Jems 1 - Aria New Testament

¹ Ngong Jems ngong Ida Tapol-ngon e Ida Puda Yesus Krais urok gute bokongon ina. Ngasogo pas ane uti ke umu ka umodong ke osua songotno orwo ke osep Israel ina. Umu ka umadardar e umodong ke omur pula. Ngawai “oklou itau” ke umu.

Tokngon ma polou ke ite

² Lou saten ngawai ke umu langane. Alo ka tokngon bitna bitna polou ke umu aitno lumu neser ine.

³ Kesua umeile omur alo ka tokngon polou ke umu e aitno lumu dagar ine lama wan opru umu deka aitno lumu ila dagar dong dagar e segesege kovok.

⁴ E alo ka umodong dagar ke tokngon ma umopolou ngongle ke aitno lumu ila dagar. Deka umakaranga umodong itau ke elio ka pula keniye ka polou ke umu. E ma lumu wan bitna bitna ka karanga ke umu dong ke umu.

⁵ E dau langka gute gesa ke umu karanga ile itau ke wan kene kovok ma iye pmi Ida Tapolngon ine e Ida Tapolngon ma kar ilengen ke gute tonari. Aling aling Ida Tapolngon kar ilengen omba ke osep ka tipmi iye ine e aitno soulu ke pmingen tonari kovok.

⁶ E gute ka waiki due ilengen aitno dagar ma Ida Tapolngon kar iye ilengen e aitno orwo ine sakam. Kesua gute ka aitno orwo iye langka misuon ina boitini ka engen ipue nokul nokul.

⁷ Gute ka aitno orwo langare ma aitno mter iye ma due wan itau ke Ida Puda kovok. Aurou.

⁸ Kesua aitno orwo e segesege e ila elio ulik ulik vala.

Osep ka urok wan pula e osep ka urok wan isuk boto vala

⁹ Langka udo aten kene ila wan isuk boto vala ma aitno neser ine. Kesua Ida Tapolngon vati iye langka gute ka angaine omba.

¹⁰ E udo aten ka ila wan pula dong ke iye ma aitno neser alo ka Ida Tapolngon pes angaine duru. Kesua osep ka urok wan pula dong ke isak ma tipolou yagos langka plaua ka duru ke taklak.

¹¹ Alo ka oklou tito e bublo engil deka gras polou kakrak e plaua duru ke taklak. Plaua duru deka itavatie langka wan ka sasi vala. Ane langka osep ka urok wan pula dong ke isak. Isak dau tidue burong ke wan bitna bitna e ma timete blang.

¹² Gute ka vri dagar alo ka wan polou ka opru iye ma Ida Tapolngon aitno itau ke iye e kere iye itau. Kesua mase ma Ida Tapolngon kar iye wan itau langka osep ka timole resis tidue. Wan ane mosongon itau ka iye wai promis ine ke osep ka isak lana isak ke iye.

¹³ Langka tokngon polou ke gute ma iye due elio soulu iye karanga wai langane kovok. “Ida Tapolngon tok ngong ma ngadue elio soulu.” Kesua elio soulu karanga tok Ida Tapolngon kovok e iye tok osep ke elio soulu kovok.

¹⁴ E aitno lite oglou ina tok ite kente kente ma itodue elio soulu.

¹⁵ Langka itawaiki itedidi aitno lite oglou ina e itodue elio soulu deka itodue elio epmes ina e elio epmes ina due metengen polou ke ite.

¹⁶ Sipmi. Ngong lana ngong ke umu. Deka umayak umu kenmu kenmu ke pelengon tonari kovok.

¹⁷ Wan keniye ka itau e itau lokono duru me ke Pmada ka dong egim ka tapol oklou e taiko e gigimo. Iye dong e segesege kovok langka wan ano segesege alo ka oklou lila ke egim ke sirva.

¹⁸ Iye didi aitno e due ite itopolou ila osep alo ka iteklingen ila pelengon ka lokono. Ma ite langka titno ka ina sirngen sirngen ke wan ka pula keniye ka mase ma polou oku.

Ma itedidi pelengon ka iteklingen ine

¹⁹ Sipmi. Aitno lumu mter ke pelengon ane. Langka osep tiwai ke wan deka paide ite kente kente iteklingen ine. E itosuong ma itokoli pelengon kovok. Itosuong ma aitno lite polou engil kovok.

²⁰ Kesua alo ka aitno lite amnga ane karanga due elio itau ka Ida Tapolngon aitno itau ine polou kovok.

²¹ Deka umasapir wan bitna bitna ka soulu e elio keniye ka soulu ka polou ke umu. E umepes umu kenmu kenmu e umedidi Ida Tapolngon ila pelengon ka dong ke aitno lumu. Kesua pelengon tonari karanga lua umu ke lumu elio epmes ina.

²² Umoklingen Ida Tapolngon ila pelengon e umemeit ine. E umoklingen ine vala kovok. Kesua langka umoklingen ine vala umakaranga umayak umu ine.

²³ Gute ka klingen Ida Tapolngon ila pelengon deka meit ine kovok iye langka gute ka vati bitna ke glas.

²⁴ Kesua gute tonari vati bitna ke glas deka la e suong lokono bitna uli ke wan ka iye vati ke glas.

²⁵ E gute ka klingen Ida Tapolngon ila pelengon dagar ka itau lokono deka meit ine e bitna uli ine kovok ma Ida Tapolngon kere iye itau ke ila elio isuk isuk ka iye due. Kesua pelengon dagar tonari karanga due ite itodong fri.

²⁶ Osep leklou tiwai langane. “Ngadidi Ida Tapolngon aitno itau lokono e ngadue elio isuk isuk ka itau.” E dau langka iye plau ila pelengon ka iye wai ine kovok iye yak iye tona ke elio ka iye wai iye didi Ida Tapolngon. Deka elio ka iye wai iye didi Ida Tapolngon aitno iye elio adai vala.

²⁷ Langka itedidi Ida Tapolngon aitno e itodue elio isuk isuk ka itau vala ke Ida Tapolngon ka Pmada bitna ma itodue elio langane. Iye waiki itolua agau ka bimsei e apmang sasap batne ke elio ka opru isak. E iye waiki itaplau ite itau ma elio ka taklak ina due ite itopolou amum kovok.