong ke ila ninu kap iye.

Yesus mete

²⁸ E Yesus mana ke ina akai e ile wan ka pula keniye ka Ida Tapolngon waiki iye due isak yagos kodong. E ma Ida Tapolngon ila pelengon ka oglou gute napapra-ngan ina gesa sogoe polou lokono iye wai langane. “Kre lungong kakrak e ngawaiki nga­inim aki.”

²⁹ E dis dong are ka aki wain ka meli dong ine. E tidue adumeo sep ke dis deka tidue ke akai hisop tetna e tidue tito ke Yesus ene.

³⁰ Alo ka Yesus inim aki wain ka meli iye wai langane. “Lou bokongon yagos.” Deka apna duru e iye mete.

Gute ola ina mter Yesus galna

³¹ Oklou ari oklou ka tikere wan bitna bitna ke oklou sabat e sabat ari sabat omba. E ke batne langane osep Yuda ina tiwaiki osep pampamu lisak dau timana ke inarak akai alo ka sabat polou kovok. E tipmi Pailat ma osep tibong osep ka tinilim isak ke inarak akai kamsak ma timete suong e tidue isak tiduru ke inarak akai.

³² Deka osep ola ina time e tibong kamsak ke osep orwo ka tinilim isak ke inarak akai kap Yesus.

³³ E alo ka tipolou ke Yesus tivati iye mete kodong e tibong kamla kovok.

³⁴ E gute ola ina kene mter Yesus galna ke ola e suong marau e aki baser polou.

³⁵ E gute ka vati elio ane palongo ine e ila palongongon lokono. E iye ile iye wai lokono ma aitno lumu karanga la dagar ke ila pelengon.

³⁶ Elio ane polou ma pelengon ka dong ke Ida Tapolngon ila pelengon palma ma polou lokono. Pelengon tonari langane. “Osep ma tibong erine kene vala kovok.”

³⁷ E Ida Tapolngon ila pelengon palma silang wai langane. “Osep ma tivati gute ka oglou timter iye.”

Osep tiyas Yesus pampamu ine

³⁸ Wan tonari polou deka mase Josep ka Arimatea ina polou ke Pailat bitna e pmi iye ma iye due e yas Yesus pampamu ine. E Josep tonari iye Yesus ila disaipel gesa e dau iye bisi ine kesua iye ulou tarna ke osep Yuda ina. Deka Pailat wai iye karanga due Yesus pampamu ine e iye la due.

³⁹ E Nikodemus ka oglou iye la wai ke Yesus ke epmes me blang e paur wan ka amna itau ka osep tidue ke akai kain orwo olune ka ina anit langka 30 kilogram.

⁴⁰ E tidue Yesus pampamu ine e tidugume ke molo ka itau kap wan ka amna itau. Elio ane didi elio ka osep Yuda tidue alo ka tiyas osep.

⁴¹ E yage dong ke omur ka tinilim Yesus mana ke ina akai. E ke yage tonari osep tiyas denga oku ke opmu ka tidue gute pampamu ine munu ine dau kovok.

⁴² E oklou are oklou ka osep tikere wan bitna bitna ke oklou sabat ine. E silang denga tonari dong olwo boto e ke batne langane tidue Yesus pampamu ine munu ke denga are.