Jon 11 - Aria New Testament

Lasarus mete

¹ Alo ari dangon due gute kene ka angaine Lasarus. Iye gute ka armok Betani ina. E Betani armok ka Maria e lutno Marta tidong ine blang.

² E Maria tonari apmang ka baser wan ka amna itau ke Ida Puda kamla e sake ke apna elilo. E ina tovro Lasarus gute ka paia.

³ Deka apmang orwo tonari tivai omon ke Yesus langane. “Ipem Puda gute ka wom lana wom ke iye paia.”

⁴ Alo ka omon polou ke Yesus iye wai langane. “Paiangan ane polou ma Lasarus mete lokono ine kovok. Aurou. Polou ma osep tikakai Ida Tapolngon angaine tito la egim e ma tikakai Ida Tapolngon Otno Arang angaine tito la egim batne ke elio ane.”

^5-6 E lama Yesus lana iye ke Marta e lutno e Lasarus blang dau alo ka iye klingen omon tonari iye dau dong ke omur ka iye dong ine oklou orwo silang.

⁷ Deka mase iye wai ke ila disaipel langane. “Ma iteiding itala ke omur Judia.”

⁸ E tikoli tiwai langane. “Rabai. Oglou sasi boto itodong ke omur are e osep Yuda ina tiwaiki tiuri opmu ke wom ma emmete e oku ane amwaiki emiding ke omur are?”

⁹ E Yesus koli wai ke isak langane. “Oklou bublo ke aua songotno orwo ke oklou kene kene. Gute ka lila ke oklou gene duru kovok kesua oklou bublo e iye karanga vati ekreng itau.

¹⁰ E alo ka iye lila ke epmes iye gene kesua bublongon dong kovok e iye karanga vati ekreng itau kovok.”

¹¹ Yesus wai langare deka wai ke isak langane. “Udo aten Lasarus munu kudung e ngala ma ngadue tipa.”

¹² E ila disaipel tikoli tiwai langane. “Ipem Puda langka iye munu kudung ma iye polou itau blang.”

¹³ E tile iye wai Lasarus mete kodong kovok. Aurou. Aitno lisak mter langka iye wai Lasarus munu kudung vala.

¹⁴ Deka Yesus wai malak ke isak langane. “Lasarus mete kodong.

¹⁵ E aitno lungong mter ke umu e aitno lungong neser kesua ngadong are kovok. Ma elio ane due aitno lumu dagar ke ngong. Ma itala ke iye.”

¹⁶ Deka Tomas ka angaine silang Didimus wai ke disaipel leklou langane. “Ma itogosok iye itala blang ma itemete kap iye.”

Yesus la ke Betani

¹⁷ E alo ka Yesus polou olwo boto ke Betani iye klingen omon Lasarus munu ke ina denga oklou epmes apanal kodong.

¹⁸ Betani dong olwo boto ke Jerusalem langka kilomita eklu.

¹⁹ E osep Yuda ina pula time tivati Marta e Maria ma tiwai pelengon ka lua isak kesua inarak tovro mete kodong.

²⁰ E alo ka Marta klingen omon Yesus me kodong iye la soson iye e Maria dau dong ke urok ninu.

²¹ E Marta wai ke Yesus langane. “Ngau Puda langka omdong ane oglou ngau tovro mete kovok.

²² E oku ane blang ngaile ma Ida Tapolngon kar wan ka amwai itau ke iye ine ke wom.”

²³ E Yesus koli wai langane. “Ma ngap tovro poga tito ke ina denga.”

²⁴ E Marta wai langane. “Ngaile iye ma poga tito ke ina denga ke oklou ka wan ka pula keniye yagos ine.”

²⁵ Deka Yesus wai ke iye langane. “Ngong tona batne ke osep ka tipoga titito ke inarak denga e ngong mosongon batne blang. Gute ka aitno dagar ke ngong ma dau dong lama pampamu ine mete.

²⁶ E gute ka dong e aitno dagar ke ngong ma iye mete kovok. Aitno lugom dagar ke lou pelengon ane?”

²⁷ E Marta koli wai langane. “Ee. Ngau Puda aitno lungong dagar wom gute Krais ka Ida Tapolngon rere ma omlua osep ke urok elio epmes ina. Wom Ida Tapolngon Otno Arang ka iye pagei me ke taklak ane.”

Yesus aitno soulu e iye kngis ke Lasarus

²⁸ Marta wai langane yagos deka iye iding ke ninu e gi lutno e nekeskes ke iye langane. “Gute parerengen ina me kodong e waiki wai ke wom.”

²⁹ Alo ka Maria klingen pelengon ane iye tito suong e la ke Yesus.

³⁰ E Yesus dau sep ke armok kovok e dong ke omur ka Marta soson iye ine.

³¹ E osep Yuda ina ka tidong ke ninu ma tiwai pelengon ka lua apmang orwo tivati Maria tito suong e songon ninu. E tididi iye kesua aitno lisak mter langka iye la ke denga ma iye kngis ine.

³² Alo ka Maria polou ke omur ka Yesus dong ine e vati iye deka iye manik duru ke taklak olwo boto ke Yesus kamla e wai langane. “Ngau Puda langka omdong ane oglou ngau tovro mete kovok.”

³³ Alo ka Yesus vati iye kngis e osep Yuda ina ka time kap iye tikngis blang aitno kro lokono e iye waiki kngis blang.

³⁴ Deka iye pmi isak langane. “Umodue pampamu ine munu ge?” E tikoli tiwai langane. “Ipem Puda omo e amvati omur iye munu ine.”

³⁵ E Yesus kngis.

³⁶ Deka osep Yuda ina are tiwai langane. “Umavati. Iye lana iye omba ke gute are.”

³⁷ E osep Yuda ina leklou tiwai langane. “Ina lange gute ane ka due gute ka bitna evin iye vati omur karanga due gute are ka mete iye mete kovok?”

Yesus due Lasarus poga tito ke ina denga

³⁸ E Yesus aitno kro lokono blang e iye la polou ke denga. E denga tonari omus ka tikading bitna ke opmu omba.

³⁹ Deka Yesus wai ke isak langane. “Umatabulbul opmu ane la.” E gute ka mete lutno Marta wai langane. “Ngau Puda iye munu ke denga oklou epmes apanal kodong e oku ane ila amnangan soulu dong.”

⁴⁰ Deka Yesus wai langane. “Ngawai ke wom oglou kodong langane. Langka aitno lugom dagar ke ngong ma amvati Ida Tapolngon ila arit.”

⁴¹ Yesus wai langane deka titabulbul opmu ka kading omus bitna la. Deka Yesus bitna tito e wai langane. “Livou aitno lungong itau ke wom kesua emklingen ngong alo ka ngawai itau ke wom.

⁴² Ngaile aling aling emklingen ngong alo ka ngawai itau ke wom e ngawai langane kesua osep pula tidong ane. Ma aitno lisak dagar ke elio ka ampagei ngong ngame ke taklak.”

⁴³ Yesus wai langane deka iye gi omba langane. “Lasarus ompolou omo ke dogur.”

⁴⁴ Deka gute ka mete polou e molo ka osep tidugum kamla e limla ine dau dong ke iye. E molo ka tidugum bitna ine dau dong ke iye. Deka Yesus wai ke osep langane. “Umekles wan ka dugum iye ma iye karanga lila.”

Osep tiwaiki tidue burwa ke Yesus

⁴⁵ Deka osep Yuda ina pula ka time kap Maria tivati elio ka Yesus due e aitno lisak la dagar ke iye.

⁴⁶ E isak leklou kla ke osep Farisi ina e tipalongo urok ke elio ka Yesus due.

⁴⁷ Deka osep loulou ina ka omba e osep Farisi ina tidue osep kaunsil ina tiduni pulu e tiwai ke isak langane. “Ma itodue sua kesua gute are due elio arit ina ka nisngen pula?

⁴⁸ Langka itosongon iye due elio langane ma osep ka pula keniye aitno lisak la dagar ke iye. E osep Rom ina ma time e tidar Ida Tapolngon ila ninu e tidue agegeng ke itosep Yuda ina.”

⁴⁹ Deka gute kene ke isak ka angaine Kaiafas wai ke isak. Kaiafas iye gute loulou ina ka mgo ke tobor are. E iye wai langane. “Umeile wan gesa kovok.

⁵⁰ E aitno lumu mter ke wan ane kovok. Wan ka itau gute kene mete ke itosep Yuda ina lama ite ka pula keniye itemete.”

⁵¹ E iye didi aitno alo ka iye wai langane kovok. Aurou. Iye gute loulou ina ka mgo ke tobor are e iye dong langka gute napaprangan ina e wai Yesus ma mete ke osep Yuda ina keniye.

⁵² E iye mete ke osep Yuda ina vala kovok. Aurou. Iye mete ke Ida Tapolngon ila osep keniye ka tidong ke omur omur. Ma iye due isak tipolou osua kene vala.

⁵³ Deka nogrum ke oklou tonari osep Yuda ina tilalo pelengon ma tidue burwa ke Yesus.

⁵⁴ Yesus ile aitno lisak deka iye lila ke osep Yuda ina amtarsak blang kovok. Iye songon omur are e la dong ke armok ka angaine Efraim. Efraim dong olwo boto ke omur ka dong adai vala.

⁵⁵ Alo ari rogo omba ka lana ine la ke alo ka Ida Tapolngon lua osep Yuda ina tisongon omur Isip isuk boto polou. E osep pula tisongon urok armok armok e isak kla ke Jerusalem ma tididi apu ka due aitno lisak itau ke Ida Tapolngon bitna mgo ke rogo omba.

⁵⁶ Osep tiwaiki tivati Yesus e tidong ke omur ka lelei Ida Tapolngon ila ninu e tipmi isak pulu langane. “Aitno lumu lange? Ma iye me ke rogo omba koke aurou?”

⁵⁷ E osep loulou ina ka omba e osep Farisi ina tiwai dagar ke osep langane. “Langka gute kene ile ke omur ka Yesus dong ine ma iye wai ke imi ine.” Kesua tiwaiki tidue Yesus sep ke kalabus.