Hibru 13 - Aria New Testament

Ite lana ite ke osep leklou

¹ Umu Ida Tapolngon ila osep deka aling aling umu lana umu pulu.

² E omtomu sisir langane. Alo ka osep kaulei time ke umu deka umekere isak itau. Kesua umeile oglou ensel leklou tipolou e osep tivati isak langka isak osep kaulei. E tikere isak itau e tile isak ensel kovok.

³ Omtomu sisir osep ka tidong ke kalabus e aitno lumu mter langka umodong ke kalabus kap isak. E omtomu sisir osep ka agegeng polou ke isak langka agegeng polou ke umu blang.

⁴ Pelengon silang blang lang-ane. Gingen elio itau e osep ka tigi ma tidue anit pulu. Ma gute due elio kap apmang silang koke apmang due elio kap gute arang silang kovok. Kesua Ida Tapolngon ma wade osep ka tidue okwa e osep ka tiusu pulu.

⁵ E aitno lumu mter langka umawaiki umodue mani vala kovok. E aitno lumu epen ke wan ka dong kap umu. Kesua Ida Tapolngon ila pelengon wai langane. “Ma ngasongon umu kovok e ma umodong adai vala kovok.”

⁶ Langka langane deka itakaranga itawai langane. “Ida Puda ma lua ngong e ngalim ke wan bitna bitna kovok. Osep tikaranga tidue wan gesa ke ngong ma ngalim ine kovok.”

⁷ Aitno lumu mter ke osep ka oglou tiplau ke umu e tiwai Ida Tapolngon ila pelengon ke umu. Aitno lumu mter ke urok mosongon e urok elio itau e umakana aitno lisak ila dagar.

⁸ Oglou ari Yesus Krais dong e eknikane iye dong eriar langare blang e mase ma iye dong eriar langare blang. E iye segesege kovok.

⁹ Langka osep tiwai ke umu ke pelengon bitna bitna ka eriar langka omon itau kovok umosongon urok pelengon pagolgol aitno lumu kovok. Ma itosongon Ida Tapolngon ila makaingan due aitno lite ila dagar polou dagar lokono. E apu bitna bitna ka la ke ngangon karanga due ite itodong dagar kovok. Langka oglou apu tonari karanga lua osep ka tididi isak kovok.

¹⁰ E udo bota ka osep tidue elio opmu ina ine dong e osep loulou ina ka oglou tiboko ke ninu molo ina tikaranga tingen ngangon ke bota tonari kovok.

¹¹ Gute loulou ina ka mgo kalke ongwa inarak marau sep ke Eliang Ka Itau Lokono. E iye kar marau tonari langka elio opmu ina ke osep urok elio epmes ina. E tikamlu ongwa tonari pampamu lisak ke armok ina boul.

¹² E Yesus blang langane. Iye mete ke armok dogur e ina marau due ite itodong ila osep e itodong itau lokono ke Ida Tapolngon bitna.

¹³ Deka ite blang langka itala ke armok dogur e itanamani mnakngan langka Yesus namani mnakngan.

¹⁴ E iteile omur langane. Ke taklak ane udo armok dong ka dong vala dong kovok e itapara ke armok ka mase ma polou.

¹⁵ Deka aling aling itakakai Ida Tapolngon angaine tito la egim. Ane langka itodue elio opmu ina alo ka itapalongo osep ke Yesus.

¹⁶ E umodue elio itau ke osep leklou e langka osep urok wan isuk boto vala deka umotuk lumu wan e umolua isak ine. E omtomu uli ke elio tonari kovok kesua elio langane iye langka umodue lumu wan e umakare ke Ida Tapolngon e aitno itau ine.

¹⁷ Umodong moli ke osep ka tiplau umu e umeini urok pelengon. Kesua tidue urok bokongon ka tiplau umu e mase ma tiwai ke Ida Tapolngon ke wan ka tidue. Umeini isak ma aitno lisak itau ke urok bokongon e bokongon tonari opru isak kovok. Kesua langka urok bokongon opru isak elio are ma lua umu kovok.

¹⁸ Aling aling umawai itau ke imi ma Ida Tapolngon lua imi. E imeile omur wan gesa vri ke imi kovok e aling aling imawaiki imodue elio itau vala.

¹⁹ E ngawaiki ma umawai itau langane pula ma suong ngakaranga ngaiding ke umu.

²⁰ Ida Puda Yesus plau ite itau langka gute ka plau sipsip plau isak itau. Yesus ina marau due Ida Tapolngon ila kontrak oku ina ka dong vala dong polou lokono. E Ida Tapolngon ka due aitno lite dong epen due Yesus poga tito ke ina denga.

²¹ Ngawaiki Ida Tapolngon kere umu ke wan keniye ka itau ma umakaranga umedidi aitno ke wan ka iye waiki umodue. Ngawaiki Yesus Krais due umu ma umodue elio isuk isuk ka Ida Tapolngon aitno itau ine. E ma itakakai Krais angaine tito la egim dong vala dong. Lokono.

Pelengon ane babrum pelengon ke pas ane

²² Sipmi. Ngawaiki umo-klingen lou pelengon ka ngasogoe. Kesua ngawaiki ngadue aitno lumu dong dagar e pas ane bolbolo vala.

²³ E ngawaiki umeile osep tisongon udo aten Timoti ke kalabus kodong. Langka suong iye polou ke ngong deka ma imorwo imouti ke umu e imavati umu.

²⁴ Umawai “oklou itau” ke osep ka tiplau umu e ke Ida Tapolngon ila osep ka pula keniye. E osep ka tidong ke omur Itali tiwai “oklou itau” ke umu.

²⁵ Sipmi. Ngawaiki Ida Tapolngon ila makaingan dong kap umu ka pula keniye.