Hibru 4 - Aria New Testament

Ida Tapolngon ila osep ma timtong ke ila omur

¹ E oku ane Ida Tapolngon ila promis dau dong e wai ma itesep ke omur ka itomtong ine. Deka umeile umu itau lama gute gesa dong airavu ke umu ka karanga sep ke omur ka Ida Tapolngon wai dagar ine kovok.

² E iteklingen Ida Tapolngon ila omon itau langka oglou osep Israel ina tiklingen ine. Tiklingen ine e dau aitno lisak la dagar ine kovok deka pelengon tonari lua isak kovok.

³ E ite ka aitno lite la dagar ke Ida Tapolngon kodong ma itesep ke omur ka itomtong ine. E Ida Tapolngon wai langane. “Aitno lungong engil deka ngawai dagar langane. Ma tisep ke lou omur ma timtong ine kovok.” Ida Tapolngon wai pelengon tonari e dau iteile Ida Tapolngon aitno mter ke wan ka pula keniye ma iye due nogrum ke alo ka iye tapol wan ka pula keniye.

⁴ Ida Tapolngon ila pelengon palma kene wai ke oklou lumorwo ina langane. “Ke oklou lumakene Ida Tapolngon tapol wan ka pula keniye yagos deka ke oklou lumorwo ina iye mtong ke ila bokongon.”

⁵ E sogongon ka itavati kodong wai langane. “Ma tisep ke lou omur ma timtong ine kovok.”

⁶ Oglou osep ka tiklingen Ida Tapolngon ila omon itau tipul dogur ine. Deka ma tisep ke omur ka tikaranga timtong ine kovok. E oku ane osep ka tiklingen omon itau e aitno lisak la dagar ine tikaranga tisep ke omur tonari.

⁷ E tobor pula mela yagos deka Ida Tapolngon wai blang. Iye due Devit aitno deka iye wai langane. “Eknikane alo ka umo-klingen Ida Tapolngon ila pelengon umopono aitno lumu ine kovok.” Alo ka Devit dong Ida Tapolngon wai ke “eknikane.” E elio ane nis ite Ida Tapolngon rere taim silang ma osep tikaranga tisep ke omur ka timtong ine.

⁸ Oglou Josua mgo ke osep Israel ina e tisep ke omur Kenan. Langka omur Kenan omur ka tikaranga timtong ine deka Ida Tapolngon ma wai ke omur silang kovok. Aurou.

⁹ E iteile omur langane. Ida Tapolngon ila osep ma timtong eriar langka iye mtong ke oklou lumorwo ina alo ka iye tapol wan ka pula keniye yagos.

¹⁰ Osep ka tisep ke Ida Tapolngon ila omur ka timtong ine ma tiboko blang kovok. Langka Ida Tapolngon mtong alo ka iye tapol wan ka pula keniye yagos.

¹¹ Deka ite arit ite ma itakaranga itesep ke omur ka itomtong ine. Lama gute gesa airavu ke ite karanga sep ke omur tonari kovok kesua iye didi elio soulu ka oglou osep Israel ina tidue.

¹² Ida Tapolngon ila pelengon dong e ila arit dong ine blang. Ila pelengon dong langka elil omba ka ene orwo e ene lokono. E iye karanga wade gute aitno e ano. E karanga wade gute erine buno e erine aitno. E karanga wade elio ka itawaiki itodue e wan ka aitno lite mter ine.

¹³ Ida Tapolngon tapol wan ka pula keniye deka wan gesa dong ka karanga kukwop ke iye kovok. Wan ka pula keniye dong malak ke bitna e mase ma itawai ke iye ke elio isuk isuk ka itodue kodong.

Yesus udo gute loulou ina ka mgo

¹⁴ Ida Tapolngon Otno Arang Yesus iye udo gute loulou ina ka mgo e iye dong ke omur heven. Deka ite ma itodong dagar ke aitno lite ila dagar.

¹⁵ Yesus udo gute loulou ina ka mgo e iye ile omur ke elio isuk isuk ka itakaranga itodue kovok. Alo ka Satan tok ite Yesus ile omur ke elio langane kesua oglou Satan tok iye eriar langka iye tok ite. Satan tok iye e dau iye due elio epmes ina kovok.

¹⁶ Deka ma itopolou olwo boto ke Ida Tapolngon ka makai ite e itoulou ke iye kovok. Ma aitno due ite e ila makaingan polou ke ite e lua ite alo ka elio bitna bitna polou ka opru ite.