Jems 2 - Aria New Testament

Ma itodue elio kene vala ke osep ka pula keniye

¹ Sipmi. Ngawai ke umu lang-ane. Aitno lite dagar ke Ida Puda Yesus Krais. Iye Ida Puda ka plau wan itau lokono ka omur heven ina. Deka itodue elio kene vala ke osep ka pula keniye. Itodue elio kene ke osep leklou e elio silang ke osep leklou blang kovok. Aurou.

² Ngawai pelengon ano langane. Langka osep orwo time tisep ke lumu duningen. E gute kene tnei klos ka itau lokono e wan ka baresngen ka gol dong ke limla titno. E gute silang ila wan isuk boto vala e iye tnei klos ka sasi. E isak orwo tisep ke lumu duningen.

³ Deka umodue elio itau ke gute ka tnei klos itau e umawai ma iye dong ke bota itau. E umawai ke gute ka ila wan isuk boto ma iye vri vala koke iye dong olwo boto ke kopmu.

⁴ Deka lange? Langka umodue elio langane ane langka umawade osep urok mosongon ke aitno lumu vala e umopolou osep ka aitno lumu mter soulu.

⁵ Sipmi. Umoklingen lou pele-ngon ane. Ida Tapolngon rere osep ka urok wan isuk boto vala ke taklak ane ma aitno lisak ila dagar dong dagar lokono ke iye. E iye rere isak ma mase tidong ke omur ka iye plaue ka iye wai promis ine ke osep ka isak lana isak ke iye.

⁶ E umodue markan ke osep ka urok wan isuk boto vala e umodue anit ke osep ka urok mani pula. E osep ka urok mani pula tidue elio ka opru umu e tipaur umu ke kot bitna.

⁷ E osep ka urok mani pula tiwai soulu ke Krais angaine. E ite Krais ila osep.

⁸ E Ida Tapolngon ka vri mgo ke ite wai ila pelengon dagar langane. “Umu lana umu ke supmu langka lana umu ke umu kenmu kenmu.” Langka umodue langane umodue elio itau.

⁹ E langka umodue elio kene ke osep leklou e umodue elio silang ke osep leklou blang deka umodue elio epmes ina. E umadar Ida Tapolngon ila pelengon dagar kodong.

¹⁰ Kesua langka gute gesa didi Ida Tapolngon ila pelengon dagar pula e dau dar pelengon dagar kene ane langka iye dar pelengon dagar keniye.

¹¹ Kesua Ida Tapolngon ka wai ke umu “umodue okwa kovok” wai langane blang. “Umodue burwa kovok.” Langka umodue okwa kovok e dau umodue burwa ane langka umadar Ida Tapolngon ila pelengon dagar keniye.

¹² Oglou udo elio epmes ina pes ite deka Ida Tapolngon didi ila elio itau e lua ite ine. Mase ma Ida Tapolngon didi ila elio itau tonari e wade udo elio isuk isuk ine. Deka aitno lite mter itau ke pelengon ka itawai ine e elio ka itodue.

¹³ Deka langane. Langka aitno lite due osep leklou kovok deka alo ka Ida Tapolngon wade ite ma aitno due ite kovok blang. Elio ka aitno lite due osep mole elio ka itawade osep.

Aitno lite ila dagar e elio isuk isuk ka itodue

¹⁴ Sipmi. Ngawai ke umu langane. Langka gute gesa wai aitno dagar ke Ida Tapolngon e dau iye wai vala e iye due elio isuk isuk ka didi aitno ila dagar kovok. Deka lange? Ma Ida Tapolngon lua gute tonari ke ila elio epmes ina? Aurou.

¹⁵ Langka udo aten ka arang koke apmang dong ka ila klos karanga ke iye kovok koke ina ngangon kovok.

¹⁶ Deka langka gute kene ke umu wai ke iye langane. “Amla aitno lugom epen e emtnei lem klos e emngen ngap ngangon.” Langka iye wai langane e lua gute tonari ke ila klos koke ina ngangon kovok deka ila pelengon karanga lua iye? Aurou.

¹⁷ E langane. Langka gute wai aitno dagar ke Ida Tapolngon e dau iye due elio isuk isuk ka didi aitno ila dagar lokono kovok deka iye wai pelengon adai vala.

¹⁸ Osep leklou ma tiwai lang-ane. “Gute kene aitno ila dagar la ke Ida Tapolngon e ngadue elio isuk isuk ka itau.” E ngawai ke osep orwo tonari langane. Langka gute ka wai aitno la dagar ke Tapolngon e due elio isuk isuk ka itau kovok lange ma iteile malak ke aitno ila dagar? E gute ka due elio isuk isuk ka itau batne aitno la dagar ke Ida Tapolngon deka iteile malak ke aitno ila dagar.

¹⁹ Umeile Ida Tapolngon iye kene vala e are itau. Angelo soulu blang tile langane deka tilim e tinakarkar ke iye e dau ilengen tonari lua isak kovok.

²⁰ Umu kaka deka aitno lumu mter ke elio itau kovok. Ma nganis umu langane. Gute ka wai aitno ila dagar la ke Ida Tapolngon e dau ila elio isuk isuk didi ila pelengon kovok ila pelengon tonari adai vala.

²¹ Oglou udo apa Abraham due otno arang Aisak munu ke opmu ma iye due elio opmu ina ke iye. Deka Ida Tapolngon vati elio ka iye due e iye polou gute itau lokono ke Ida Tapolngon bitna.

²² Aitno lumu mter itau. Abraham aitno dagar ke Ida Tapolngon e iye due elio itau blang. Deka ila elio ka iye due nepir ke aitno ila dagar.

²³ Ida Tapolngon ila pelengon wai ke Abraham langane. “Abraham aitno la dagar ke Ida Tapolngon deka Ida Tapolngon due polou gute itau e osuk ke bitna.” E iye sir iye ila aten.

²⁴ Aitno lumu mter itau langane. Gute polou itau lokono ke Ida Tapolngon bitna batne ke elio isuk isuk ka iye due e batne ke aitno ila dagar vala kovok.

²⁵ E elio langane blang ke Rahap ka iye apmang ekreng palma ina. Iye polou itau lokono ke Ida Tapolngon bitna kesua iye lua osep esim orwo e nis isak ke ekreng silang ma tikos ke armok.

²⁶ Iteile langka gute gesa ano la deka pampamu ine mete kodong. E langane ke gute ka wai aitno ila dagar la ke Ida Tapolngon e iye due elio isuk isuk ka didi aitno ila dagar kovok. Iye dong langka gute ka ano la e iye mete kodong.