Hibru 9 - Aria New Testament

Osep loulou ina ka oglou ina tidue elio opmu ina

¹ Moses ila sogongon iye Ida Tapolngon ila kontrak oglou ina e wai ke elio bitna bitna ka osep tidue alo ka tilotuim Ida Tapolngon. E wai ke ninu ka osep tilotuim Ida Tapolngon ine blang.

² Ninu tonari iye ninu molo ina e ina eliang orwo tidong. Ke eliang kene ina wan orwo tidong ine. Wan ka kis lam e bota ka bret ka osep loulou ina tikare ke Ida Tapolngon. E tisir eliang tonari Eliang Ka Itau.

³ E molo ka botom lokono mana airavu ke eliang kene ina e eliang orwo ina. E tisir eliang orwo ina ka dong dogur ke molo tonari Eliang Ka Itau Lokono.

⁴ Ke eliang orwo ina wan orwo tidong ine. Bota ka osep loulou ina tikamlu wan ka amna itau ine ka tikadinge ke gol e karoro ka Ida Tapolngon ila pelengon dagar dong ine ka tikadinge ke gol. E ke karoro tonari wan eklu tidong. Sospan gol ka ngangon mana dong ine e Aron ila matu ka nobolbol e opmu orwo ka oglou Ida Tapolngon sogo ila pelengon ke isak.

⁵ E ke karoro tonari tona tisapi ensel orwo e pena lisak klou karoro. Ensel tonari nisngen Ida Tapolngon dong ke omur tonari. E omur tonari omur ka Ida Tapolngon klok osep urok elio epmes ina. E dau eknikane itakaranga itawai pula ke wan tonari kovok.

⁶ Osep tidue wan keniye tonari yagos e ke oklou kene kene osep loulou ina tisep ke eliang kene ina ka Eliang Ka Itau ke ninu molo ina e tidue urok bokongon ka Ida Tapolngon kare ke isak.

⁷ E gute loulou ina ka mgo iye kene vala karanga sep ke eliang orwo ina ka Eliang Ka Itau Lokono. E iye karanga sepe aling kene vala ke tobor kene kene. E alo ka iye sepe iye paur marau ke ongwa ke tidue elio opmu ina ine. Marau tonari karanga kli ila elio epmes ina e elio epmes ina ka osep tidue e tile itau ine kovok.

⁸ Ke wan ane Ano Itau nis ite langane. Alo ka Ida Tapolngon ila ninu molo ina dau dong osep tikaranga tisep ke Eliang Ka Itau Lokono kovok.

⁹ E Ida Tapolngon ila ninu molo ina dong langka nisngen ke oku ane. Wan ka oglou osep tikare ke Ida Tapolngon e tidue elio opmu ina ine karanga due aitno lisak itau ke Ida Tapolngon bitna kovok.

¹⁰ E wan tonari la ke ngangon ka itakaranga itangen e ke aki ka itakaranga iteinim e ke elio bitna bitna ka osep tidue ma tidong itau e eip ke Ida Tapolngon bitna. Isak wan ke tarna lite vala e dong la lama iding ke wan oku polou.

Krais ina marau baser polou

¹¹ Eknikane Krais polou kodong e iye gute loulou ina ka mgo ke wan bitna bitna ka itau ka polou kodong. Iye due Ida Tapolngon ila bokongon ke ninu molo ina ka osep tiurie ke taklak ane kovok. Iye sep ke Ida Tapolngon ila ninu molo ina ka dong ke omur heven. Ninu molo ina tonari mole ninu molo ina ka osep tiurie ke taklak.

¹² E Krais due meme koke bulmakau titno inarak marau e iye sep ke Ida Tapolngon ila ninu kovok. Aurou. Iye due elio opmu ina ke iye tona ina marau e iye sep ke Ida Tapolngon ila ninu ina Eliang Ka Itau Lokono aling kene vala. Deka iye kli udo elio epmes ina dong vala dong.

¹³ Oglou langka osep tidar Moses ila sogongon Ida Tapolngon vati isak langka isak amum. Deka osep loulou ina tidue meme koke bulmakau bole inarak marau e tisere ke osep. E tidue group ke bulmakau tna ka eiou ngene keniye deka tiser group tonari ke osep. Langka tidue langane deka Ida Tapolngon vati isak langka isak itau.

¹⁴ Lama elio tonari dong Krais ina marau mole wan keniye inarak marau. Elio kene gesa vri ke Krais kovok deka ke Ano Itau ka dong vala dong iye pli tarna e mete langka osep tidue elio opmu ina ke iye. E iye due aitno lite polou itau lokono deka aitno lite mter kovok ke elio bitna bitna ka karanga lua ite kovok. E itodue Ida Tapolngon ka dong vala dong ila bokongon.

¹⁵ Krais loulou ke ite deka iye due Ida Tapolngon ila kontrak oku ina polou kesua Ida Tapolngon waiki osep ka iye rere isak ila osep tidue wan ka iye wai dagar ma tidue e wan tonari dong vala dong. Yesus ina marau e ina metengen kli urok elio epmes ina bitna bitna ka tidue alo ka oglou tididi Moses ila sogongon.

¹⁶ Ma ngawai pelengon ano ke umu. Langka gute gesa waiki alo ka iye mete ma ila wan matamuli la ke osep ka iye rere isak ine deka iye sogo ine ke pepa. Deka alo ka gute tonari mete e osep tile ine ila wan matamuli la ke osep ka iye rere isak ine.

¹⁷ E langka gute tonari dau dong e mete kovok deka osep ka iye rere isak ine tikaranga tidue ila wan matamuli kovok. Kesua iye dau dong. E langka iye mete deka osep ka iye rere isak ine tikaranga tidue ila wan matamuli.

¹⁸ E langane ke kontrak oglou ina blang. Alo ari osep timke ongwa e inarak marau baser e elio ane nis osep Ida Tapolngon due ila pelengon dagar dong.

¹⁹ Oglou Moses wai ila sogongon keniye ke osep Israel ina. Deka iye due marau ke bulmakau e meme ka tidue elio opmu ina ine e iye bulie kap aki. Deka iye due akai ka angaine hisop tetna e pou sipsip tarna elilo ka edimor ine. Deka iye due tetna tonari sep ke marau e iye ser marau ke ila sogongon e ke osep ka pula keniye.

²⁰ Moses due langane deka iye wai langane. “Marau ane nis ite Ida Tapolngon due ila kontrak dong dagar. Iye waiki ma itedidi ila kontrak tonari.”

²¹ E silang blang Moses ser marau ke ninu molo ina e ke wan bitna bitna ka lotu ina ka tidong ine.

²² Moses ila sogongon wai marau vala karanga due wan bitna bitna tipolou itau ke Ida Tapolngon bitna. E langka ongwa ina marau baser kovok deka ma Ida Tapolngon klok osep urok elio epmes ina kovok.

Krais pli tarna deka kli udo elio epmes ina

²³ Elio bitna bitna ka osep tidue ke Ida Tapolngon ila ninu molo ina isak nisngen ke wan lokono ka dong ke omur heven. E osep tiser ongwa bitna bitna inarak marau ma tidue ninu molo ina polou itau. E tikaranga tiser ongwa ina marau ma Ida Tapolngon ila ninu ke omur heven polou itau kovok. Aurou. Yesus ina marau vala ka mole ongwa inarak marau karanga due ninu tonari polou itau.

²⁴ E Krais mete ma iye sep ke ninu molo ina ka osep tiurie kovok. Ninu molo ina tonari nisngen ke Ida Tapolngon ila ninu ka dong ke omur heven. Krais mete e sep ke omur heven e dong ke Ida Tapolngon bitna e loulou ke ite.

²⁵ Ke tobor kene kene osep Israel ina urok gute loulou ina ka mgo sep ke Eliang Ka Itau Lokono. E iye kalke marau ka iye tona ina kovok. E Krais due langane kovok. Aurou. Iye sep ke omur heven e kalke iye tona ina marau. E iye due ane aling kene vala.

²⁶ Langka Krais mete aling pula nogrum ke alo ka Ida Tapolngon tapol wan ka pula keniye lila me iye namani doro aling pula. E alo ane iye polou ke taklak aling kene vala isuk boto ke taim ka Ida Tapolngon due wan ka pula keniye yagos. E iye kar iye tona ke Ida Tapolngon langka wan ka osep tidue elio opmu ina ine ma iye klok osep urok elio epmes ina.

²⁷ Itosep ka pula keniye ma itemete aling kene vala. Deka ma Ida Tapolngon wade udo elio isuk isuk.

²⁸ Krais mete langka wan ka osep tidue elio opmu ina ine aling kene vala. Deka ma iye polou aling silang blang ma kli udo elio epmes ina aling silang blang kovok. Aurou. Iye ma iding e lua osep ka tipara ke iye.