Jems 4 - Aria New Testament

Gute ka aitno mter ke elio ka taklak ina iye Ida Tapolngon ina oul

¹ E ngawaiki ngasruk aitno lumu langane. Wansua due aitno lumu engil pulu e due umu umokot pulu? Umodue elio langane kesua aitno lumu waiki due wan bitna bitna deka elio ane sruk aitno lumu.

² Umawaiki umodue wan gesa e umakaranga umodue kovok deka aitno lumu engil e umodue burwa e umangale wan bitna bitna. E umakaranga umodue wan tonari kovok deka aitno lumu engil pulu e umokot pulu. Wan ka umawaiki umodue umakaranga umodue kovok kesua umepmi Ida Tapolngon ine kovok.

³ E alo ka umepmi Ida Tapolngon ke wan gesa umodue kovok. E umodue kovok kesua aitno lumu mter soulu e umawaiki umodue wan ka due pampamu lumu itau vala.

⁴ Umopul dogur ke Ida Tapolngon langka apmang ka songon ila boget e la due okwa. E osep ka tididi elio ka taklak ina tipul dogur ke Ida Tapolngon. Deka gute ka waiki didi elio ka taklak ina iye polou Ida Tapolngon ina oul.

⁵ Ida Tapolngon ila pelengon wai langane. “Ida Tapolngon kar Ano Itau ke ite deka Ano Itau aitno kro ke ila osep lama aitno lisak la ke wan ka taklak ina vala.” Aitno lumu lange? Ida Tapolngon ila pelengon tonari pelengon adai? Aurou.

⁶ Ida Tapolngon makai ite ke ila makaingan ka ombatno. E ila pelengon wai blang langane. “Ida Tapolngon aitno itau ke osep ka tikakai isak tona angainsak kovok e iye makai osep ka tipes angainsak.”

⁷ Deka umu kenmu kenmu umeini Ida Tapolngon vala. E umopul dogur ke Satan ila tokngon e ma iye ulou ke umu.

⁸ Umala olwo boto ke Ida Tapolngon e ma iye polou olwo boto ke umu. Umu ka umodue elio epmes ina umosongon lumu elio epmes ina langka gute ka grong limla. E umu ka aitno lumu orwo ke Ida Tapolngon aitno lumu mter ke elio itau vala.

⁹ Ngawaiki aitno lumu soulu ke lumu elio soulu e umekngis e lumu sisngen omba. Umeivel kovok e umekngis vala. Aitno lumu neser kovok e aitno lumu kro vala.

¹⁰ Umu kenmu kenmu umepes umu ke Ida Puda bitna e ma iye kakai umu.

Itesin elio vri ke osep leklou kovok

¹¹ Sipmi. Umawai soulu ke Ida Tapolngon ila osep leklou kovok. Gute ka wai soulu ke ila aten koke wade ila aten iye wai soulu ke Moses ila sogongon e wade sogongon tonari blang. E langka amwade Moses ila sogongon ane langka emdidi sogongon tonari kovok e omdong ommgo e amwade sogongon tonari.

¹² Ida Tapolngon kene vala due Moses ila sogongon polou e wade osep ine. E iye tona karanga lua osep koke due agegeng ke isak ke urok elio epmes ina. Deka ina lange umawade lumu saten?

Itakakai ite tona angainte kovok

¹³ Ma ngawai pelengon silang blang ke umu. Umu leklou aitno lumu mter langane. “Eknikane koke kotu imala ke armok gesa e imodong ine tobor kene. Imodong ine e imodue burong ma limem mani polou pula ine.”

¹⁴ Umawai langane e dau umeile wansua ka ma polou kotu kovok. Lumu mosongon ke taklak ane langka gaup ka polou e dong isuk boto deka suong la kodong.

¹⁵ E wan ka itau umawai langane. “Langka Ida Puda waiki imodong e imodue wan bitna bitna deka imodong e imodue wan tonari.”

¹⁶ E umawai ke bokongon ka umu tona umawaiki umodue e umakakai angainmu ine. Langka umodue langane umodue elio soulu lokono.

¹⁷ Deka langane. Langka gute ile kodong ke elio itau ka ma iye due e dau iye due kovok iye due elio epmes ina.