Hibru 8 - Aria New Testament

Yesus ka udo gute loulou ina ka mgo dong ke omur heven

¹ Pelengon ane ka imawai ke umu ine lana ine langane. Udo gute loulou ina ka mgo dong ke Ida Tapolngon ka iye omba lokono ila kova ke limla odung.

² E iye due ila bokongon ke Ida Tapolngon ila ninu ka dong ke omur heven. Ida Tapolngon due ila ninu tonari e osep tiurie kovok.

³ Oglou Ida Tapolngon rere osep loulou ina ka mgo ma tipaur wan ke Ida Tapolngon e tidue elio opmu ina ine. E oku ane Yesus ka udo gute loulou ina ka mgo iye blang ma paur wan ke Ida Tapolngon.

⁴ E langka Yesus dau dong ke taklak iye dong gute loulou ina kovok. Kesua osep loulou ina tidong e tidue elio opmu ina ka Moses ila sogongon wai ine.

⁵ Oglou alo ka Moses waiki uri ninu molo ina Ida Tapolngon wai langane. “Emile wom itau e emdidi lou pelengon keniye ka la ke ninu molo ina ka nganis wom ine alo ka omdong ke gigri Sainai.” E tiboko ke Ida Tapolngon ila ninu ka dong ke taklak e ninu tonari langka ano vala ke Ida Tapolngon ila ninu ka dong ke omur heven.

⁶ Ida Tapolngon rere Yesus udo gute loulou ina e ila bokongon mole osep loulou ina urok bokongon. Kesua Ida Tapolngon ila kontrak oku ina ka Yesus due polou mole Moses ila sogongon. E wan ka Ida Tapolngon wai promis ma iye kare ke ila osep mole Moses ila sogongon blang.

Ida Tapolngon ila kontrak oku ina mole Moses ila sogongon

⁷ Langka Moses ila sogongon karanga lua ite deka Ida Tapolngon due ila kontrak oku ina polou e kasip amune kovok.

⁸ E Ida Tapolngon vati osep Israel ina tididi elio itau kovok deka iye wai langane. “Ngong Upu Puda e ngawai langane. Mase ma ngawai kontrak oku ina ke osep Israel ina e ke osep Juda ina.

⁹ Ma ngawai ke isak ke lou kontrak oku ina langka oglou ngawai kontrak ke urok seia kovok. Alo ari nganis isak ke ekreng e ngapaur isak tisongon omur Isip kla. E aitno lisak dong dagar ke ngong kovok deka ngapul dogur ke isak.

¹⁰ Ngong Upu Puda e mase ma ngawai lou kontrak oku ina ke osep Israel ina ka langane. Ma ngadue lou pelengon sep ke bara lisak e ngasogoe ke aitno lisak. Ma ngadong Inarak Tapolngon e isak ma tidong lou osep.

¹¹ Alo ari ma gute parere gute silang ka iye sisrok koke ila osua ma tile ke Inarak Puda kovok. Kesua isak ka pula keniye ma tile ngong. Lama angainsak omba koke angainsak omba kovok.

¹² Ma ngasak urok elio epmes ina e omtongu sisir ke urok elio soulu kovok.”

¹³ Ida Tapolngon ila pelengon ka la ke ila kontrak oku ina nis ite iye due Moses ila sogongon polou yagos. E wan ka polou oglou ina e isuk boto yagos dong sasi boto vala e mase polou yagos kodong.