Hibru 5 - Aria New Testament

Yesus karanga lua ite

¹ Alo ka Ida Tapolngon waiki rere gute loulou ina ka mgo iye rere gute tonari ke itosep. Iye rere gute ma iye due ila bokongon airavu ke osep. E silang blang ma iye due elio opmu ina ke wan ka osep tipaure ma tidue elio opmu ina ine ke Ida Tapolngon. Iye due langane batne sisrok urok elio epmes ina.

² Gute loulou ina tonari iye gute vala e iye ile ila arit dong ke iye kovok. Deka iye karanga due mada ke osep ka tidue elio soulu e dau tile omur ine kovok.

³ E iye due elio opmu ina ke osep urok elio epmes ina e ke iye tona ila elio epmes ina blang.

⁴ Langka gute polou gute loulou ina ka mgo iye rere iye tona ine kovok. Aurou. Ida Tapolngon vala rere gute tonari eriar langka oglou iye rere Aron.

⁵ E Krais blang langane. Iye rere iye tona gute loulou ina ka mgo kovok. E Ida Tapolngon wai langane. “Wom Erigu Arang e ngong Abo.”

⁶ E Ida Tapolngon wai blang langane. “Omdong gute loulou ina dong vala dong eriar langka gute Melkisedek.”

⁷ Alo ka Yesus dau dong ke taklak aling aling iye wai itau ke Ida Tapolngon e pmi iye ke wan bitna bitna. Iye daiku ke Ida Tapolngon e kngis kesua iye ile Ida Tapolngon karanga lua iye ma iye mete kovok. E Ida Tapolngon klingen ila pelengon e koli ila pmingen itau kesua iye due anit ke iye e ini iye.

⁸ E lama Yesus Ida Tapolngon Otno Arang iye namani elio soulu e elio tonari parere iye ma iye ini Ida Tapolngon.

⁹ Elio tonari polou ke iye deka iye polou gute ka lua osep ke urok elio epmes ina. Deka iye lua osep ka tini iye ke urok elio epmes ina dong vala dong.

¹⁰ Deka Ida Tapolngon rere iye gute loulou ina ka mgo eriar langka Melkisedek.

Itodong langka agau ke Krais kovok

¹¹ Pelengon pula dong ka wai ke elio ka Yesus polou gute loulou ina ka mgo eriar langka Melkisedek. E dau imakaranga imawai ine kovok kesua aitno lumu kis limem pelengon dagar suong kovok.

¹² Umoklingen Ida Tapolngon ila pelengon ko-dong. E eknikane ngawaiki ma umakaranga umaparere osep leklou ke Ida Tapolngon ila pelengon. E aurou. Osep dau tiparere umu ke Ida Tapolngon ila pelengon ka mgongon ina vala. Ane langka umakaranga umangen ngangon dagar kovok. E langka umu dau umeinim sisu vala.

¹³ Iteile osep ka dau tinim sisu isak dau keke e tile omur ke Ida Tapolngon ila pelengon ka wai ke elio itau kovok.

¹⁴ E osep ka tikaranga tingen ngangon dagar isak ngongle. E tididi Ida Tapolngon ila pelengon e tikaranga tiwade elio itau e elio soulu.