Jon 18 - Aria New Testament

Judas lai Yesus ina

¹ Yesus wai itau ke Ida Tapol-ngon yagos deka iye gosok ila disaipel tisongon omur are e tibru aki Kidron e isak kla ke omur ka yage gesa ka akai oliv pula tidong ine deka Yesus isak tisep ke yage.

² E Judas ka iye lai Yesus ina ile ke yage tonari blang kesua aling pula Yesus dong are kap ila disaipel.

³ Deka Judas due osep ola ina leklou ke osep Rom ina e osep leklou ka tiplau Ida Tapolngon ila ninu. Osep loulou ina ka omba e osep Farisi ina tipagei osep ka tiplau Ida Tapolngon ila ninu tonari isak kla kap Judas. E tikalke lam e esluk e evlei ina wan e isak kla ke yage.

⁴ E Yesus ile wan ka pula keniye ka ma tipolou ke iye e la ke isak e wai ke isak langane. “Umekrim gute sei?”

⁵ E tikoli tiwai langane. “Imeme imekrim Yesus ka Nasaret ina.” Deka Yesus wai ke isak langane. “Ngong tona aneo.” E Judas ka lai iye ina vri kap isak.

⁶ Alo ka tiklingen Yesus wai “ngong tona aneo” tikrik ke iye e tigene ke taklak.

⁷ E Yesus pmi isak blang langane. “Umekrim gute sei?” E tikoli tiwai langane. “Imekrim Yesus ka Nasaret ina.”

⁸ Deka Yesus wai ke isak langane. “Ngawai ke umu kodong ngong Yesus. E langka umekrim ngong umosongon osep are isak kla.”

⁹ Yesus wai langane ma pelengon ka oglou iye wai ine polou lokono. Oglou iye wai langane. “Livou. Gute kene ke osep ka amkar isak ke ngong imina kovok.”

¹⁰ Deka Saimon Pita due elil omba ka iye kalke e mluk gute e blou tala odung kopuk. Gute tonari angaine Malkus e iye gute bokongon ina ke gute loulou ina ka mgo.

¹¹ Deka Yesus wai ke Pita langane. “Omdue lem elil omba iding sep. Aitno lugom lange? Ma nganamani agegeng ke osep ka Livou rere ke ngong koke aurou? Ma nganamani ine vala.”

Osep tipaur Yesus ke Anas bitna

¹² Deka osep ola ina ka osep Rom ina kap gute ka vri mgo ke isak e osep ka tiplau Ida Tapolngon ila ninu tidue Yesus e tipou limla ke galou.

¹³ E mgo tipaur iye ke gute Anas ka iye gute Kaiafas rana arang. E Kaiafas iye gute loulou ina ka mgo ke tobor are.

¹⁴ Oglou Kaiafas wai ke osep Yuda ina langane. “Wan ka itau gute kene mete ke ite osep Yuda ina lama ite ka pula keniye itemete.”

Pita wai iye ile Yesus kovok

¹⁵ E Saimon Pita e disaipel silang tididi Yesus. E disaipel silang iye gute loulou ina ka mgo ila aten gesa e ke batne langane iye karanga sep ke omur ka dong mgo ke gute loulou ina ka mgo ila ninu kap Yesus.

¹⁶ E Pita dau dong ke dogur. Deka disaipel silang tonari la wai ke apmang ka plau ari ina ekreng bitna e due Pita sep ke omur tonari.

¹⁷ Deka apmang tonari ka plau ekreng bitna wai ke Pita langane. “Wom gute Yesus ila disaipel blang i?” E Pita koli wai ke iye langane. “Aurou. Ngong ila disaipel gesa kovok.”

¹⁸ Omur are epen epen e gute loulou ina ka mgo ila osep bokongon ina e osep ka tiplau Ida Tapolngon ila ninu tibik eiou e timarang ine. Deka Pita la vri kap isak e marang ine.

Gute loulou ina ka mgo sin elio vri ke Yesus

¹⁹ Ari gute loulou ina ka mgo pmi Yesus ke ila disaipel e ke ila pelengon ka iye parere osep ine.

²⁰ Deka Yesus koli wai langane. “Ngawai malak ke osep pula amtarsak. Ngawai ke osep Yuda ina urok duningen ina ninu e ke omur ka lelei Ida Tapolngon ila ninu ke omur ka osep tiduni pulu ine. E ngakukwop lou pelengon kovok.

²¹ Ina lange empmi ngong ke wan tonari? Empmi osep ka tiklingen lou pelengon ke wan ka ngawai ke isak. Tile pelengon ka ngawai ine.”

²² Yesus wai langane deka gute kene ka plau Ida Tapolngon ila ninu uri limla napar ke Yesus banga e iye wai langane. “Wom sei ma amwai langane ke gute loulou ina ka mgo?”

²³ E Yesus koli wai langane. “Langka lou pelengon soulu amwai malak ke lou pelengon ka soulu. E langka ngawai pelengon itau ina lange ommluk ngong?”

²⁴ Deka Anas pagei Yesus la ke Kaiafas ka iye gute loulou ina ka mgo. E dau tipou Yesus limla ke galou.

Pita wai iye ile Yesus kovok blang

²⁵ E Saimon Pita dau vri marang ke eiou e osep tipmi iye langane. “Wom gute Yesus ila disaipel gesa koke aurou?” E Pita bisi ine e wai langane. “Aurou. Ngong ila disaipel gesa kovok.”

²⁶ E gute loulou ina ka mgo ila wokboi nating gesa dong are. E gute ka Pita blou tala kopuk dong ke ila osua e gute tonari wai ke Pita langane. “Ngavati wom omdong ke yage kap Yesus i?”

²⁷ Deka Pita bisi ine blang e lokono kwako bole wai.

Osep tipaur Yesus ke Pailat bitna

²⁸ Ke kotkotu lokono osep tidue Yesus ke Kaiafas ila ninu e tipaur iye la ke gute Rom ina ka vri mgo ke omur are ila ninu omba. E tisep ke ninu tonari kovok lama aitno lisak polou amum ke Ida Tapolngon bitna. Tilim lama aitno lisak polou amum e tikaranga tingen rogo omba ka lana ine la ke alo ka Ida Tapolngon lua osep Yuda ina tisongon omur Isip kovok.

²⁹ Deka Pailat la ke isak e wai langane. “Umesin elio lange vri ke gute ane?”

³⁰ E tikoli tiwai langane. “Langka gute ane gute soulu bitna kovok ma imapaur iye ke wom kovok.”

³¹ Deka Pailat wai ke isak langane. “Umodue e umedidi lumu pelengon dagar e umawade iye ine.” E tikoli tiwai langane. “Aurou. Umu osep Rom ina umosongon imi ma imemter gute ma iye mete kovok.”

³² Oglou Yesus wai ke elio ka iye ma mete ine e wan ane polou ma due Yesus ila pelengon polou lokono.

³³ Pailat sep ke ila ninu omba blang e gi ke Yesus e wai ke iye langane. “Wom gute ka vri mgo ke osep Yuda ina i?”

³⁴ E Yesus koli wai langane. “Emdidi aitno lugom e empmi ngong langane koke osep leklou tiwai ke wom ke ngong e empmi ngong ine?”

³⁵ Deka Pailat koli wai langane. “Ngong gute Yuda ina kovok. Lem osua e osep loulou ina ka omba tipaur wom ke ngong. Omdue sua?”

³⁶ E Yesus koli wai langane. “Omur ka ngavri mgo ine dong ke taklak ane kovok. Langka omur ka ngavri mgo ine dong ke taklak deka lou osep ma tidue evlei ma osep tikar ngong ke osep Yuda ina kovok. E omur ka ngavri mgo ine dong ke taklak ane kovok.”

³⁷ Deka Pailat wai ke iye langane. “Alo ka amwai wom gute ka vri mgo ke omur gesa lem pelengon ane iye pelengon lokono?” E Yesus koli wai langane. “Amwai lokono alo ka amwai ngong gute ka ngavri mgo ke omur gesa. E ke batne langane nina divir ngong e ngame ke taklak ma ngapalongo osep ke pelengon lokono. E osep ka tiklingen pelengon lokono tiklingen kre lungong.”

³⁸ E Pailat wai langane. “Pelengon lange iye pelengon lokono?” Pailat wai langane yagos deka iye la ke osep Yuda ina amtarsak blang e wai ke isak langane. “Ngaklingen gute Yesus ila pelengon e ngaile ila elio gesa vri ke iye ma iye mete ine kovok.

Pailot wai ma osep tinilim Yesus ke ina akai

³⁹ E ke tobor kene kene alo ka umodue rogo omba ka lana ine la ke alo ka Upu Tapolngon lua umu umosongon omur Isip ngadue apu langane. Ngasongon gute kalabus ina kene ka umerere. Umawaiki ngasongon gute ka vri mgo ke umu osep Yuda ina?”

⁴⁰ Deka tidaiku langane. “Aurou. Omsongon gute are kovok. Imawaiki omsongon gute Barabas.” E gute Barabas iye gute panakongon ina.