Hibru 12 - Aria New Testament

Ma aitno lite mter ke elio ka Yesus due

¹ E osep pula pula tonari ka aitno lisak dagar ke Ida Tapolngon langka tidong lelei ke ite e tinis ite ke elio itau. Deka ma ite arit ite eriar langka osep ka tisuong ke resis ma itodue wan ka Ida Tapolngon waiki itodue. Ma itosongon elio keniye ka dangdang ite ke resis tonari e itosongon elio epmes ina ka kis dagar ke ite.

² Ma aitno lite mter ke Yesus ka iye aitno lite ila dagar batne. E iye due aitno lite ila dagar polou dagar lokono. Alo ka iye dong ke taklak aitno neser ke wan itau lokono ka mase ma ila wan. Deka iye ulou ke ina akai kovok e aitno mter langka wan tonari soulu kovok e iye mete ine vala. E iye mnak iye ine kovok. E eknikane iye dong ke omur heven ke Ida Tapolngon limla odung.

³ Aitno lumu mter ke elio ka polou ke Yesus. Osep epmes ina aitno lisak engil ke iye e tidue elio soulu ke iye. E iye vri dagar ine. Deka tarna lumu meingen kovok ke elio ka umodong dagar ke elio soulu ka osep tidue ke umu e umosongon aitno lumu ila dagar kovok.

⁴ E ngaile umosokluk ke osep epmes ina. E dau umemete batne ke osep tonari urok elio kovok.

⁵ Ida Tapolngon ila pelengon wai ke umu langka titno umu ma due umu umodong dagar. Omtomu uli ine koke aurou? Iye wai langane. “Erigu arang. Langka Ngap Puda mosi lem elio ka sasi omdue markan ine kovok. E alo ka iye nis wom ke lem elio soulu aitno lugom kro ine kovok.

⁶ Kesua Ngap Puda mosi osep ka iye lana iye ke isak urok elio. E iye ules osep ka isak titno isak.”

⁷ Langka Ida Tapolngon mosi umu deka umodong dagar ine vala. E Ida Tapolngon due langane kesua umu titno umu. Aitno lumu lange? Gute dong ka timla mosi iye kovok? Aurou.

⁸ Ida Tapolngon mosi titno ka pula keniye. E langka iye mosi umu kovok deka umu titno kovok e umu somolong vala.

⁹ Ite keniye sipmada dong ke taklak e timosi ite e itodue anit ke isak. Langka langane deka itodue anit lokono ke Pmada ka dong ke omur heven e iteini iye deka ma itodong itau.

¹⁰ Sipmada ke taklak ane tididi aitno lisak e timosi ite sasi boto vala. E Ida Tapolngon mosi ite ma lua ite ma udo elio polou itau langka ila elio itau.

¹¹ Alo ka Ida Tapolngon mosi ite aitno lite neser ine kovok e aitno lite kro ine. E mase iteile omur udo elio polou itau batne ke elio ka Ida Tapolngon mosi ite. Deka aitno lite epen ine vala.

Itodong dagar e itedidi Ida Tapolngon ila elio itau

¹² Langka lupmu e kopmu urok arit kovok deka umu arit umu ma tidong dagar.

¹³ E umelila ke ekreng ka osuk ma kopmu sasi kovok. Aurou. Ma tipolou itau vala.

¹⁴ Umu arit umu ma aitno lumu epen kap osep ka pula keniye e umodue elio isuk isuk ka Ida Tapolngon aitno itau ine. E langka osep tidue elio isuk isuk ka Ida Tapolngon aitno itau ine kovok deka tikaranga tivati Ida Puda kovok.

¹⁵ Umeile umu itau lama umopul dogur ke Ida Tapolngon ila makaingan. E umeile umu itau lama gute gesa airavu ke umu polou langka wan ka meli e ila elio due elio soulu polou ke osep leklou e elio tonari due asmel ke osep pula.

¹⁶ Umeile umu itau lama gute gesa airavu ke umu due elio isungon ina. Koke gute pul dogur ke Ida Tapolngon langka Iso pul dogur ke ila elio ka sirngen ina. Iso pli ila elio ka sirngen ina kesua sapanga due e iye waiki ngen ngangon vala.

¹⁷ E umeile langane. Mase Iso waiki due timla ila keregen e iye karanga due kovok. E iye kngis ine e dau iye karanga due kerengen tonari kovok.

¹⁸ Umopolou ke gigri langka oglou osep Israel ina tipolou ke gigri Sainai kovok. Aurou. Tikaranga tikai gigri tonari e tivati eiou ngene e omur aivoro e engen omba polou.

¹⁹ E tiklingen kuliep wai e tiklingen Ida Tapolngon kreine wai ke isak. Deka tilim ine e tipmi Moses ma iye wai ke Ida Tapolngon ma iye wai ke isak blang kovok.

²⁰ Tilim ke Ida Tapolngon ila pelengon ka wai langane. “Langka gute gesa koke ongwa gesa me tito ke gigri ma umomluk iye ke opmu ma iye mete.”

²¹ E tivati elio tonari e tilim omba ine. E Moses lim blang deka iye wai langane. “Ngalim e nganakarkar ine.”

²² E umopolou ke gigri langare kovok. Umopolou ke gigri Saion e ke armok Jerusalem ka dong ke omur heven ka Ida Tapolngon dong ine. E ensel pula pula lokono tidong ine e aitno lisak neser omba.

²³ E umopolou ke duningen ka ila osep aitno lisak neser ine. Osep tonari tidong langka Ida Tapolngon ina sirngen sirngen e angainsak dong ke Ida Tapolngon ila buk ka dong ke omur heven. E umopolou ke Ida Tapolngon ka wade osep ka pula keniye urok elio isuk isuk. E umopolou ke osep ka Ida Tapolngon due isak tipolou itau e osuk ke iye bitna kodong ansak.

²⁴ Umopolou ke Yesus ka loulou ke ite ke Ida Tapolngon ila kontrak oku ina. E umopolou ke Yesus ina marau ka baser polou e kli udo elio epmes ina e lua ite. Yesus ina marau nisngen omba e mole Abel ina marau.

²⁵ Deka umepli Ida Tapolngon ila pelengon kovok. Oglou iye dong ke gigri Sainai e wai ke osep Israel ina. E osep leklou tipli ila pelengon deka iye wade isak ine e tikos ke ila wadenen kovok. E eknikane iye dong ke omur heven e wai ke ite. Deka aitno lumu lange? Langka itepli ila pelengon itakaranga itokos ke ila wadengen? Aurou lokono.

²⁶ Alo ka Ida Tapolngon dong ke gigri Sainai iye wai deka ila pelengon due taklak nemilmil. E eknikane Ida Tapolngon wai langane. “Aling silang blang ma ngadue taklak nemilmil. E taklak nemilmil vala kovok. Ma ngadue taklak e sirva tinemilmil.”

²⁷ Ida Tapolngon ila pelengon palma ka wai “aling silang blang” lana ine langane. Wan keniye ka Ida Tapolngon due e tinemilmil ma polou yagos. E wan ka karanga nemilmil kovok ma dong vala.

²⁸ Deka langane. Mase ma itodong ke omur ka Ida Tapolngon plaue e omur tonari karanga nemilmil kovok. Deka ma itawai tenkyu ke Ida Tapolngon e itolotuim iye ke elio ka aitno itau ine. Ma itodue anit ke iye e iteini iye.

²⁹ Kesua Ida Tapolngon langka eiou ka ngen wan ka pula keniye.