Hibru 7 - Aria New Testament

Pelengon ane la ke gute Melkisedek

¹ Oglou Melkisedek vri mgo ke omur ka angaine Salem. E iye gute loulou ina ke Ida Tapolngon ka dong egim lokono. Oglou Abraham due evlei kap osep ka tivri mgo ke omur leklou leklou e iye mole isak e due urok wan bitna bitna. Alo ka iye iding ke ila omur Melkisedek soson iye e wai ila kerengen duru ke iye.

² Deka Abraham wade wan bitna bitna ka iye due ke emkil songotno ka eriar e kar emkil kene ke Melkisedek. E Melkisedek angaine lana ine langane. Gute ka plau osep e due elio itau vala. E angaine silang gute ka vri mgo ke omur Salem. E pelengon palma “Salem” lana ine langane. Elio ka osep aitno lisak epen pulu.

³ Osep ka tisogo Ida Tapolngon ila pelengon tisogo Melkisedek tna e timla e ila seia angainsak kovok. Tisogo oklou ka tna divir iye e oklou ka iye mete ine kovok. Iye dong gute loulou ka dong vala dong eriar langka Ida Tapolngon Otno Arang.

⁴ Aitno lumu mter Melkisedek angaine omba lokono. Kesua oglou udo eia Abraham mgo ke udo osua e iye mole osep ka tivri mgo tonari. Deka iye wade wan bitna bitna ka iye due ke isak ke emkil songotno ka eriar deka iye kar emkil kene ke Melkisedek.

⁵ Mase Ida Tapolngon rere gute Livai ila osua ma tipolou osep loulou ina. E Moses ila sogongon wai ma osep Israel ina tiwade urok wan ke emkil songotno ka eriar e tikar emkil kene ke osep Livai ina. Osep Israel ina tonari keniye isak Abraham ila napakngan e dau osep Livai ina ka isak osua kene vala ke urok osua songotno orwo tidue emkil kene ke sisrok.

⁶ E gute Melkisedek polou ke gute Livai ila osua kovok e dau iye due emkil songotno ina ke Abraham. Ida Tapolngon kar promis ke Abraham e dau Melkisedek wai ila kerengen duru dong ke iye.

⁷ E iteile langane. Gute ka mole gute silang wai ila kerengen duru dong ke iye.

⁸ Osep loulou ina ka tipolou ke Livai ila osua e tidue emkil songotno ina ke osep leklou tikaranga timete. E Melkisedek ka due emkil songotno ina ke Abraham io iteile ke ina metengen kovok kesua Ida Tapolngon ila pelengon wai ine kovok.

⁹ E itakaranga itawai langane. Gute Livai ka ila napakngan tidue emkil songotno ina iye kar emkil songotno ina ke Melkisedek.

¹⁰ Kesua alo ka Abraham soson Melkisedek ari otno arang Livai dau dong kovok. Deka alo ka Abraham kar emkil songotno ina ke Melkisedek are langka Livai blang kare ke Melkisedek.

Udo gute loulou ina ka mgo mole osep loulou ina ka oglou tidong

¹¹ Ida Tapolngon rere osep Livai ina ma tipolou osep loulou ina e mase iye kar osep Israel ina Moses ila sogongon. Lama osep Livai ina tidue urok bokongon itau tikaranga tidue osep tipolou itau lokono ke Ida Tapolngon bitna kovok. Deka mase Ida Tapolngon rere gute loulou ina silang ka iye langka Melkisedek e iye langka Aron kovok.

¹² Langka osep oku ina tipolou osep loulou ina ma Ida Tapolngon ila pelengon ka oku ina kasip Moses ila sogongon amune blang.

¹³ Gute loulou oku ina tonari lana ine la ke Ida Puda e iye polou ke gute Livai ila osua kovok. Aurou. Iye polou ke osua silang e oglou gute kene ke osua tonari polou gute loulou ina kovok.

¹⁴ Iteile omur Moses wai kovok ma gute ke gute Juda ila osua polou gute loulou ina. E Ida Puda polou ke osua tonari.

¹⁵ E oku ane iteile langane. Gute loulou ina polou kodong. Iye eriar langka Melkisedek e iye mole osep loulou ina ka isak osep Livai ina.

¹⁶ Osep Livai ina tikaranga tipolou osep loulou ina batne Moses ila sogongon wai ine. E gute loulou ina oku polou batne ke ila arit ka ombatno e ke ila mosongon ka dong vala dong.

¹⁷ Ida Tapolngon ila pelengon wai langane. “Wom gute loulou ina ka dong vala dong eriar langka Melkisedek.”

¹⁸ Pelengon ane nis ite langane. Ida Tapolngon due Moses ila sogongon polou yagos kesua sogongon tonari ila arit kovok e karanga lua osep kovok.

¹⁹ E Moses ila sogongon karanga due osep tipolou itau lokono ke Ida Tapolngon bitna kovok. Deka Ida Tapolngon due ekreng oku ka mole Moses ila sogongon ma itakaranga itopolou olwo boto ke Ida Tapolngon ine.

²⁰ Alo ka Ida Tapolngon rere gute oku polou udo gute loulou ina iye wai dagar ke iye ke iye tona angaine. E alo ka osep Livai ina tipolou osep loulou ina Ida Tapolngon wai dagar ke iye tona angaine kovok.

²¹ E alo ka gute tonari polou gute loulou ina Ida Tapolngon wai dagar ke iye ke iye tona angaine. Iye wai langane. “Ngong ka Ngap Puda ngawai dagar ke wom lang-ane. ‘Wom omdong gute loulou ina dong vala dong e ma ngapalele aitno lungong ine kovok.’”

²² Ida Tapolngon wai dagar ke iye tona angaine deka ke batne langane Yesus due kontrak oku ina polou. E kontrak oku ina mole Moses ila sogongon.

²³ E silang blang oglou osep loulou ina pula ka isak Livai ila osua tidong. Isak pula kesua isak timete deka osep leklou kasip amunsak. E tikaranga tidong osep loulou ina dong vala dong kovok.

²⁴ E Yesus dong udo gute loulou ina dong vala dong. Iye mete e gute silang kasip amune kovok. Aurou. Iye dong vala dong.

²⁵ Iye gute loulou ina ka dong vala dong deka iye karanga lua osep ma isak kla olwo boto ke Ida Tapolngon batne ke ila bokongon. Kesua iye dong vala dong ma iye wai itau ke Ida Tapolngon ke isak.

²⁶ Yesus iye udo gute loulou ina ka karanga lua ite ke udo elio isuk isuk keniye. Iye due elio itau vala e elio soulu gesa vri ke iye kovok. E Ida Tapolngon vati iye dong itau lokono vala. Ida Tapolngon due tito la ke omur heven e iye dong mawa ke osep epmes ina.

²⁷ Oglou osep loulou ina ka mgo tidue elio opmu ina ke oklou kene kene. Paide gute kene kene due elio opmu ina ke iye tona ila elio epmes ina deka iye due ke osep leklou urok elio epmes ina. E Yesus due langane kovok kesua iye pli tarna e mete aling kene vala. Deka ina metengen tonari kli osep ka pula keniye urok elio epmes ina.

²⁸ Osep ka tididi Moses ila sogongon tirere osep loulou ina ka mgo ka urok arit dong kovok. E mase Ida Tapolngon ila pelengon dagar ka iye wai ke iye tona angaine polou. E pelengon dagar tonari rere Ida Tapolngon Otno Arang udo gute loulou ina dong vala dong. E iye due Ida Tapolngon ila bokongon keniye.