Jon 14 - Aria New Testament

Yesus wai iye ekreng ka paur osep ke omur heven

¹ “Aitno lumu kro omba sakam. Ma aitno lumu dagar ke Ida Tapolngon e aitno lumu dagar ke ngong blang.

² Eliang pula tidong ke Livou ila ninu ke omur heven. E ngala are ma ngakere omur ka ma umodong ine. Langka langane kovok ma ngakaranga ngapalongo lumu ine kovok.

³ E ngala e ngakere lumu omur e mase ma ngaiding e ngadue umu ma umodong kap ngong ke omur ka ngadong ine.

⁴ E umeile ekreng ka la ke omur ka ngala ine kodong.”

⁵ Deka Tomas wai ke iye langane. “Ipem Puda imeile omur ka amla ine kovok e batne lange imakaranga imeile ekreng ka la are?”

⁶ E Yesus koli wai langane. “Ngong tona vala ekreng e ngong pelengon lokono batne e ngong mosongon ka dong vala dong batne. E ekreng silang dong ka osep tikaranga tididie e tipolou ke Livou kovok. Aurou.

⁷ E langka umeile ngong itau umeile Livou blang. E oku ane e la ine umeile iye kodong e umavati iye kodong.”

⁸ E Filip wai ke iye langane. “Ipem Puda emnis imi ke Abo e are karanga ke imi.”

⁹ Deka Yesus koli wai ke iye langane. “Filip ngadong kap umu tauni kodong e dau emile ngong kovok i? Gute ka vati ngong vati Livou blang. Deka ina lange amwai langane? ‘Emnis imi ke Abo.’

¹⁰ Aitno lugom lange? Aitno lugom dagar ke elio ka ngadong kap Livou e Livou dong kap ngong koke aurou? Ngadidi aitno lungong e ngawai pelengon ke umu kovok. Aurou. Livou ka dong kap ngong didi aitno e due wan ka iye waiki due.

¹¹ Aitno lumu dagar ke pelengon ane. Ngadong kap Livou e iye dong kap ngong. E langka aitno lumu dagar ke lou pelengon ane kovok io aitno lumu dagar ke elio bitna bitna ka ngadue.”

¹² “Ngawai lokono ke umu langane. Gute ka aitno dagar ke ngong ma due elio arit ina langka ngadue e silang blang ma iye due elio bitna bitna ka mole elio ka ngadue kesua ngala ngadong kap Livou.

¹³ E wan ka umepmi Ida Tapolngon ine batne ke ngong ma ngadue ma Ida Tapolngon Otno Arang nis osep ke Timla ila elio ka itau lokono.

¹⁴ Langka umepmi Ida Tapolngon ke wan batne ke ngong ma ngadue.”

Yesus wai ma iye pagei Ano Itau me

¹⁵ “Langka umu lana umu ke ngong ma umeini lou pelengon.

¹⁶ E ma ngapmi Livou e ma iye pagei Luangan silang ke umu e ma iye dong kap umu aling aling.

¹⁷ Luangan tonari Ida Tapolngon Ano Itau ka wai pelengon lokono vala. E osep taklak ina tikaranga tidue kovok kesua tivati iye kovok e tile iye kovok. E umeile iye kesua iye dong kap umu e ma iye dong ke aitno lumu blang.”

¹⁸ “Ma ngasongon umu langka osep ka isak bimsei kovok. Aurou. Mase ma ngame ke umu.

¹⁹ Isuk boto dau e osep ke taklak ma tivati ngong blang kovok. E ma umavati ngong. Ngadong ke mosongon e ke batne ane umu blang ma umodong ke mosongon.

²⁰ E alo ka elio tonari polou ma umeile ngadong kap Livou e umodong kap ngong e ngadong kap umu.

²¹ Gute ka due lou pelengon e inie iye gute ka iye lana iye ke ngong. E gute ka iye lana iye ke ngong ma Livou lana iye ke gute tonari. E ngong blang ma ngong lana ngong ke iye e nganis ngong malak ke iye.”

²² Deka Judas ka Judas silang e Judas Iskariot kovok pmi Yesus langane. “Ina lange ma emnis wom malak ke imi vala e ke osep ka pula keniye kovok?”

²³ E Yesus koli wai ke iye langane. “Langka gute lana iye ke ngong ma iye ini lou pelengon e ma Livou lana iye ke gute tonari e ma imorwo imeme ke iye e ma imodong kap iye.

²⁴ E gute ka iye lana iye ke ngong kovok iye ini lou pelengon kovok. E pelengon ka ngawai iye lou pelengon vala kovok. Aurou. Pelengon ane Livou ka pagei ngong ngame ila pelengon.”

²⁵ “Ngawai lou pelengon ane ke umu alo ka dau ngadong kap umu.

²⁶ E mase ma Livou pagei Luangan silang ma iye kasip amun ngong e ma iye parere umu ke wan ka pula keniye e sruk aitno lumu ma omtomu sisir lou pelengon.”

²⁷ “Ngasongon umu e dau ngadue lou elio ka aitno lumu dong epen dong kap umu. Ngakar elio tonari ke umu e iye langka elio ka osep ka taklak ina aitno lisak dong epen kovok. Aitno lumu kro ke wan bitna bitna kovok e umelim kovok.

²⁸ Oglou umoklingen ngawai ke umu langane. Ngasongon umu e ngala e mase ma ngaiding ke umu. Langka umu lana umu ke ngong aitno lumu neser kesua ngala ke Livou. E Livou mole ngong.

²⁹ E ngawai ke elio ane oku ane mgo ke alo ka wan polou ma alo ka wan tonari polou aitno lumu dagar ke ngong.

³⁰ Ma ngawai ke umu dau tauni kovok kesua Satan ka plau osep ka pula keniye ke taklak me. E iye karanga mole ngong kovok.

³¹ E ngadidi Livou aitno e ngadue wan ka iye waiki ngadue ma osep ka taklak ina tile ngong lana ngong ke Livou. Io umetito e itosongon omur ane.”