Jems 3 - Aria New Testament

Itaplau ite itau ke udo pelengon

¹ Sipmi. Ngawai ke umu lang-ane. Umu pula umopolou osep parerengen ina ma umaparere osep ke Ida Tapolngon ila pelengon kovok. Kesua mase alo ka Ida Tapolngon wade osep ka pula keniye urok elio ma iye vati imi osep parerengen ina limem elio e wade imi ine lokono.

² Umeile ite ka pula keniye aling pula itodue elio soulu e langka gute wai pelengon soulu kovok iye gute ka itau lokono e karanga plau pampamu ine itau.

³ Umeile itodue ain daudeng sep ke hos orsak ma tididi aitno lite deka itenis isak ke ekreng ka itawaiki itala ine. Deka itakaranga itapagei pampamu lisak keniye blang.

⁴ Aitno lumu mter ke sip blang. Isak omba e engen dagar sodung isak kla. E dau itakaranga itodue wan langka melba e itodue isak kla tididi gute ka kau sip aitno.

⁵ E oda langane blang. Oda pampamu lite ongwa ine palma kene ka daudeng e dau waiki pagei wan pula. E iteile eiou daudeng karanga res polou omba deka ngen akai keniye ke omong aitno.

⁶ E oda langka eiou. Isak ongwa ine palma kene ke pampamu lite e dau tidue elio soulu bitna bitna polou. Langka oda wai soulu deka pampamu lite palma keniye tipolou soulu. Kesua elio soulu ka oda due langka eiou ka res polou omba e eiou tonari ina poloungon batne ke omur hel.

⁷ Ongwa pula tidong langka ongwa kevena bitna bitna e monuk bitna bitna e mota bitna bitna e lodu bitna bitna. E itosep itakaranga itodue isak tipolou aim.

⁸ E gute gesa dong ka karanga plau ene itau kovok. Aling aling oda wai pelengon ka soulu vala. Oda dong e wan langka marasin soulu ka due gute mete dong ine.

⁹ Aling leklou itakakai Ida Puda e Pmada angainsak tito la egim ke oda. E aling silang iteiluk osep ka Ida Tapolngon tapol isak langka iye tona ke oda blang.

¹⁰ Oda kakai Ida Tapolngon angaine tito la egim e iluk osep blang. Sipmi. Elio ane osuk kovok va.

¹¹ Lange? Aki ka itau e aki ka meli polou ke aki ina ovuk kene vala? Aurou.

¹² Sipmi. Akai fik karanga usu akai oliv otna koke galou wain karanga usu akai fik otna? Aurou. E silang blang aki ka misuon ina karanga polou aki ka itau kovok.

Gute ka aitno mter itau ma iye due elio itau

¹³ Gute gesa dong kap umu ka aitno mter itau ke elio bitna bitna e ila ilengen itau koke aurou? Langka gute langane dong kap umu ma iye due elio isuk isuk ka itau e iye pes iye tona. Deka osep ka tivati iye ma tile gute tonari ile omur itau.

¹⁴ E langka aitno lumu rim ke osep leklou e aitno lumu vri ke umu kenmu kenmu deka umakakai angainmu kovok. Kesua langka aitno lumu langane umayak umu tona e umedidi pelengon ka lokono kovok.

¹⁵ Ilengen ka langane me ke omur heven kovok. Ilengen tonari taklak ane ina e didi aitno lite oglou ina e ina poloungon batne ke Satan vala.

¹⁶ Kesua alo ka osep aitno lisak rim pulu e tiwaiki timgo ke osep leklou deka aitno lisak manga manga e elio bitna bitna ka soulu lokono dong.

¹⁷ E langka gute didi ilengen ka me ke omur heven ila elio langane. Aitno mter ke elio itau vala e aitno epen ke osep. E ila elio molil e iye klingen osep urok pelengon. E aitno due osep e iye due elio itau ke isak. Iye didi elio kene ke osep ka pula keniye e yakyak ine kovok.

¹⁸ E osep ka tiboko ke elio ka tidue osep aitno lisak epen pulu urok bokongon ane langka tiusak wan otna. Deka elio itau ka polou batne ke urok bokongon tonari langka ngangon itau pula ka anino ke yage.