Hibru 2 - Aria New Testament

Ma itemeit ke Ida Tapolngon ila pelengon

¹ Deka ma itekis pelengon tonari dagar e amtada uli ine kovok.

² Oglou Ida Tapolngon kar pelengon kene ka karanga segesege kovok ke ila ensel e ila ensel tikare ke Moses deka Moses sogoe ma osep Israel ina tididie. E langka tididie kovok deka Ida Tapolngon ules isak ine.

³ Deka oku ane langane. Langka itopul dogur ke elio ka Ida Tapolngon lua ite ke udo elio epmes ina ka mole Moses ila sogongon tonari ma itokos ke Ida Tapolngon ila wadengen kovok. Mgo Ida Puda napapra Ida Tapolngon ila pelengon itau ka karanga lua ite ke udo elio epmes ina. Deka osep ka tiklingen ine tipalongo udo langane. Pelengon tonari pelengon lokono.

⁴ E Ida Tapolngon due nisngen omba e elio arit ina bitna bitna e iye didi aitno e kar Ano Itau ila kerengen ke ila osep. Iye due langane ma osep tivati e tile omur pelengon tonari pelengon lokono.

Yesus duru ke taklak ma iye lua ite

⁵ Mase alo ka Ida Tapolngon ma due taklak oku ina polou ma iye rere ensel ma tiplaue kovok. Aurou.

⁶ Oglou gute napaprangan ina gesa sogo langane. “Ipem Tapolngon. Imi osep vala deka ina lange aitno lugom mter ke imi? E ina lange emkere imi itau?

⁷ Ke sasi boto vala omdue imi imodong moli ke ensel e amkakai angainmi tito la egim e osep tidue anit ke imi.

⁸ Deka omdue wan ka pula keniye dong moli ke imi e imaplau isak.” Pelengon ka wai ke elio ka Ida Tapolngon due wan ka pula keniye dong moli ke itosep lana ine langane. Wan ka pula keniye tidong moli ke itosep e wan silang blang dong kovok. E dau oku ane imavati wan ka pula keniye tidong moli ke itosep kovok. Aurou.

⁹ Iteile oglou Ida Tapolngon due Yesus polou langka itosep e ke sasi boto vala iye dong moli ke ensel. Ida Tapolngon due elio langane kesua batne iye makai ite e Yesus mete e kasip amunte. E eknikane Ida Tapolngon kakai Yesus angaine tito la egim e osep tidue anit ke iye.

¹⁰ Ida Tapolngon ka iye due wan ka pula keniye e ka ila arit plau wan tonari didi aitno e songon Yesus namani elio soulu ka osep tidue ke iye. Ke elio langane Yesus polou Ida Luangan e Ida Tapolngon waiki osep pula tipolou titno batne ke iye.

¹¹ Deka Yesus ka iye gute ka due osep tipolou itau lokono ke Ida Tapolngon bitna e osep tonari Pmarak kene vala. Iye Ida Tapolngon. Deka Yesus mnak iye ma iye sir osep tonari iye sisrok kovok. Aurou.

¹² E Yesus wai ke Ida Tapolngon langane. “Ma ngapalongo sipmi ke elio ka omdue. Alo ka tiduni pulu ma ngakakai angain wom tito la egim ke amtarsak.”

¹³ E Yesus wai blang langane. “Ma ngadue ngong ngadong ke Ngau Tapolngon limla.” E ila pelengon silang blang lang-ane. “Emklingen. Ngadong ane kap osep ka Ngau Tapol-ngon kar isak ke ngong.”

Yesus polou langka itosep ma iye lua ite

¹⁴ Osep tonari ka Yesus wai ine isak osep vala. E Yesus me polou langka itosep ma iye mete e ina metengen due Satan ila arit ka due osep timete polou yagos.

¹⁵ E oglou itosep itelim ke metengen. Ane langka itodong ke kalabus ke wan ka itelim ine. Alo ka Yesus mete iye due ite itosongon kalabus tonari.

¹⁶ E iteile omur langane. Yesus me ke taklak ma iye lua ensel kovok. Aurou. Iye me ma iye lua Abraham ila napakngan vala.

¹⁷ E ke batne langane iye polou langka itosep. Ma iye karanga polou udo gute loulou ina ka mgo ka makai ite. E iye didi Ida Tapolngon ila pelengon keniye ke ila bokongon ka iye loulou ke ite. Ma iye klok osep urok elio epmes ina kla.

¹⁸ Alo ka iye dong ke taklak Satan tok iye ma iye due elio soulu. E iye namani elio soulu ka osep tidue ke iye. Deka ke batne langane iye karanga lua osep alo ka tokngon polou ke isak.