Jems 5 - Aria New Testament

Osep ka urok wan pula

¹ Umu ka lumu mani pula umoklingen lou pelengon ane. Umekngis e lumu sisngen omba kesua elio pula ka opru ma polou ke umu.

² Lumu brokngon polou oum kodong e kokros ngen lumu klos kodong.

³ Lumu mani ka gol e silva polou ros kodong. E alo ka Ida Tapolngon wade lumu elio deka ros tonari dong langka nisngen langane. Aitno lumu vri ke mani tonari vala. Deka umanamani lumu elio soulu tonari langka eiou ngen umu. Isuk boto wan ka pula keniye yagos e umu dau umogom lumu brokngon.

⁴ Umoklingen lou pelengon ane. Umekli osep ka tipi ngangon ke lumu yage itau kovok. E umekis urok klingen leklou e umakare ke isak kovok. Osep tonari tiwai ke urok klingen e Ida Puda ka ila arit ombatno lokono klingen urok pelengon.

⁵ Umodong ke taklak e umodue lumu brokngon pula e aitno lumu mter ke umu tona e lumu wan tonari lua umu vala. Umangen pula deka umerim omba. E isuk boto oklou ka osep timke umu e umemete ine ma polou.

⁶ Umomulu osep ka tidue elio itau vala e umodue burwa ke isak. E tikaranga tidangdang umu ine kovok.

Ma aitno lite dong dagar e itapara ke Ida Puda

⁷ Sipmi ngawai ke umu lang-ane. Langka osep tidue elio soulu ke umu deka umapara ke alo ka Ida Puda ma iding me. Ma ngawai pelengon ano ke umu. Langka gute due yage iye para ke alo ka wan ka iye usake anino. Iye usak wan deka iye para ke aragu e oklou ka due wan ka iye usake polou anino.

⁸ E umu blang umapara e umevri dagar alo ka wan polou ka opru umu. Kesua oklou ka Ida Puda ma iding me isuk boto polou.

⁹ Sipmi. Ngawaiki umongurngur pulu kovok. Kesua langka umodue elio langane Ida Tapolngon ma wade umu ine. Umoklingen. Isuk boto Ida Tapolngon ka wade ite ma me.

¹⁰ Sipmi. Aitno lumu mter ke osep napaprangan ina ka oglou tiwai ke Ida Puda angaine. Tidong tipara alo ka osep tidue agegeng ke isak.

¹¹ E itawai langane. Osep ka elio polou ka opru isak e tivri dagar ine elio itau itau polou ke isak ine. Umoklingen gute Jop ina basikngen kodong e umeile iye vri dagar alo ka elio polou ka opru iye. Alo ka elio ka opru Jop yagos deka Ida Puda lua iye ke ila kerengen ka itau lokono. Ida Puda aitno itau ke ite e iye due mada ke ite.

Itawai udo pelengon lokono batne ke wan silang kovok

¹² Sipmi lou pelengon ane omba. Alo ka umawaiki osep tile umawai lokono deka umawai lumu pelengon lokono batne ke omur heven kovok. Koke umawai lumu pelengon lokono batne ke taklak ane koke batne ke wan silang blang kovok. Alo ka umawaiki umawai “ee” deka umawai “ee” vala. E alo ka umawaiki umawai “aurou” deka umawai “aurou” vala. Umodue langane e ma Ida Tapolngon mulu umu ine kovok.

Itawai itau ke Ida Tapolngon ma iye lua ite

¹³ Langka elio polou ka opru gute gesa ma iye wai itau ke Ida Tapolngon ma lua iye ine. Langka gute gesa aitno neser ma iye due sakul ka kakai Ida Tapolngon angaine tito la egim.

¹⁴ Langka gute gesa dong airavu ke umu ka paia ma iye gi osep ka tiplau sios. E osep elda ma time e tiwai itau ke Ida Tapolngon ine e tisak wel ke tarna ma lua iye blang.

¹⁵ Deka langka osep tonari aitno lisak dagar ke Ida Tapolngon e tiwai itau ke iye Ida Tapolngon ma lua gute ka paia ma iye polou itau blang. E langka oglou gute tonari due elio epmes ina Ida Tapolngon ma klok ila elio epmes ina la.

¹⁶ E umawai malak pulu ke lumu elio epmes ina e umawai itau ke Ida Tapolngon ke lumu saten. Umodue langane deka Ida Tapolngon ma lua umu e due umu ka umapaia umopolou itau blang. Langka gute gesa ka dong itau e osuk ke Ida Tapolngon bitna wai itau ma Ida Tapolngon koli ila pmingen e lua iye ke wan ka iye pmi ine.

¹⁷ Gute Elaija ka dong oglou iye gute eriar langka ite. Ari iye arit iye e wai itau ke Ida Tapolngon ma aragu duru kovok deka aragu duru kovok la lama iding ke tobor eklu emkil.

¹⁸ Mase iye wai itau blang ma aragu duru deka Ida Tapolngon due aragu duru blang e ngangon novluk polou ke taklak blang.

Itolua gute ka songon ekreng ma iye iding me

¹⁹ Sipmi. Langka gute gesa airavu ke umu pul dogur ke Ida Tapolngon ila pelengon ka lokono e lila ulik ulik deka gute silang lua iye ma iye iding.

²⁰ Gute ka lua iye iding due elio itau. Gute ka lua gute silang ma iye bauluk aitno ke ila elio epmes ina ma due gute tonari dong itau ke Ida Tapolngon bitna. E iye ma mete kovok e ma Ida Tapolngon klok ila elio epmes ina la.